ਐਲਬਰਟਾ ਦੇ ਜੈਸਪਰ ਵਿਚ ਮੀਂਹ ਪੈਣ ਕਾਰਨ ਜੰਗਲੀ ਅੱਗ ਦੀ ਰਫ਼ਤਾਰ ਘਟੀ

ਐਲਬਰਟਾ ਦੇ ਜੈਸਪਰ ਵਿਚ ਮੀਂਹ ਪੈਣ ਕਾਰਨ ਜੰਗਲੀ ਅੱਗ ਦੀ ਰਫਤਾਰ ਕੁਝ ਹੌਲੀ ਹੋ ਗਈ ਹੈ ਪਰ ਅਜੇ ਵੀ ਇਹ ਬਲ ਰਹੀ ਹੈ। ਪਾਰਕਸ ਕੈਨੇਡਾ ਨੇ ਇਸ ਬਾਰੇ ਗੱਲ ਕਰਦਿਆਂ ਦੱਸਿਆ ਕਿ ਸ਼ੁੱਕਰਵਾਰ ਰਾਤ 30 ਮਿਲੀਮੀਟਰ ਮੀਂਹ ਪਿਆ, ਜਿਸ ਕਾਰਨ ਅੱਗ ਦੀ ਰਫਤਾਰ ਥੋੜ੍ਹੀ-ਬਹੁਤ ਘਟੀ ਹੈ। ਉਨ੍ਹਾਂ ਦੱਸਿਆ ਕਿ ਅੱਗ ਨਾਲ ਸੜੇ ਹੋਏ ਦਰੱਖਤਾਂ ਕੋਲੋਂ ਮੀਂਹ ਕਾਰਨ ਮਿੱਟੀ ਖਿਸਕ ਸਕਦੀ ਹੈ ਅਤੇ ਤੇਜ਼ ਹਵਾਵਾਂ ਨਾਲ ਇਹ ਡਿੱਗ ਸਕਦੇ ਹਨ। ਇਸ ਲਈ ਇੱਥੇ ਵਧੇਰੇ ਧਿਆਨ ਦੇਣ ਦੀ ਜ਼ਰੂਰਤ ਹੈ।

ਦੱਸ ਦਈਏ ਕਿ ਜੈਸਪਰ ਨੈਸ਼ਨਲ ਪਾਰਕ ਅਤੇ ਟਾਊਨ ਨੂੰ ਫਿਲਹਾਲ ਵਿਜ਼ਟਰਜ਼ ਲਈ ਬੰਦ ਰੱਖਿਆ ਗਿਆ ਹੈ ਜਦਕਿ ਹਾਈਵੇਅ 16 ਨੂੰ ਖੋਲ੍ਹ ਦਿੱਤਾ ਗਿਆ ਹੈ। ਪਿਛਲੇ ਹਫਤੇ ਆਈਸਫੀਲਡ ਪਾਰਕਵੇਅ ਨੂੰ ਵੀ ਖੋਲ੍ਹ ਦਿੱਤਾ ਗਿਆ ਹੈ। ਹੌਲੀ-ਹੌਲੀ ਜਨਜੀਵਨ ਮੁੜ ਲੀਹਾਂ ’ਤੇ ਆ ਰਿਹਾ ਹੈ।

ਪਾਰਕਸ ਕੈਨੇਡਾ ਦੇ ਔਫੀਸ਼ੀਅਲਜ਼ ਨੇ ਦੱਸਿਆ ਕਿ ਖਤਰਾ ਬਣੇ ਦਰੱਖਤਾਂ ਨਾਲ ਘਿਰਿਆ ਹਾਈਵੇਅ ਸਿਰਫ ਵਾਹਨ ਸਵਾਰਾਂ ਲਈ ਸੁਰੱਖਿਅਤ ਰੂਟ ਹੈ । ਸਾਈਕਲ ਚਲਾਉਣ ਵਾਲਿਆਂ ਜਾਂ ਸੈਰ ਕਰਨ ਵਾਲਿਆਂ ਲਈ ਸਿਰਫ ਟਾਊਨਸਾਈਟ ਅਤੇ ਪਿਰਾਮਿਡ ਲੇਕ ਰੋਡ ਹੀ ਸੁਰੱਖਿਅਤ ਹਨ। ਔਫੀਸ਼ੀਅਲਜ਼ ਨੇ ਜਾਣਕਾਰੀ ਦਿੱਤੀ ਕਿ ਹੁਣ ਉਹ ਰੋਜ਼ਾਨਾ ਦੀ ਨਹੀਂ ਸਗੋਂ ਹਫਤੇ ਦੀ ਅਪਡੇਟ ਹੀ ਸਾਂਝੀ ਕਰਨਗੇ।