13.96C Vancouver 13.96C VancouverDec 10, 2024 5:40 PM - Connect Newsroom
ਕੈਨੇਡਾ ਦੀ ਮੁੱਖ ਵਿਰੋਧੀ ਧਿਰ ਕੰਜ਼ਰਵੇਟਿਵ ਵਲੋਂ ਟਰੂਡੋ ਦੀ ਘੱਟ ਗਿਣਤੀ ਸਰਕਾਰ ਨੂੰ ਡੇਗਣ ਦੀ ਤੀਜੀ ਤੇ ਤਾਜ਼ਾ ਕੋਸ਼ਿਸ਼ ਵੀ ਫੇਲ੍ਹ ਹੋ ਗਈ ਹੈ। ਐੱਨਡੀਪੀ ਨੇ ਲਿਬਰਲ ਦੀ ਘੱਟ ਗਿਣਤੀ ਸਰਕਾਰ ਦਾ ਸਾਥ ਦਿੰਦੇ ਹੋਏ ਕੰਜ਼ਰਵੇਟਿਵ ਦੇ ਬੇਭਰੋਸਗੀ ਮਤੇ ਨੂੰ ਨਾਕਾਮ ਕਰ ਦਿੱਤਾ।
ਐਨਡੀਪੀ ਲੀਡਰ ਜਗਮੀਤ ਸਿੰਘ ਨੇ ਪਹਿਲਾਂ ਹੀ ਸਾਫ ਕਰ ਦਿੱਤਾ ਸੀ ਕਿ ਬੇਸ਼ੱਕ ਇਸ ਮਤੇ ਵਿਚ ਉਨ੍ਹਾਂ ਦੇ ਸ਼ਬਦਾਂ ਨੂੰ ਆਧਾਰ ਬਣਾਇਆ ਗਿਆ ਹੈ ਪਰ ਉਨ੍ਹਾਂ ਦੀ ਪਾਰਟੀ ਕੰਜ਼ਰਵੇਟਿਵ ਦੇ ਝਾਂਸੇ ਵਿਚ ਨਹੀਂ ਆਵੇਗੀ ਅਤੇ ਇਸ ਦੇ ਖਿਲਾਫ ਵੋਟ ਕਰੇਗੀ।
ਜਗਮੀਤ ਸਿੰਘ ਹਾਲਾਂਕਿ, ਕਿਸੇ ਬੈਠਕ ਕਾਰਨ ਵੋਟ ਦੌਰਾਨ ਸਦਨ ਵਿਚ ਨਹੀਂ ਸਨ ਪਰ ਉਨ੍ਹਾਂ ਨੇ ਆਨਲਾਈਨ ਵੋਟ ਵਿਚ ਹਿੱਸਾ ਲਿਆ। ਉਥੇ ਹੀ, ਸੰਸਦ ਮੈਂਬਰਾਂ ਨੇ ਸੋਮਵਾਰ ਨੂੰ ਐੱਨਡੀਪੀ ਦੇ ਇੱਕ ਪ੍ਰਸਤਾਵ ’ਤੇ ਵੀ ਵੋਟ ਪਾਈ, ਜਿਸ ਵਿਚ ਟਰੂਡੋ ਸਰਕਾਰ ਨੂੰ ਜੀਐੱਸਟੀ ਜ਼ਰੂਰੀ ਚੀਜ਼ਾਂ ਤੋਂ ਪੱਕੇ ਤੌਰ ’ਤੇ ਹਟਾਉਣ ਅਤੇ 250 ਡਾਲਰ ਦੀ ਰਿਬੇਟ ਵਿਚ ਸੇਵਾਮੁਕਤ ਸੀਨੀਅਰਾਂ ਨੂੰ ਸ਼ਾਮਲ ਕਰਨ ਦੀ ਮੰਗ ਸੀ।
ਹਾਲਾਂਕਿ, ਇਸ ਪ੍ਰਸਤਾਵ ਦੇ ਹੱਕ ਵਿਚ ਸਿਰਫ ਐੱਨਡੀਪੀ ਅਤੇ ਗ੍ਰੀਨਜ਼ ਨੇ ਹੀ ਵੋਟ ਕੀਤੀ, ਜਿਸ ਦੇ ਨਤੀਜੇ ਵਜੋਂ ਜਗਮੀਤ ਸਿੰਘ ਦੇ ਇਸ ਪ੍ਰਸਤਾਵ ਦੀ ਹਾਰ ਹੋ ਗਈ।
