14.65C Vancouver 14.65C VancouverApr 9, 2021 2:01 AM -
ਬੀ.ਸੀ. 'ਚ ਕੋਵਿਡ-19 ਦੇ ਵਧਦੇ ਮਾਮਲਿਆਂ ਵਿਚਾਲੇ ਸੂਬੇ ਦੀ ਪ੍ਰੋਵਿੰਸ਼ੀਅਲ ਸਿਹਤ ਅਫ਼ਸਰ ਡਾ. ਬੌਨੀ ਹੈਨਰੀ ਨੇ ਕੰਮ ਦੀਆਂ ਥਾਵਾਂ ਸੰਬੰਧੀ ਨਵੇਂ ਆਦੇਸ਼ ਦੇ ਦਿੱਤੇ ਹਨ।
ਉਨ੍ਹਾਂ ਦੱਸਿਆ ਕਿ ਹੁਣ ਵਰਕਸੇਫ ਬੀ.ਸੀ. ਕੋਲ ਅਜਿਹੇ ਕਿਸੇ ਵੀ ਕਾਰੋਬਾਰ ਨੂੰ ਬੰਦ ਕਰਨ ਦਾ ਅਧਿਕਾਰ ਹੋਵੇਗਾ ਜਿੱਥੇ 3 ਜਾਂ ਉਸ ਤੋਂ ਵਧੇਰੇ ਵਰਕਰਾਂ ਵਿਚਾਲੇ ਟ੍ਰਾਂਸਮਿਸ਼ਨ ਹੋਇਆ ਪਾਇਆ ਜਾਵੇਗਾ।
ਅਜਿਹੇ ਹਾਲਾਤ 'ਚ ਵਪਾਰਾਂ ਨੂੰ 10 ਦਿਨ ਜਾਂ ਉਸ ਤੋਂ ਵੱਧ ਸਮੇਂ ਲਈ ਬੰਦ ਕੀਤਾ ਜਾ ਸਕਦਾ ਹੈ।
ਹਾਲਾਂਕਿ ਇਹ ਨਿਰਦੇਸ਼ ਸਾਰੇ ਵਪਾਰਾਂ 'ਤੇ ਲਾਗੂ ਨਹੀਂ ਹੋਣਗੇ ਅਤੇ ਇਸ 'ਚ ਕੁਝ ਨੂੰ ਛੋਟ ਹੋਵੇਗੀ।
ਪੁਲਿਸ, ਫਾਇਰ, ਹੈਲਥ ਕੇਅਰ, ਟਰਾਂਸਪੋਰਟੇਸ਼ਨ ਅਤੇ ਗਰੋਸਰੀ ਸੰਬੰਧੀ ਥਾਵਾਂ 'ਤੇ ਇਸ ਨਿਯਮ ਤੋਂ ਛੋਟ ਹਾਸਿਲ ਹੋ ਸਕਦੀ ਹੈ।
ਦੱਸਿਆ ਗਿਆ ਕਿ ਕੰਮ ਦੀਆਂ ਵੱਡੀਆਂ ਥਾਵਾਂ 'ਤੇ ਵੀ ਇਹ ਪਬੰਦੀ ਲਾਗੂ ਨਹੀਂ ਹੋਵੇਗੀ ਅਤੇ ਅਜਿਹੇ ਥਾਵਾਂ 'ਤੇ ਵਪਾਰਾਂ ਜਾਂ ਕਾਰੋਬਾਰਾਂ ਨੂੰ ਇੱਕ ਖਾਸ ਲੋਕੇਸ਼ਨ ਤਕ ਸੀਮਤ ਕੀਤਾ ਜਾ ਸਕਦਾ ਹੈ।
ਫਿਰ ਟੁੱਟਿਆ ਕੋਵਿਡ-19 ਮਾਮਲਿਆਂ ਦਾ ਰਿਕਾਰਡ
ਬੀ.ਸੀ. 'ਚ ਕੋਵਿਡ-19 ਦੇ 1,293 ਮਾਮਲੇ ਰਿਪੋਰਟ ਹੋਏ ਹਨ।
ਇਹ ਬੀ.ਸੀ. 'ਚ ਹੁਣ ਤਕ ਦਾ ਇੱਕੋ ਦਿਨ ਦਾ ਵਾਇਰਸ ਸੰਬੰਧੀ ਮਾਮਲਿਆਂ ਦਾ ਸਭ ਤੋਂ ਵੱਡਾ ਵਾਧਾ ਹੈ।
ਦੁੱਖ ਦੀ ਗੱਲ ਸੀ ਕਿ 2 ਵਾਇਰਸ ਪੀੜਤਾਂ ਦੇ ਦਮ ਤੋੜਨ ਬਾਰੇ ਦੱਸਿਆ ਗਿਆ ਹੈ।
ਹੁਣ ਬੀ.ਸੀ. 'ਚ ਕੋਵਿਡ-19 ਦੇ ਕੁੱਲ ਮਾਮਲਿਆਂ ਦੀ ਗਿਣਤੀ 1,08,273 ਤਕ ਪਹੁੰਚ ਗਈ ਹੈ।
ਬੀ.ਸੀ. ਦੀ ਪ੍ਰੋਵਿੰਸ਼ੀਅਲ ਸਿਹਤ ਅਫ਼ਸਰ, ਡਾ. ਬੌਨੀ ਹੈਨਰੀ ਅਤੇ ਸਿਹਤ ਮੰਤਰੀ ਐਡਰੀਅਨ ਡਿਕਸ ਵੱਲੋਂ ਅੱਜ ਦੇ ਮਾਮਲਿਆਂ ਦੀ ਜਾਣਕਾਰੀ ਸਾਂਝੀ ਕੀਤੀ ਗਈ ਹੈ।
ਸੂਬੇ 'ਚ ਵਾਇਰਸ ਸੰਬੰਧੀ ਮੌਤਾਂ ਦੀ ਗਿਣਤੀ 1,493 ਹੋ ਚੁੱਕੀ ਹੈ।
ਬੀ.ਸੀ. 'ਚ ਵਾਇਰਸ ਸੰਬੰਧੀ ਐਕਟਿਵ ਮਾਮਲੇ 9,184 ਤਕ ਪਹੁੰਚ ਗਏ ਹਨ।
ਕੁੱਲ 336 ਲੋਕ ਹਸਪਤਾਲ 'ਚ ਦਾਖਿਲ ਹਨ ਤੇ ਇਸ 'ਚ 101 ਨੂੰ ਆਈ.ਸੀ.ਯੂ. 'ਚ ਰੱਖਿਆ ਗਿਆ ਹੈ।
ਅੱਜ ਡਾ. ਬੌਨੀ ਹੈਨਰੀ ਨੇ ਕਿਹਾ ਹੈ ਕਿ ਹੁਣ ਤੋਂ ਸੂਬੇ 'ਚ ਕੋਵਿਦ 9 ਦੇ ਹਰ ਨਵੇਂ ਮਾਮਲੇ ਨੂੰ ਵਾਇਰਸ ਵੇਰੀਐਂਟ ਦਾ ਮਾਮਲਾ ਹੀ ਸਮਝਿਆ ਜਾਵੇਗਾ।
ਬੀ.ਸੀ. 'ਚ ਇੱਕ ਮਿਲੀਅਨ ਦੇ ਨੇੜੇ ਪਹੁੰਚਿਆ ਵੈਕਸੀਨੇਸ਼ਨਸ ਦਾ ਅੰਕੜਾ
ਬੀ.ਸੀ. 'ਚ ਹੁਣ ਤਕ ਕੋਵਿਡ-19 ਵੈਕਸੀਨ ਦੀਆਂ 9,85,001 ਖੁਰਾਕਾਂ ਪ੍ਰਦਾਨ ਕੀਤੀਆਂ ਜਾ ਚੁੱਕੀਆਂ ਹਨ।
ਡਾ. ਬੌਨੀ ਹੈਨਰੀ ਨੇ ਦੱਸਿਆ ਕਿ ਹੁਣ ਤੱਕ ਪ੍ਰਦਾਨ ਕੀਤੀਆਂ ਗਈਆਂ ਖੁਰਾਕਾਂ 'ਚ 87,564 ਲੋਕ ਅਜਿਹੇ ਹਨ ਜਿੰਨਾ ਨੂੰ ਵੈਕਸੀਨ ਦੀ ਦੂਜੀ ਖੁਰਾਕ ਵੀ ਪ੍ਰਦਾਨ ਕੀਤੀ ਜਾ ਚੁੱਕੀ ਹੈ।
ਵੀਰਵਾਰ ਤਕ ਦੇ ਅੰਕੜਿਆਂ ਅਨੁਸਾਰ ਬੀ.ਸੀ. ਸੈਂਟਰ ਫਾਰ ਡਿਜ਼ੀਜ਼ ਕੰਟਰੋਲ ਦਾ ਕਹਿਣਾ ਹੈ ਕਿ ਹੁਣ ਤੱਕ ਸੂਬੇ 'ਚ ਕੁੱਲ 14,03,510 ਵੈਕਸੀਨ ਖੁਰਾਕਾਂ ਡਿਲਿਵਰ ਹੋ ਚੁੱਕੀਆਂ ਹਨ।
