15.21C Vancouver 15.21C VancouverMay 6, 2024 5:28 PM - Connect Newsroom
ਵੈਨਕੂਵਰ ਦੇ ਰਿਟੇਲਰ ਲੰਡਨ ਡਰੱਗਜ਼ ਵਲੋਂ ਆਪਣੇ ਸਟੋਰਾਂ ਨੂੰ ਪੜਾਅਵਾਰ ਦੁਬਾਰਾ ਖੋਲ੍ਹਿਆ ਜਾ ਰਿਹਾ ਹੈ ਜੋ ਪਿਛਲੇ ਲਗਭਗ 1 ਹਫਤੇ ਤੋਂ ਬੰਦ ਸਨ। ਰਿਟੇਲਰ ਦਾ ਕਹਿਣਾ ਹੈ ਕਿ ਮੈਟਰੋ ਵੈਨਕੂਵਰ ਅਤੇ ਫਰੇਜ਼ਰ ਵੈਲੀ ਦੇ 17 ਸਟੋਰਾਂ ਸਮੇਤ ਬੀ.ਸੀ. ਦੇ ਬਾਕੀ 8 ਸਟੋਰਾਂ ਵਿਚ ਕੰਮਕਾਜ ਦੁਬਾਰਾ ਸ਼ੁਰੂ ਹੋ ਗਿਆ ਹੈ।
ਕੰਪਨੀ ਦਾ ਕਹਿਣਾ ਹੈ ਕਿ ਫਾਰਮੇਸੀ ਦੇ ਮਰੀਜ਼ਾਂ ਸਮੇਤ ਹੁਣ ਤਕ ਕਿਸੇ ਵੀ ਗਾਹਕ ਦਾ ਡਾਟਾਬੇਸ ਚੋਰੀ ਹੋਣ ਦਾ ਕੋਈ ਸਬੂਤ ਨਹੀਂ ਮਿਲਿਆ ਹੈ। ਜ਼ਿਕਰਯੋਗ ਹੈ ਕਿ ਲੰਡਨ ਡਰੱਗ ਨੇ ਸਾਈਬਰ ਸੁਰੱਖਿਆ ਦੇ ਮੱਦੇਨਜ਼ਰ 28 ਅਪ੍ਰੈਲ ਨੂੰ ਬੀ.ਸੀ., ਐਲਬਰਟਾ, ਸਸਕੈਚਵਨ ਅਤੇ ਮੈਨੀਟੋਬਾ ਵਿੱਚ ਆਪਣੀਆਂ 80 ਤੋਂ ਵੱਧ ਲੋਕੇਸ਼ਨਾਂ ਨੂੰ ਬੰਦ ਕਰ ਦਿੱਤਾ ਸੀ।
ਅਸਲ ਵਿਚ ਲੰਡਨ ਡਰੱਗ ਦੀਆਂ ਲੋਕੇਸ਼ਨਾਂ ਵੀਰਵਾਰ ਨੂੰ ਹੌਲੀ-ਹੌਲੀ ਆਨਲਾਈਨ ਵਾਪਸ ਆਉਣੀਆਂ ਸ਼ੁਰੂ ਹੋ ਗਈਆਂ ਸਨ ਜਦੋਂ ਫੋਨ ਲਾਈਨਾਂ ਦੁਬਾਰਾ ਚਾਲੂ ਹੋ ਗਈਆਂ ਸਨ। ਉਨ੍ਹਾਂ ਨੂੰ ਕੰਪਨੀ ਵਲੋਂ ਅੰਦਰੂਨੀ ਜਾਂਚ ਦੇ ਜ਼ਰੂਰੀ ਹਿੱਸੇ ਵਜੋਂ ਆਫਲਾਈਨ ਲਿਆ ਗਿਆ ਸੀ।
ਜ਼ਿਕਰਯੋਗ ਹੈ ਕਿ ਕੰਪਨੀ ਵਲੋਂ ਬੀਤੇ ਐਤਵਾਰ ਸਾਈਬਰ ਸੁਰੱਖਿਆ ਦੇ ਮੁੱਦੇ ਕਾਰਨ ਆਪਣੇ ਕਾਰੋਬਾਰ ਬੰਦ ਕਰ ਦਿੱਤੇ ਗਏ ਸਨ। ਕੰਪਨੀ ਦਾ ਕਹਿਣਾ ਸੀ ਕਿ ਉਹ ਇਕ ਸਾਈਬਰ ਸੁਰੱਖਿਆ ਦੀ ਘਟਨਾ ਦਾ ਸ਼ਿਕਾਰ ਹੋ ਗਈ ਸੀ ਜਿਸ ਕਾਰਨ ਪੱਛਮੀ ਕੈਨੇਡਾ ਦੀਆਂ ਸਾਰੀਆਂ ਲੋਕੇਸ਼ਨਾਂ ਨੂੰ ਬੰਦ ਕਰਨਾ ਪਿਆ ਸੀ।
