ਕੰਜ਼ਰਵੇਟਿਵ ਪਾਰਟੀ ਨੇ ਸਕਾਰਬਰੋ-ਸਾਊਥ ਵੈਸਟ ਹਲਕੇ ਤੋਂ ਡਾਇਨਾ ਫਿਲਿਪੋਵਾ ਨੂੰ ਐਲਾਨਿਆ ਉਮੀਦਵਾਰ

ਕੰਜ਼ਰਵੇਟਿਵ ਪਾਰਟੀ ਨੇ ਸਕਾਰਬਰੋ-ਸਾਊਥ ਵੈਸਟ ਹਲਕੇ ਤੋਂ ਇੱਕ ਮਿਡਲ ਸਕੂਲ ਟੀਚਰ ਡਾਇਨਾ ਫਿਲਿਪੋਵਾ ਨੂੰ ਇਸ ਸੰਸਦੀ ਸੀਟ ਦੀ ਜ਼ਿਮਨੀ ਚੋਣ ਵਿਚ ਉਤਾਰਨ ਦਾ ਐਲਾਨ ਕੀਤਾ ਹੈ। ਉਹਨਾਂ ਦਾ ਮੁਕਾਬਲਾ ਓਨਟਾਰੀਓ ਐਨ.ਡੀ.ਪੀ. ਤੋਂ ਲਿਬਰਲ ਪਾਰਟੀ ਵਿਚ ਸ਼ਾਮਲ ਹੋਈ ਡੋਲੀ ਬੇਗਮ ਨਾਲ ਹੋਵੇਗਾ, ਜੋ ਇਸੇ ਹਲਕੇ ਤੋਂ ਵਿਧਾਇਕ ਸਨ।

ਇਹ ਸੀਟ ਸਾਬਕਾ ਲਿਬਰਲ ਕੈਬਨਿਟ ਮੰਤਰੀ ਬਿਲ ਬਲੇਅਰ ਦੇ ਅਸਤੀਫੇ ਤੋਂ ਬਾਅਦ ਖਾਲੀ ਹੋਈ ਸੀ, ਜੋ ਯੂ.ਕੇ. ਵਿਚ ਕੈਨੇਡਾ ਦੇ ਹਾਈ ਕਮਿਸ਼ਨਰ ਵਜੋਂ ਸੇਵਾਵਾਂ ਨਿਭਾ ਰਹੇ ਹਨ। ਕੰਜ਼ਰਵੇਟਿਵ ਵਲੋਂ ਸਿਰਫ ਇਸੇ ਸੀਟ ਤੋਂ ਉਮੀਦਵਾਰ ਉਤਰਾਨਾ ਬਾਕੀ ਸੀ, ਬਾਕੀ ਦੋ ਸੀਟਾਂ ਜਿਨ੍ਹਾਂ 'ਤੇ ਜ਼ਿਮਨੀ ਚੋਣਾ ਹੋਣੀਆਂ ਹਨ, ਉਨ੍ਹਾਂ ਲਈ ਪਾਰਟੀ ਨੇ ਪਿਛਲੇ ਦਿਨ ਹੀ ਉਮੀਦਵਾਰਾਂ ਦੇ ਨਾਮ ਫਾਈਨਲ ਕੀਤੇ ਸਨ। ਟੋਰੌਂਟੋ ਦੀ ਹਾਈ-ਪ੍ਰੋਫਾਈਲ ਸੀਟ ਯੂਨੀਵਰਸਿਟੀ-ਰੋਜ਼ਡੇਲਸਮੇਤ ਇਨ੍ਹਾਂ ਤਿੰਨ ਜ਼ਿਮਨੀ ਚੋਣ ਲਈ ਵੋਟਾਂ 13 ਅਪ੍ਰੈਲ ਨੂੰ ਪੈਣੀਆਂ ਹਨ।

ਇਹ ਸੀਟ ਪਹਿਲਾਂ ਕ੍ਰਿਸਟੀਆ ਫ੍ਰੀਲੈਂਡ ਕੋਲ ਸੀ ਅਤੇ ਇਸ ਨੂੰ ਲਿਬਰਲ ਪਾਰਟੀ ਦਾ ਗੜ੍ਹ ਮੰਨਿਆ ਜਾਂਦਾ ਹੈ। ਹੁਣ ਦੇਖਣਾ ਹੋਵੇਗਾ ਕਿ ਕੰਜ਼ਰਵੇਟਿਵ ਇਸ ਕਿਲ੍ਹੇ ਵਿਚ ਸੰਨ੍ਹ ਲਾਉਣ ਵਿਚ ਕਾਮਯਾਬ ਹੁੰਦੇ ਹਨ ਜਾਂ ਨਹੀਂ। ਜੇ ਇਹ ਸੀਟਾਂ ਲਿਬਰਲਸ ਦੇ ਖਾਤੇ ਵਿਚ ਜਾਂਦੀਆਂ ਹਨ ਤਾਂ ਪ੍ਰਧਾਨ ਮੰਤਰੀ ਦੀ ਅਗਵਾਈ ਵਾਲੀ ਸਰਕਾਰ ਪੂਰਨ ਬਹੁਤਮਤ ਵਿਚ ਆ ਜਾਵੇਗੀ।