ਕੰਜ਼ਰਵੇਟਿਵ ਨੇ ਸਪੀਕਰ ਦੇ ਅਸਤੀਫ਼ੇ ਦੀ ਕੀਤੀ ਮੰਗ, ਕਿਹਾ ਟਰੂਡੋ ਨੇ ਕੀਤੀ ਹੱਦ ਪਾਰ

ਕੈਨੇਡੀਅਨ ਸੰਸਦ ਹਾਊਸ ਆਫ਼ ਕਾਮਨ ਦੇ ਸਪੀਕਰ ਵਲੋਂ ਬੀਤੇ ਕੱਲ੍ਹ ਪ੍ਰਸ਼ਨ ਪ੍ਰੀਰੀਅਡ ਦੌਰਾਨ ਪੀਅਰੇ ਪੋਲੀਵਰੇ ਨੂੰ ਹਾਊਸ ਤੋਂ ਬਾਹਰ ਕੱਢਣ ਦਾ ਮਾਮਲਾ ਗਰਮਾ ਗਿਆ ਹੈ। ਕੰਜ਼ਰਵੇਟਿਵ ਸੰਸਦ ਮੈਂਬਰ ਨੇ ਸਪੀਕਰ ਗ੍ਰੇਗ ਫਰਗਸ ਨੂੰ ਅਸਤੀਫਾ ਦੇਣ ਲਈ ਕਿਹਾ ਹੈ। ਸੰਸਦ ਮੈਂਬਰ ਦਾ ਕਹਿਣਾ ਹੈ ਕਿ ਫਰਗਸ ਨੇ ਇੱਕ ਅਧਿਕਾਰਤ ਵਿਰੋਧੀ ਧਿਰ ਲੀਡਰ ਨੂੰ ਹਾਊਸ ਤੋਂ ਬਾਹਰ ਜਾਣ ਦਾ ਆਦੇਸ਼ ਦਿੱਤਾ, ਜੋ ਗਲਤ ਸੀ।

ਕੰਜ਼ਰਵੇਟਿਵ ਲੀਡਰ ਪੀਅਰੇ ਪੋਲੀਵਰੇ ਨੇ ਬੀ. ਸੀ. ਦੀ ਡਰੱਗ ਅਪਰਾਧੀਕਰਨ ਪਾਲਿਸੀ ਨੂੰ ਵਾਪਸ ਲੈਣ ਦੀ ਮੰਗ ਕਰਦੇ ਹੋਏ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਸਨਕੀ ਕਿਹਾ ਸੀ ਅਤੇ ਅੱਜ ਇੱਕ ਇੰਟਰਵਿਊ ਵਿਚ ਪੋਲੀਵਰੇ ਨੂੰ ਪੁੱਛਿਆ ਗਿਆ ਕਿ ਕੀ ਉਨ੍ਹਾਂ ਨੂੰ ਆਪਣੇ ਕਹੇ ’ਤੇ ਪਛਤਾਵਾ ਹੈ ਤਾਂ ਉਨ੍ਹਾਂ ਕਿਹਾ ਕਿ ਨਹੀਂ।

ਗੌਰਤਲਬ ਹੈ ਕਿ ਹਾਊਸ ਆਫ਼ ਕਾਮਨ ਵਿਚ ਪ੍ਰਧਾਨ ਮੰਤਰੀ ਨਾਲ ਉਨ੍ਹਾਂ ਦੀ ਡਰੱਗ ਦੇ ਮੁੱਦੇ ’ਤੇ ਤਿੱਖੀ ਬਹਿਸ ਹੋਈ ਸੀ। ਟਰੂਡੋ ਨੇ ਵੀ ਉਨ੍ਹਾਂ ’ਤੇ ਖੋਖਲੇ ਲੀਡਰ ਹੋਣ ਦੇ ਦੋਸ਼ ਲਗਾਏ ਸਨ।

ਕੰਜ਼ਰਵੇਟਿਵ ਸੰਸਦ ਮੈਂਬਰ ਮਾਈਕਲ ਕੂਪਰ ਨੇ ਕਿਹਾ ਕਿ ਸਪੀਕਰ ਨੂੰ ਅਸਤੀਫਾ ਦੇਣਾ ਚਾਹੀਦਾ ਹੈ ਕਿਉਂਕਿ ਅਧਿਕਾਰਤ ਵਿਰੋਧੀ ਧਿਰ ਲੀਡਰ ਨੂੰ ਬਾਹਰ ਜਾਣ ਲਈ ਕਹਿਣਾ ਅਪਮਾਨਜਨਕ ਸੀ। ਉਥੇ ਹੀ, ਸਰਕਾਰ ਹਾਊਸ ਲੀਡਰ ਸਟੀਵਨ ਮੈਕਿਨਨ ਨੇ ਕਿਹਾ ਕਿ ਸਪੀਕਰ ਦੇ ਫੈਸਲਿਆਂ ਦਾ ਸਨਮਾਨ ਕਰਨਾ ਚਾਹੀਦਾ ਹੈ।