ਕੈਨੇਡਾ ਆਪਣੇ ਰੱਖਿਆ ਖ਼ਰਚ ਨੂੰ ਵਧਾਉਣ ਲਈ ਕਰੜੀ ਮਿਹਨਤ ਕਰ ਰਿਹਾ: ਬਿਲ ਬਲੇਅਰ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੇ ਰੱਖਿਆ ਮੰਤਰੀ ਬਿਲ ਬਲੇਅਰ ਦਾ ਕਹਿਣਾ ਹੈ ਕਿ ਕੈਨੇਡਾ ਆਪਣੇ ਰੱਖਿਆ ਖ਼ਰਚ ਨੂੰ ਵਧਾਉਣ ਲਈ ਕਰੜੀ ਮਿਹਨਤ ਕਰ ਰਿਹਾ ਹੈ, ਤਾਂ ਜੋ ਨਾਟੋ ਦੇ ਹਿੱਸੇ ਦੇ ਰੂਪ ਵਿਚ ਜੀ. ਡੀ. ਪੀ. ਦੇ ਦੋ ਫੀਸਦੀ ਦੇ ਬਰਾਬਰ ਖ਼ਰਚ ਟਾਰਗੇਟ ’ਤੇ ਪਹੁੰਚਿਆ ਜਾ ਸਕੇ। ਬਲੇਅਰ ਨੇ ਇਹ ਟਿੱਪਣੀ ਬ੍ਰਸੇਲਜ਼ ਵਿਚ ਕੀਤੀ, ਜਿੱਥੇ ਉਹ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨਾਲ ਨਾਟੋ ਸਹਿਯੋਗੀਆਂ ਅਤੇ ਯੂਕਰੇਨ ਰੱਖਿਆ ਸੰਪਰਕ ਸਮੂਹ ਨਾਲ ਬੈਠਕ ਵਿਚ ਸ਼ਾਮਲ ਹੋਏ ਸਨ।

ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਲਡ ਟਰੰਪ ਦੀ ਇਹ ਸ਼ਿਕਾਇਤ ਰਹੀ ਹੈ ਕਿ ਕੈਨੇਡਾ ਨਾਟੋ ਖਰਚ ਦੀਆਂ ਆਪਣੀਆਂ ਵਚਨਬੱਧਤਾਵਾਂ ਨੂੰ ਪੂਰਾ ਨਹੀਂ ਕਰ ਰਿਹਾ, ਇਸ ਲਈ ਉਹ ਕੈਨੇਡਾ ਨੂੰ ਕਈ ਵਾਰ 51ਵਾਂ ਸੂਬਾ ਬਣਾਉਣ ਅਤੇ ਟੈਰਿਫ ਦੀ ਧਮਕੀ ਦੇ ਚੁੱਕੇ ਹਨ।

ਕੈਨੇਡਾ ਦੇ ਰੱਖਿਆ ਮੰਤਰੀ ਨੇ ਕਿਹਾ ਕਿ ਟਰੰਪ ਦੀਆਂ ਕੈਨੇਡਾ ਨੂੰ ਅਮਰੀਕਾ ਵਿਚ ਮਿਲਾਉਣ ਦੀਆਂ ਟਿੱਪਣੀਆਂ ਅਪਮਾਨਜਨਕ ਅਤੇ ਚਿੰਤਾਜਨਕ ਹਨ। ਉਨ੍ਹਾਂ ਕਿਹਾ ਕਿ ਕੈਨੇਡਾ ਅਤੇ ਅਮਰੀਕਾ ਨੇ ਮਹਾਦੀਪੀ ਰੱਖਿਆ ਲਈ ਨੋਰਾਡ ਵਿਚ ਇਕੱਠੇ ਮਿਲ ਕੇ ਕੰਮ ਕੀਤਾ ਹੈ ਅਤੇ ਇਸ ਗਠਜੋੜ ਦੇ ਆਧੁਨਿਕੀਕਰਨ ਕੈਨੇਡਾ ਲਗਭਗ $38.6 ਬਿਲੀਅਨ ਯੋਗਦਾਨ ਦੇ ਰਿਹਾ ਹੈ।