21.97C Vancouver 21.97C VancouverJan 25, 2023 1:37 AM - The Canadian Press
ਵੈਨਕੂਵਰ ਪੁਲਿਸ ਦੀ ਅਫ਼ਸਰ ਦੇ ਖੁਦਕੁਸ਼ੀ ਮਾਮਲੇ 'ਚ ਇਨਕਵੈਸਟ ਦੌਰਾਨ ਦੱਸਿਆ ਗਿਆ ਹੈ ਕਿ ਕਾਂਸਟੇਬਲ ਨਿਕੋਲ ਚੈਨ ਦਾ 2 ਸੀਨੀਅਰ ਅਫਸਰਾਂ ਨਾਲ ਅਨੁਚਿਤ ਰਿਸ਼ਤੇ ਸਥਾਪਿਤ ਕਰਨ ਤੋਂ ਪਹਿਲਾਂ ਮਾਨਸਿਕ ਸਿਹਤ ਸੰਬੰਧੀ ਅਤੇ ਖੁਦਕੁਸ਼ੀ ਦੀਆਂ ਮੁਮਕਿਨ ਕੋਸ਼ਿਸ਼ਾਂ ਸੰਬੰਧੀ ਇਤਿਹਾਸ ਸੀ।
ਹਿਊਮਨ ਰਿਸੋਰਸਿਸ ਅਫ਼ਸਰ ਸਾਰਜੈਂਟ ਸਿੰਡੀ ਵੈਂਸ ਨੇ ਇੱਕ ਟਾਈਮਲਲਾਈਨ ਪੇਸ਼ ਕੀਤੀ ਜਿਸ 'ਚ ਕਾਂਸਟੇਬਲ ਚੈਨ ਦੀਆਂ ਐਚ.ਆਰ. ਸ਼ਿਕਾਇਤਾਂ ਸਨ।
ਉਨ੍ਹਾਂ ਦੱਸਿਆ ਕਿ ਹਾਇਰਿੰਗ ਪ੍ਰੀਕਿਰਿਆ ਦੌਰਾਨ ਚੈਨ ਨੇ ਦੱਸਿਆ ਸੀ ਕਿ ਸਾਲ 2006 'ਚ 17 ਸਾਲ ਦੀ ਉਮਰ 'ਚ ਉਨ੍ਹਾਂ 30 ਤੋਂ 40 ਟਾਇਲਾਨੌਲ ਖਾ ਲਈਆਂ ਸਨ।
ਯਾਦ ਰਹੇ ਖੁਦਕੁਸ਼ੀ ਦਾ ਮਾਮਲਾ ਕਰੀਬ 4 ਸਾਲ ਪਹਿਲਾਂ ਦਾ ਹੈ।
ਵੈਨਕੂਵਰ ਪੁਲਿਸ ਵੱਲੋਂ 30 ਸਾਲਾ ਅਫ਼ਸਰ ਦੀ ਮੌਤ ਸੰਬੰਧੀ ਜਾਣਕਾਰੀ ਬੀ.ਸੀ. ਕੋਰੋਨਰਸ ਸਰਵਿਸ ਕੋਲ ਸਾਲ 2019 'ਚ 27 ਜਨਵਰੀ ਨੂੰ ਪਹੁੰਚਾਈ ਗਈ ਸੀ।
ਕੱਲ ਇਨਕਵੈਸਟ ਦੌਰਾਨ ਪੀੜਤ ਅਫ਼ਸਰ ਦੀ ਭੈਣ ਨੇ ਦੱਸਿਆ ਸੀ ਕਿ ਉਸ ਦਾ ਮੰਨਣਾ ਹੈ ਕਿ ਕਾਂਸਟੇਬਲ ਨਿਕੋਲ ਚੈਨ ਨੂੰ ਡਿਪਾਰਟਮੈਂਟ 'ਚ ਇੱਕ ਹੋਰ ਅਫ਼ਸਰ ਨਾਲ ਸ਼ਰੀਰਕ ਸੰਬੰਧ ਬਣਾਉਣ ਲਈ ਬਲੈਕਮੇਲ ਕੀਤਾ ਜਾ ਰਿਹਾ ਸੀ।
ਜੈਨੀਫਰ ਚੈਨ ਨੇ ਕਿਹਾ ਕਿ ਉਸ ਦਾ ਮੰਨਣਾ ਹੈ ਕਿ ਉਸ ਦੀ ਭੈਣ ਦੀ ਮਾਨਸਿਕ ਸਿਹਤ ਸੰਬੰਧੀ ਸਮੱਸਿਆ ਇੱਕ ਕੋ-ਵਰਕਰ ਵੱਲੋਂ ਕੀਤੇ ਗਏ ਜਿਨਸੀ ਹਮਲੇ ਕਾਰਨ ਸ਼ੁਰੂ ਹੋਈ ਸੀ ਜਿਸ ਦੇ ਨਤੀਜੇ ਵਜੋਂ ਉਸ ਨੇ ਜਾਨ ਦੇ ਦਿੱਤੀ।
ਉਨ੍ਹਾਂ ਕਿਹਾ ਕਿ ਕਾਂਸਟੇਬਲ ਨਿਕੋਲ ਚੈਨ ਨੂੰ ਪ੍ਰੇਸ਼ਾਨੀ ਅਤੇ ਡਿਪਰੈਸ਼ਨ ਦਾ ਸਾਹਮਣਾ ਕਰਨਾ ਪਿਆ ਸੀ ਅਤੇ ਉਸ ਨੇ ਸਾਲ 2017 'ਚ ਪੁਲਿਸ ਚੀਫ਼ ਨੂੰ 2 ਸੀਨੀਅਰ ਅਫਸਰਾਂ ਹੱਥੋਂ ਹੋਏ ਸੋਸ਼ਣ ਦੀ ਸ਼ਿਕਾਇਤ ਕੀਤੀ ਸੀ।
ਯਾਦ ਰਹੇ ਇਨਕਵੈਸਟ ਦੌਰਾਨ ਜਿਊਰੀ ਕੋਲ ਸਬੂਤ ਅਤੇ ਗਵਾਹ ਪੇਸ਼ ਹੋਣਗੇ ਅਤੇ ਫਿਰ ਜਿਊਰੀ ਕੋਲ ਮੌਕਾ ਹੋਵੇਗਾ ਕਿ ਅਜਿਹੀਆਂ ਮੌਤਾਂ 'ਚ ਬਚਾਅ ਲਈ ਸਿਫਾਰਸ਼ਾਂ ਪੇਸ਼ ਕੀਤੀਆਂ ਜਾ ਸਕਣ।
ਯਾਦ ਰਹੇ ਇਹ ਇਨਕਵੈਸਟ ਅਜਿਹੇ ਸਮੇਂ ਕੀਤੀ ਜਾ ਰਹੀ ਹੈ ਜਦ ਕੁਝ ਹੀ ਮਹੀਨੇ ਪਹਿਲਾਂ ਅਫ਼ਸਰ ਦੇ ਪਰਿਵਾਰ ਨੇ ਵੀ.ਪੀ.ਡੀ. ਖਿਲਾਫ ਮੁਕੱਦਮਾ ਕੀਤਾ ਹੈ ਕਿ ਅਸੁਰੱਖਿਅਤ ਕੰਮ ਦੇ ਮਾਹੌਲ ਕਾਰਨ ਅਤੇ ਮਾੜੀਆਂ ਨੀਤੀਆਂ ਕਾਰਨ ਕਾਂਸਟੇਬਲ ਚੈਨ ਨੂੰ ਜਿਨਸੀ ਹਮਲੇ ਅਤੇ ਸ਼ੋਸ਼ਣ ਦਾ ਸਾਹਮਣਾ ਕਰਨਾ ਪਿਆ।
ਮੁਕੱਦਮੇ 'ਚ ਕਾਂਸਟੇਬਲ ਦੇ 2 ਸੀਨੀਅਰ ਅਫਸਰਾਂ ਦਾ ਨਾਮ ਵੀ ਦਿੱਤਾ ਗਿਆ ਹੈ ਜਿੰਨਾ ਨਾਲ ਉਸ ਦੇ ਕਥਿਤ ਰਿਸ਼ਤੇ ਸਨ।
ਦੋਵਾਂ ਅਫਸਰਾਂ ਸਾਰਜੈਂਟ ਗਰੈਗ ਮੈਕੂਲੋ ਅਤੇ ਸਾਰਜੈਂਟ ਡੇਵਿਡ ਵੈਨ ਪੈਟਨ ਨੇ ਵੀ.ਪੀ.ਡੀ. ਛੱਡ ਦਿੱਤੀ ਹੈ।
ਸਾਰਜੈਂਟ ਮੈਕੂਲੋ ਨੇ ਅਸਤੀਫਾ ਦੇ ਦਿੱਤਾ ਸੀ ਅਤੇ ਵੈਨ ਪੈਟਨ ਨੂੰ ਡਿਸਮਿਸ ਕਰ ਦਿੱਤਾ ਗਿਆ ਸੀ।
