ਸਾਈਬਰ ਅਟੈਕ ਤੋਂ ਬਾਅਦ ਸੀ.ਆਰ.ਏ. ਵਲੋਂ ਅਸਥਾਈ ਤੌਰ ਤੇ ਹਜ਼ਾਰਾਂ ਅਕਾਊਂਟ ਰੱਦ

ਫੈਡਰਲ ਸਰਕਾਰ ਮੁਤਾਬਕ ਹੈਕਰਾਂ ਵੱਲੋਂ ਸਰਕਾਰੀ ਸੇਵਾਵਾਂ ਲਈ ਅਰਜ਼ੀਆਂ ਵਾਸਤੇ, ਚੋਰੀ ਕੀਤੇ ਗਏ 9,000 ਤੋਂ ਵੱਧ ਯੂਜ਼ਰ ਨੇਮ ਅਤੇ ਪਾਸਵਰਡ ਇਸਤੇਮਾਲ ਕੀਤੇ ਗਏ ਅਤੇ ਨਾਲ ਹੀ ਕੈਨੇਡਾ ਰੈਵੇਨਿਊ ਏਜੰਸੀ ਦੇ 5,600 ਅਕਾਊਂਟਾਂ ਨੂੰ ਨਿਸ਼ਾਨਾ ਬਣਾਇਆ ਗਿਆ।

ਟ੍ਰੈਜ਼ਰੀ ਬੋਰਡ ਆਫ ਕੈਨੇਡਾ ਮੁਤਾਬਕ ਅਕਾਊਂਟਾਂ ਨੂੰ ਅਸਥਾਈ ਤੌਰ ਤੇ ਰੱਦ ਕਰ ਦਿੱਤਾ ਗਿਆ ਹੈ ਅਤੇ ਆਰ.ਸੀ.ਐਮ.ਪੀ. ਵੱਲੋਂ ਇਹ ਪਤਾ ਕਰਨ ਲਈ ਜਾਂਚ ਕੀਤੀ ਜਾ ਰਹੀ ਹੈ ਕਿ ਇਸ ਹਮਲੇ ਕਾਰਨ ਕਿਸੇ ਤਰ੍ਹਾਂ ਦੀ ਪ੍ਰਾਇਵੇਸੀ ਬ੍ਰੀਚ ਜਾਂ ਜਾਣਕਾਰੀ ਚੋਰੀ ਕੀਤੀ ਗਈ ਜਾਂ ਨਹੀਂ।

ਸਰਕਾਰ ਦੇ ਮੁਤਾਬਕ, ਬੁੱਧਵਾਰ ਤੱਕ ਸਾਰੀਆਂ ਔਨਲਾਈਨ ਸੇਵਾਵਾਂ ਨੂੰ ਬਹਾਲ ਕਰ ਦਿੱਤਾ ਜਾਵੇਗਾ।

ਹੈਕ ਕੀਤੇ ਗਏ 9,000 ਅਕਾਊਂਟ ਰੱਦ ਕਰ ਦਿੱਤੇ ਗਏ ਹਨ ਅਤੇ ਤਕਰੀਬਨ 3,000 ਅਕਾਊਂਟ ਜੋ ਸਰਕਾਰੀ ਸੇਵਾਵਾਂ ਪ੍ਰਾਪਤ ਕਰਨ ਵਿੱਚ ਸਫਲ ਰਹੇ ਹਨ, ਦੀ ਤਫਤੀਸ਼ ਕੀਤੀ ਜਾ ਰਹੀ ਹੈ।

ਸਰਕਾਰ ਅਨੁਸਾਰ ਉਹ 5,600 ਸੀ.ਆਰ.ਏ. ਅਕਾਊਂਟ ਜਿਨ੍ਹਾਂ ਨੂੰ ਵੱਖਰੇ ਤੌਰ ਤੇ ਨਿਸ਼ਾਨਾ ਬਣਾਇਆ ਗਿਆ ਸੀ ਨੂੰ ਵੀ ਰੱਦ ਕਰ ਦਿੱਤਾ ਗਿਆ ਹੈ ਅਤੇ ਸਬੰਧਤ ਵਿਅਕਤੀਆਂ ਨੂੰ ਸੰਪਰਕ ਕਰ ਦਿੱਤਾ ਗਿਆ ਹੈ।

ਇਨ੍ਹਾਂ ਸਾਈਬਰ ਹਮਲਿਆਂ ਵਿੱਚ ‘ਕ੍ਰਿਡੇਂਸ਼ਲ ਸਟਫਿੰਗ’ ਨਾਂ ਦੀ ਤਕਨੀਕ ਦੀ ਵਰਤੋਂ ਕੀਤੀ ਗਈ ਜਿਸ ਵਿੱਚ ਉਸ ਸਿਸਟਮ ਨੂੰ ਨਿਸ਼ਾਨਾ ਬਣਾਇਆ ਗਿਆ ਜਿਸ ਦੀ ਵਰਤੋਂ 12 ਮਿਲੀਅਨ ਲੋਕਾਂ ਅਤੇ 30 ਫੈਡਰਲ ਵਿਭਾਗਾਂ ਵੱਲੋਂ ਕੀਤੀ ਜਾ ਰਹੀ ਹੈ।

ਸਰਕਾਰ ਅਨੁਸਾਰ ਹਮਲਾਵਰਾਂ ਵੱਲੋਂ ਵੱਖ ਵੱਖ ਵੈੱਬਸਾਈਟਾਂ ਤੋਂ ਪਾਸਵਰਡ ਅਤੇ ਯੂਜ਼ਰਨੇਮ ਇਕੱਠੇ ਕੀਤੇ ਗਏ ਸਨ ਅਤੇ ਇਸ ਗੱਲ ਦਾ ਫਾਇਦਾ ਚੁੱਕਿਆ ਗਿਆ ਕਿ ਜ਼ਿਆਦਾਤਰ ਲੋਕ ਆਪਣੇ ਪਾਸਵਰਡ ਅਤੇ ਯੂਜ਼ਰ ਨੇਮ ਦੀ ਵਰਤੋਂ ਵਾਰ ਵਾਰ ਕਰਦੇ ਹਨ।