24.9C Vancouver 24.9C VancouverApr 19, 2021 8:51 AM -
"ਕੋਵਿਡ-19 ਦੇ ਵਧਦੇ ਮਾਮਲਿਆਂ ਨੂੰ ਕਾਬੂ ਕਰਨ ਲਈ,ਕੌਮੀ ਰਾਜਧਾਨੀ ਵਿੱਚ ਪੂਰੀ ਤਰਾਂ 6 ਦਿਨਾਂ ਦਾ 'ਕੋਰੋਨਾ ਲੌਕਡਾਊਨ' ਲਾ ਦਿੱਤਾ ਗਿਆ ਹੈ," ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਸੋਮਵਾਰ ਨੂੰ ਆਖਿਆ।
ਉਹਨਾਂ ਅੱਗੇ ਆਖਿਆ ਕਿ ਲੌਕਡਾਊਨ ਅੱਜ ਰਾਤ 10 ਵਜੇ ਤੋਂ 26 ਅਪ੍ਰੈਲ ਸਵੇਰੇ 5 ਵਜੇ ਤੱਕ ਲਾਇਆ ਜਾਵੇਗਾ।
ਦੱਸਣਯੋਗ ਹੈ ਕਿ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਅਤੇ ਲੈਫਟੀਨੈਂਟ ਗਵਰਨਰ ਅਨਿਲ ਬੈਜਲ ਨੇ ਅੱਜ ਇੱਕ ਬੈਠਕ ਕਰਕੇ ਇਹ ਐਲਾਨ ਕੀਤਾ ਹੈ।
ਸੂਤਰਾਂ ਮੁਤਾਬਕ, ਇਸ ਦੌਰਾਨ ਸਾਰੇ ਪ੍ਰਾਈਵੇਟ ਦਫਤਰਾਂ ਵਾਲੇ ਘਰੋਂ ਕੰਮ ਕਰਨਗੇ ਅਤੇ ਸਿਰਫ ਸਰਕਾਰੀ ਦਫਤਰ ਤੇ ਜ਼ਰੂਰੀ ਸੇਵਾਵਾਂ ਹੀ ਖੁੱਲੀਆਂ ਰਹਿਣਗੀਆਂ।
ਉਨ੍ਹਾਂ ਦੱਸਿਆ ਕਿ ਲੈਫਟੀਨੈਂਟ ਗਵਰਨਰ ਨੇ ਪਰਵਾਸੀ ਮਜ਼ਦੂਰਾਂ ਦੇ ਮੁੱਦੇ ਨਾਲ ਨਜਿੱਠਣ ਲਈ ਵੀ ਹਦਾਇਤਾਂ ਦਿੱਤੀਆਂ ਹਨ।
ਗ਼ੌਰਤਲਬ ਹੈ ਕਿ ਕੌਮੀ ਰਾਜਧਾਨੀ ਵਿੱਚ ਬੀਤੇ ਹਫ਼ਤੇ ਵੀ 16 ਅਪ੍ਰੈਲ ਤੋਂ 19 ਅਪ੍ਰੈਲ ਤੱਕ ਰਾਤ 10 ਵਜੇ ਤੋਂ ਸਵੇਰੇ 6 ਵਜੇ ਤੱਕ ਹਫ਼ਤੇ ਦੇ ਅਖ਼ੀਰ 'ਚ ਕਰਫਿਊ ਲਾਇਆ ਗਿਆ ਸੀ ਅਤੇ ਸਾਰੇ ਮਾਲ, ਕਸਰਤ ਦੇ ਜਿਮ ਤੇ ਆਡੀਟੋਰੀਅਮ ਕੋਵਿਡ-19 ਦੇ ਵਧਦੇ ਮਾਮਲਿਆਂ ਕਰਕੇ 30 ਅਪ੍ਰੈਲ ਤੱਕ ਬੰਦ ਕਰ ਦਿੱਤੇ ਗਏ ਸਨ।
