ਕੈਨੇਡੀਅਨ ਮੈਡੀਕਲ ਐਸੋਸੀਏਸ਼ਨ ਨੇ ਟਰੂਡੋ ਸਰਕਾਰ ਨੂੰ ਪੂੰਜੀ ਲਾਭ ਟੈਕਸ ਤਬਦੀਲੀ ’ਤੇ ਮੁੜ ਵਿਚਾਰ ਕਰਨ ਨੂੰ ਕਿਹਾ

ਕੈਨੇਡੀਅਨ ਮੈਡੀਕਲ ਐਸੋਸੀਏਸ਼ਨ ਨੇ ਟਰੂਡੋ ਸਰਕਾਰ ਨੂੰ ਬਜਟ ਵਿਚ ਪੂੰਜੀ ਲਾਭ ਟੈਕਸ ਵਧਾਉਣ ਦੇ ਕੀਤੇ ਗਏ ਪ੍ਰਸਤਾਵ ਨੂੰ ਵਾਪਸ ਲੈਣ ਦੀ ਮੰਗ ਕੀਤੀ ਹੈ। ਐਸੋਸੀਏਸ਼ਨ ਦਾ ਕਹਿਣਾ ਹੈ ਕਿ ਇਸ ਨਾਲ ਡਾਕਟਰਾਂ ਨੂੰ ਇੱਕ ਮਹੱਤਵਪੂਰਨ ਮਾਲੀ ਝਟਕਾ ਲੱਗੇਗਾ ਅਤੇ ਕੁਝ ਲੋਕ ਇਸ ਪੇਸ਼ੇ ਤੋਂ ਬਾਹਰ ਹੋ ਸਕਦੇ ਹਨ।

ਹਾਲ ਹੀ ਦੇ ਬਜਟ ਵਿਚ ਸਰਕਾਰ ਨੇ ਪੂੰਜੀ ਲਾਭ ਟੈਕਸ ਨੂੰ ਮੌਜੂਦਾ ਦੇ 50 ਫੀਸਦੀ ਹਿੱਸੇ ਤੋਂ ਵਧਾ ਕੇ ਦੋ-ਤਿਹਾਈ ਇਨਕਮ ’ਤੇ ਲਗਾਉਣ ਦਾ ਪ੍ਰਸਤਾਵ ਕੀਤਾ ਹੈ। ਹਾਲਾਂਕਿ, ਵਿਅਕਤੀ ਲਈ ਪਹਿਲੇ $250,000 ਦੇ ਪੂੰਜੀ ਲਾਭ ’ਤੇ ਟੈਕਸ ਲਗਾਉਣ ਦੀ ਵਿਵਸਥਾ ਮੌਜੂਦਾ ਵਾਲੀ ਹੀ ਜਾਰੀ ਰਹੇਗੀ ਪਰ ਕਾਰਪੋਰੇਸ਼ਨਾਂ ਵਿਚ ਇਨਵੈਸਟਮੈਂਟ ਤੋਂ ਹੋਣ ਵਾਲੇ ਕਿਸੇ ਵੀ ਪੂੰਜੀ ਲਾਭ ਦੇ 67 ਫੀਸਦੀ ਹਿੱਸੇ ’ਤੇ ਟੈਕਸ ਲਾਗੂ ਹੋਵੇਗਾ।

ਕੈਨੇਡੀਅਨ ਮੈਡੀਕਲ ਐਸੋਸੀਏਸ਼ਨ ਦੀ ਮੁਖੀ ਕੈਥਲੀਨ ਰੌਸ ਨੇ ਕਿਹਾ ਕਿ ਬਹੁਤ ਸਾਰੇ ਡਾਕਟਰ ਰਿਟਾਇਰਮੈਂਟ ਲਈ ਆਪਣੀ ਕਾਰਪੋਰੇਸ਼ਨ ਵਿਚ ਇਨਵੈਸਟ ਕਰਦੇ ਹਨ ਅਤੇ ਨਵੀਂ ਟੈਕਸ ਵਿਵਸਥਾ ਨਾਲ ਉਨ੍ਹਾਂ ’ਤੇ ਮਾਲੀ ਬੋਝ ਵੱਧ ਜਾਵੇਗਾ। ਗੌਰਤਲਬ ਹੈ ਕਿ ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਅਤੇ ਸੂਬੇ ਦੇ ਮੈਡੀਕਲ ਐਸੋਸੀਏਸ਼ਨ ਨੇ ਵੀ ਨਵੀਂ ਟੈਕਸ ਤਬਦੀਲੀ ਨੂੰ ਲੈ ਕੇ ਚਿੰਤਾਵਾਂ ਜ਼ਾਹਰ ਕੀਤੀਆਂ ਹਨ।