ਦਿੱਲੀ ਪੁਲਿਸ ਵੱਲੋਂ ਗਣਤੰਤਰ ਦਿਹਾੜੇ 'ਤੇ ਹੋਈ ਹਿੰਸਾ ਦੇ ਦੋ ਮੁੱਖ ਕਥਿਤ ਦੋਸ਼ੀਆਂ ਨੂੰ ਕੀਤਾ ਗਿਆ ਗਿਰਫ਼ਤਾਰ

ਦਿੱਲੀ ਪੁਲਿਸ ਦੀ ਕ੍ਰਾਈਮ ਬ੍ਰਾਂਚ ਵੱਲੋਂ ਗਣਤੰਤਰ ਦਿਹਾੜੇ 'ਤੇ ਲਾਲ ਕਿਲੇ 'ਚ ਹੋਈ ਹਿੰਸਾ ਦੇ ਦੋ ਮੁੱਖ ਕਥਿਤ ਦੋਸ਼ੀਆਂ ਨੂੰ ਜੰਮੂ ਤੋਂ ਗਿਰਫ਼ਤਾਰ ਕੀਤਾ ਗਿਆ ਹੈ|

ਦੋਵਾਂ 'ਚੋ ਇੱਕ, 45 ਸਾਲਾ ਮਹਿੰਦਰ ਸਿੰਘ, ਜੰਮੂ ਦੇ ਸਤਬਾੜੀ ਤੋਂ ਹੈ|

ਉਹ ਕਸ਼ਮੀਰ ਯੂਨਾਈਟਡ ਫਰੰਟ ਜਥੇਬੰਦੀ ਦਾ ਪ੍ਰਧਾਨ ਹੈ ਅਤੇ ਲਾਲ ਕਿਲੇ 'ਚ ਹੋਈ ਹਿੰਸਾ ਦੇ ਮਾਮਲੇ 'ਚ ਮੁੱਖ ਸਾਜ਼ਿਸ਼ ਘਾੜਿਆਂ 'ਚੋਂ ਹੈ|

ਪੁਲਿਸ ਮੁਤਾਬਕ ਦੂਜਾ ਕਥਿਤ ਮੁੱਖ ਦੋਸ਼ੀ,ਮਨਦੀਪ ਸਿੰਘ, ਜੰਮੂ ਦੇ ਗੋਲੇ ਗੁਜਰਾਲ ਤੋਂ ਹੈ|

ਉਨ੍ਹਾਂ ਨੂੰ ਭਾਰਤੀ ਪੀਨਲ ਕੋਡ ਦੀਆਂ 308, 395, 120ਬੀ ਅਤੇ ਹਥਿਆਰ ਐਕਟ ਦੀ ਧਾਰਾ 25/27 ਤੋਂ ਅਲਾਵਾ ਕਈ ਧਾਰਾਵਾਂ ਦੇ ਤਹਿਤ ਗਿਰਫ਼ਤਾਰ ਕੀਤਾ ਗਿਆ ਹੈ|

ਦਿੱਲੀ ਪੁਲਿਸ ਤੋਂ ਮਿਲੀ ਜਾਣਕਾਰੀ ਮੁਤਾਬਕ ਉਨ੍ਹਾਂ ਦੋਵਾਂ ਨੂੰ ਜੰਮੂ ਅਤੇ ਕਸ਼ਮੀਰ ਦੀ ਪੁਲਿਸ ਦੀ ਮਦਦ ਨਾਲ ਫੜਿਆ ਗਿਆ ਹੈ|

ਦੱਸਣਯੋਗ ਹੈ ਕਿ ਸੋਮਵਾਰ ਨੂੰ ਦਿੱਲੀ ਪੁਲਿਸ ਨੇ ਗਣਤੰਤਰ ਦਿਹਾੜੇ 'ਤੇ ਲਾਲ ਕਿਲੇ 'ਚ ਹੋਈ ਹਿੰਸਾ ਦੌਰਾਨ ਗੁੰਬਦ 'ਤੇ ਚੜ੍ਹੇ ਹੋਏ ਵੇਖੇ ਗਏ ਜਸਪ੍ਰੀਤ ਸਿੰਘ ਨੂੰ ਵੀ ਗਿਰਫ਼ਤਾਰ ਕੀਤਾ ਹੈ|

ਜ਼ਿਕਰਯੋਗ ਹੈ ਕਿ ਗਣਤੰਤਰ ਦਿਹਾੜੇ 'ਤੇ ਵਿਖਾਵਾਕਾਰੀਆਂ ਵੱਲੋਂ ਪਹਿਲਾਂ ਤੋਂ ਤੈਅ ਰੂਟ 'ਤੇ ਨਾ ਚੱਲ ਕੇ ਦਿੱਲੀ 'ਚ ਦਾਖ਼ਲ ਹ੍ਹੋ ਕੇ ਬੈਰੀਕੇਡ ਤੋੜੇ ਗਏ, ਪੁਲਿਸ ਨਾਲ ਝੜਪਾਂ ਹੋਈਆਂ ਅਤੇ ਟ੍ਰੈਕਟਰ ਰੈਲੀ ਦੌਰਾਨ ਕੌਮੀ ਰਾਜਧਾਨੀ ਦੇ ਕਈ ਹਿੱਸਿਆਂ 'ਚ ਜਨਤਕ ਸੰਪੱਤੀ ਨੂੰ ਨੁਕਸਾਨ ਪਹੁੰਚਾਇਆ ਗਿਆ|

ਉਹਨਾਂ ਵੱਲੋਂ ਲਾਲ ਕਿਲੇ ਅੰਦਰ ਜਾ ਕੇ ਫ਼ਸੀਲ ਤੋਂ ਆਪਣਾ ਝੰਡਾ ਲਹਿਰਾਇਆ ਗਿਆ|