ਕੰਜ਼ਰਵੇਟਿਵ ਨੇ ਲਿਬਰਲ ਲੀਡਰਸ਼ਿਪ ਲਈ ਬਹਿਸ ਦੀ ਕੀਤੀ ਆਲੋਚਨਾ

ਕੈਨੇਡਾ ਦੀ ਮੁੱਖ ਵਿਰੋਧੀ ਧਿਰ ਨੇ ਲਿਬਰਲ ਲੀਡਰਸ਼ਿਪ ਡਿਬੇਟ ’ਤੇ ਨਿਸ਼ਾਨਾ ਸਾਧਿਆ ਹੈ। ਕੰਜ਼ਰਵੇਟਿਵ ਐਮਪੀ ਮਾਈਕਲ ਬੈਰੇਟ ਨੇ ਕਿਹਾ ਕਿ ਉਹ ਹੈਰਾਨ ਹਨ ਕਿ ਲਿਬਰਲ ਲੀਡਰਸ਼ਿਪ ਬਹਿਸ ਦੌਰਾਨ ਕਿਸੇ ਨੇ ਵੀ ਮਾਰਕ ਕਾਰਨੀ ’ਤੇ ਕਾਰਬਨ ਟੈਕਸ ’ਤੇ ਉਨ੍ਹਾਂ ਦੇ ਸਟੈਂਡ ਨੂੰ ਸਪੱਸ਼ਟ ਕਰਨ ਲਈ ਦਬਾਅ ਨਹੀਂ ਪਾਇਆ ਅਤੇ ਨਾ ਹੀ ਕਾਰਨੀ ਨੇ ਇਮੀਗ੍ਰੇਸ਼ਨ ’ਤੇ ਆਪਣੀ ਸਥਿਤੀ ਸਾਫ ਨਹੀਂ ਕੀਤੀ, ਜਦੋਂ ਕਿ ਸਾਬਕਾ ਬੈਂਕਰ ਨੇ ਇਹ ਕਿਹਾ ਹੈ ਕਿ ਇਮੀਗ੍ਰੇਸ਼ਨ ’ਤੇ ਸ਼ਿਕੰਜਾ ਕੱਸਣ ਲਈ ਉਨ੍ਹਾਂ ਕੋਲ ਪਲੈਨ ਹੈ।

ਇਸ ਦੇ ਨਾਲ ਹੀ ਕੰਜ਼ਰਵੇਟਿਵ ਨੇ ਮਾਰਕ ਕਾਰਨੀ ਨੂੰ ਕਿਹਾ ਕਿ ਉਹ ਗੱਲ ਵੀ ਸਪੱਸ਼ਟ ਦੱਸਣ ਕਿ ਉਹ ਪੂਰੀ ਤਰ੍ਹਾਂ ਫਰੈਂਚ ਨਹੀਂ ਬੋਲ ਸਕਦੇ ਕਿਉਂਕਿ ਲਾਈਵ ਡਿਬੇਟ ਵਿਚਕਾਰ ਉਨ੍ਹਾਂ ਦੇ ਸਹਿਕਰਮੀ ਨੂੰ ਉਨ੍ਹਾਂ ਨੂੰ ਸਹੀ ਕਰਨ ਦੀ ਜ਼ਰੂਰਤ ਪਈ। ਰਿਪੋਰਟਸ ਮੁਤਾਬਕ, ਕਾਰਨੀ ਨੇ ਗਾਜ਼ਾ ਦੇ ਭਵਿੱਖ ਬਾਰੇ ਗੱਲਬਾਤ ਦੌਰਾਨ ਫਰੈਂਚ ਡਿਬੇਟ ਵਿਚ ਗਲਤੀ ਨਾਲ ਕਹਿ ਦਿੱਤਾ ਸੀ ਕਿ ਉਹ ਹਮਾਸ ਨਾਲ ਸਹਿਮਤ ਹਨ, ਇਸ ’ਤੇ ਤੁਰੰਤ ਫ੍ਰੀਲੈਂਡ ਨੇ ਉਨ੍ਹਾਂ ਦੀ ਟਿੱਪਣੀ ਸਹੀ ਕਰਵਾਈ ਸੀ।