13.33C Vancouver 13.33C VancouverAug 28, 2025 5:25 PM - Connect Newsroom
ਕੈਨੇਡਾ ਪੋਸਟ ਅਤੇ ਲਗਭਗ 55,000 ਪੋਸਟਲ ਵਰਕਰ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਵਿਚਕਾਰ ਮਤਭੇਦ ਹੋਰ ਗਹਿਰਾ ਗਏ ਹਨ। ਕੈਨੇਡਾ ਪੋਸਟ ਨੇ ਬੀਤੇ ਕੱਲ੍ਹ ਗੱਲਬਾਤ ਤੋਂ ਬਾਅਦ ਯੂਨੀਅਨ 'ਤੇ ਵਰ੍ਹਦਿਆਂ ਉਸ ਦੀਆਂ ਤਾਜ਼ਾ ਮੰਗਾਂ ਨੂੰ ਅਸਮਰੱਥ ਦੱਸਿਆ ਹੈ। ਕ੍ਰਾਊਨ ਕਾਰਪੋਰੇਸ਼ਨ ਨੇ ਕਿਹਾ ਕਿ ਬਦਕਿਸਮਤੀ ਨਾਲ ਯੂਨੀਅਨ ਕਈ ਚੀਜ਼ਾਂ 'ਤੇ ਅੜੀ ਹੋਈ ਹੈ ਅਤੇ ਹੋਰ ਮੰਗਾਂ ਜੋੜ ਕੇ ਗੱਲਬਾਤ ਨੂੰ ਕਠੋਰ ਬਣਾ ਦਿੱਤਾ ਹੈ।
ਕੈਨੇਡਾ ਪੋਸਟ ਅਤੇ ਯੂਨੀਅਨ 18 ਮਹੀਨਿਆਂ ਤੋਂ ਨਵੇਂ ਕੰਟਰੈਕਟ 'ਤੇ ਪਹੁੰਚਣ ਲਈ ਸੰਘਰਸ਼ ਕਰ ਰਹੇ ਹਨ। ਕ੍ਰਾਊਨ ਕਾਰਪੋਰੇਸ਼ਨ ਨੇ ਕਿਹਾ ਕਿ ਯੂਨੀਅਨ ਦੇ ਕਈ ਪ੍ਰਸਤਾਵ ਉਸ ਦੀ ਓਪਰੇਸ਼ਨਲ ਕੋਸਟ ਨੂੰ ਵਧਾਉਣ ਵਾਲੇ ਹਨ, ਇਸ ਲਈ ਉਸ ਨੇ ਯੂਨੀਅਨ ਨੂੰ ਕੰਪਨੀ ਨੂੰ ਪੇਸ਼ ਆ ਰਹੀਆਂ ਵਿੱਤੀ ਹਕੀਕਤਾਂ ਅਨੁਸਾਰ ਆਪਣੀਆਂ ਨਵੀਨਤਮ ਮੰਗਾਂ 'ਤੇ ਮੁੜ ਵਿਚਾਰ ਕਰਨ ਦੀ ਅਪੀਲ ਕੀਤੀ ਹੈ।
ਗੌਰਤਲਬ ਹੈ ਕਿ ਪੋਸਟਲ ਵਰਕਰ ਯੂਨੀਅਨ ਮੰਗਾਂ ਨੂੰ ਲੈ ਕੇ ਪਹਿਲਾਂ 2024 ਦੇ ਅਖੀਰ ਵਿਚ ਇੱਕ ਮਹੀਨਾ ਹੜਤਾਲ 'ਤੇ ਰਹੀ ਸੀ,ਇਸ ਸਾਲ ਮਈ ਵਿਚ ਉਸ ਨੇ ਇੱਕ ਹੋਰ ਹੜਤਾਲ ਦਾ ਨੋਟਿਸ ਜਾਰੀ ਕੀਤਾ ਪਰ ਗੱਲਬਾਤ ਜਾਰੀ ਰਹਿਣ ਕਾਰਨ ਓਵਰਟਾਈਮ ਛੱਡਣ ਦਾ ਵਿਕਲਪ ਚੁਣਿਆ ਜੋ ਹੁਣ ਵੀ ਜਾਰੀ ਹੈ।
