ਕੈਨੇਡਾ ਅਤੇ ਅਮਰੀਕਾ ਵਿਚਕਾਰ ਟਰੇਡ ਵਾਰ ਹੋਈ ਸ਼ੁਰੂ

ਕੈਨੇਡਾ ਅਤੇ ਅਮਰੀਕਾ ਵਿਚਕਾਰ ਟਰੇਡ ਵਾਰ ਸ਼ੁਰੂ ਹੋ ਗਈ ਹੈ। ਰਾਸ਼ਟਰਪਤੀ ਡੋਨਲਡ ਟਰੰਪ ਵਲੋਂ ਕੈਨੇਡੀਅਨ ਮਾਲ 'ਤੇ 25 ਫੀਸਦੀ ਟੈਰਿਫ ਲਗਾਏ ਜਾਣ ਤੋਂ ਬਾਅਦ ਕੈਨੇਡਾ ਨੇ $30-ਬਿਲੀਅਨ ਦੇ ਅਮਰੀਕੀ ਸਾਮਾਨ 'ਤੇ ਟੈਰਿਫ ਲਗਾ ਕੇ ਜਵਾਬੀ ਹਮਲਾ ਕੀਤਾ ਹੈ। ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਕਿਹਾ ਹੈ ਕਿ 21 ਦਿਨਾਂ ਵਿੱਚ ਇਸ ਟੈਰਿਫ ਦਾ ਵਿਸਥਾਰ $155 ਬਿਲੀਅਨ ਦੇ ਅਮਰੀਕੀ ਸਮਾਨਾਂ ਤੱਕ ਕਰ ਦਿੱਤਾ ਜਾਵੇਗਾ।

ਦੋਵੇਂ ਸਾਥੀ ਮੁਲਕਾਂ ਵਿਚਕਾਰ ਟਰੇਡ ਵਾਰ ਸ਼ੁਰੂ ਹੋਣ ਤੋਂ ਬਾਅਦ ਮੰਗਲਵਾਰ ਸਵੇਰ ਓਨਟਾਰੀਓ ਦੇ ਵਿੰਡਸਰ ਅਤੇ ਅਮਰੀਕਾ ਦੇ ਸ਼ਹਿਰ ਡੀਟ੍ਰੋਇਟ ਵਿਚਕਾਰ ਮੁੱਖ ਲਾਂਘੇ ਅੰਬੈਸਡਰ ਬ੍ਰਿਜ ਦੇ ਦੋਵੇਂ ਪਾਸੇ ਟਰੱਕਾਂ ਦੀਆਂ ਲੰਮੀਆਂ ਕਤਾਰਾਂ ਲੱਗ ਗਈਆਂ, ਇਹ ਉੱਤਰੀ ਅਮਰੀਕਾ ਦੀ ਸਭ ਤੋਂ ਵੱਧ ਵਿਅਸਤ ਅੰਤਰਰਾਸ਼ਟਰੀ ਕਰਾਸਿੰਗ ਹੈ, ਜਿਸ ਰਾਹੀਂ ਹਰ ਰੋਜ਼ ਸਬਜ਼ੀਆਂ ਤੋਂ ਲੈ ਕੇ ਆਟੋਮੋਟਿਵ ਪਾਰਟਸ ਤੱਕ ਕਰੀਬ $329-ਮਿਲੀਅਨ ਦੇ ਉਤਪਾਦ ਦਾ ਵਪਾਰ ਹੁੰਦਾ ਹੈ ਅਤੇ ਇਹ ਦੋਵੇਂ ਦੇਸ਼ਾਂ ਵਿਚਕਾਰ ਲਗਭਗ ਇੱਕ ਤਿਹਾਈ ਵਪਾਰ ਨੂੰ ਹੈਂਡਲ ਕਰਦਾ ਹੈ।

ਰਿਪੋਰਟਸ ਦੀ ਮੰਨੀਏ ਤਾਂ ਅਗਲੇ 24 ਘੰਟੇ ਇਸ ਸਰਹੱਦ ਪਾਰ ਅਤੇ ਦੋਵਾਂ ਪਾਸਿਆਂ 'ਤੇ ਰਹਿਣ ਵਾਲੇ ਲੋਕਾਂ ਲਈ ਭੰਬਲਭੂਸੇ ਅਤੇ ਪ੍ਰੇਸ਼ਾਨੀ ਵਾਲੇ ਰਹਿਣ ਵਾਲੇ ਹਨ। ਗੌਰਤਲਬ ਹੈ ਕਿ ਟਰੰਪ ਨੇ ਸਾਰੇ ਕੈਨੇਡੀਅਨ ਇੰਪੋਰਟਸ 'ਤੇ 25 ਫੀਸਦੀ ਟੈਰਿਫ ਤੋਂ ਇਲਾਵਾ ਕੈਨੇਡਾ ਦੇ ਤੇਲ, ਗੈਸ ਅਤੇ ਖਣਿਜਾਂ ਨੂੰ 10 ਫੀਸਦੀ ਟੈਰਿਫਸ ਨਾਲ ਟਾਰਗੇਟ ਕੀਤਾ ਹੈ।