ਕੈਨੇਡਾ ਵਿਚ ਚੀਨ ਅਤੇ ਰੂਸ ਦੇ ਏਜੰਟ ਐਕਟਿਵ ਹੋ ਰਹੇ ਹਨ: ਡੈਨ ਰੌਜਰਜ਼

ਕੈਨੇਡਾ ਸਕਿਓਰਿਟੀ ਇੰਟੈਲੀਜੈਂਸ ਸਰਵਿਸ ਦੇ ਹੈੱਡ ਡੈਨ ਰੌਜਰਜ਼ ਨੇ ਕੈਨੇਡਾ ਵਿਚ ਚੀਨ ਅਤੇ ਰੂਸ ਦੇ ਏਜੰਟ ਐਕਟਿਵ ਹੋਣ ਦੀ ਚਿਤਾਵਨੀ ਦਿੱਤੀ ਹੈ। ਜਾਣਕਾਰੀ ਮੁਤਾਬਕ, ਇਹ ਏਜੰਟਸ ਕੈਨੇਡਾ ਦੀ ਸਰਕਾਰੀ ਅਤੇ ਨਿੱਜੀ ਖੇਤਰ ਦੀ ਸੰਵੇਦਨਸ਼ੀਲ ਜਾਣਕਾਰੀ ਅਤੇ ਆਰਕਟਿਕ ਖੇਤਰ ਵਿਚ ਰਣਨੀਤਿਕ ਪਹੁੰਚ ਪ੍ਰਾਪਤ ਕਰਨ ਲਈ ਲਗਾਤਾਰ ਕੋਸ਼ਿਸ਼ ਕਰ ਰਹੇ ਹਨ।

ਚੀਨ ਬਾਰੇ ਇਹ ਚਿਤਾਵਨੀ ਉਦੋਂ ਆਈ ਹੈ ਜਦੋਂ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਬੀਜਿੰਗ ਨਾਲ ਸਬੰਧਾਂ ਨੂੰ ਸੁਧਾਰਨ ਲਈ ਡਿਪਲੋਮੈਟਿਕ ਯਤਨ ਸ਼ੁਰੂ ਕੀਤੇ ਹਨ, ਜਿਸ ਵਿਚ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਦੇ ਸੱਦੇ 'ਤੇ ਅਗਲੇ ਸਾਲ ਬੀਜਿੰਗ ਦੌਰੇ 'ਤੇ ਜਾਣਾ ਵੀ ਸ਼ਾਮਲ ਹੈ।

ਉਥੇ ਹੀ, ਭਾਰਤ ਬਾਰੇ ਟਿੱਪਣੀ 'ਤੇ ਸੀ.ਐਸ.ਆਈ.ਐਸ. ਹੈੱਡ ਨੇ ਕਿਹਾ ਕਿ ਅਸੀਂ ਲਗਾਤਾਰ ਚੌਕਸ ਹਾਂ। ਰੌਜਰਜ਼ ਨੇ ਕਿਹਾ ਕਿ ਅਸੀਂ ਆਪਣੇ ਭਾਰਤੀ ਹਮਰੁਤਬਾ ਨਾਲ ਮੁਲਾਕਾਤ ਕੀਤੀ ਹੈ ਤੇ ਭਾਰਤ ਨਾਲ ਸਾਡੇ ਰਿਸ਼ਤੇ ਅੱਗੇ ਵਧ ਰਹੇ ਹਨ ਅਤੇ ਅਸੀਂ ਇਹ ਰਿਸ਼ਤਾ ਇਸ ਤਰ੍ਹਾਂ ਬਣਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਾਂ ਜਿਸ ਨਾਲ ਇਹ ਯਕੀਨੀ ਹੋ ਸਕੇ ਕੈਨੇਡੀਅਨ ਨੈਸ਼ਨਲ ਸਕਿਓਰਿਟੀ ਸੇਫ ਹੈ।

ਸੀ.ਐਸ.ਆਈ.ਐਸ. ਹੈੱਡ ਨੇ ਕੈਨੇਡਾ ਲਈ ਖਤਰਿਆਂ 'ਤੇ ਆਪਣੀ ਸਾਲਾਨਾ ਸਪੀਚ ਵਿਚ ਅੱਗੇ ਕਿਹਾ ਕਿ ਚੀਨੀ ਜਾਸੂਸ ਨੇ ਜਾਣਕਾਰੀ ਅਤੇ ਫੌਜੀ ਮੁਹਾਰਤ ਵਾਲੇ ਕੈਨੇਡੀਅਨਜ਼ ਨੂੰ ਹਾਇਰ ਕਰਨ ਦੀ ਵੀ ਕੋਸ਼ਿਸ਼ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਰੂਸ ਅਤੇ ਚੀਨ ਦੀ ਕੈਨੇਡਾ ਦੇ ਆਰਕਟਿਕ ਖੇਤਰ ਵਿਚ ਮਹੱਤਵਪੂਰਨ ਖੁਫੀਆ ਦਿਲਚਸਪੀ ਹੈ।