11.69C Vancouver 11.69C VancouverMay 13, 2020 9:42 PM -
ਕੈਨੇਡਾ ਦੀ ਚੀਫ ਪਬਲਿਕ ਹੈਲਥ ਅਫਸਰ, ਡਾ. ਥਰੈਸਾ ਟੈਮ ਦਾ ਕਹਿਣਾ ਹੈ ਕਿ ਲੋਕ ਮਾਸਕ ਪਹਿਨ ਕੇ ਰੱਖਣੇ ਚਾਹੁੰਦੇ ਹਨ ਜਾਂ ਨਹੀਂ, ਇਹ ਇਸੇ 'ਤੇ ਨਿਰਭਰ ਕਰਦਾ ਹੈ ਕਿ ਕਿਸੇ ਕਮਿਊਨਿਟੀ (community) ਵਿੱਚ ਵਾਇਰਸ ਸੰਬੰਧੀ ਕਿਸ ਕਿਸਮ ਦੇ ਹਾਲਾਤ ਹਨ ਅਤੇ ਲੋਕ ਇਸ ਸੰਬੰਧੀ ਕੀ ਕਰ ਰਹੇ ਹਨ।
ਡਾ. ਟੈਮ ਨੇ ਦੱਸਿਆ ਕਿ ਮਾਸਕ ਉਨ੍ਹਾਂ ਇਲਾਕਿਆਂ 'ਚ ਲਾਭਦਾਇਕ ਸਾਬਿਤ ਹੋ ਸਕਦੇ ਹਨ, ਜਿੱਥੇ ਵਾਇਰਸ ਦੀ ਕਮਿਊਨਿਟੀ ਟਰਾਂਸਮਿਸ਼ਨ ਦੇ ਮਾਮਲੇ ਸਾਹਮਣੇ ਆ ਰਹੇ ਹੋਣ।
ਇਸਤੋਂ ਅਲਾਵਾ ਜਿਹੜੇ ਇਲਾਕਿਆਂ 'ਚ ਲੋਕਾਂ ਤੋਂ ਦੂਰੀ ਬਣਾ ਕੇ ਰੱਖਣਾ ਮੁਸ਼ਕਿਲ ਹੋਵੇ, ਉੱਥੇ ਵੀ ਮਾਸਕ ਵਰਤਣਾ ਬਿਹਤਰ ਸਾਬਿਤ ਹੋ ਸਕਦਾ ਹੈ।
ਇਸਦੇ ਵਿੱਚ ਸਟੋਰ ਅਤੇ ਪਬਲਿਕ ਟ੍ਰਾਂਜ਼ਿਟ ਵੀ ਸ਼ਾਮਿਲ ਹਨ। ਪਰ ਉਨ੍ਹਾਂ ਕਿਹਾ ਕਿ ਇਸਨੂੰ ਕੰਪਲਸਰੀ ਕਰਨਾ ਉਨ੍ਹਾਂ ਲੋਕਾਂ ਲਈ ਮੁਸ਼ਕਿਲ ਖੜੀ ਕਰ ਸਕਦਾ ਹੈ, ਜੋ ਮਾਸਕ ਨਹੀਂ ਖਰੀਦ ਸਕਦੇ ਜਾਂ ਜਿੰਨਾ ਦੀ ਇਸ ਤੱਕ ਪਹੁੰਚ ਨਾ ਹੋਵੇ।
ਡਾ. ਟੈਮ ਨੇ ਨਵੇਂ ਟੈਸਟ ਸੰਬੰਧੀ ਕੀਤੀ ਟਿੱਪਣੀ
ਡਾ. ਥਰੈਸਾ ਟੈਮ ਦਾ ਕਹਿਣਾ ਹੈ ਕਿ, ਕੈਨੇਡਾ 'ਚ ਇੱਕ ਨਵੇਂ ਮਨਜ਼ੂਰ (approved) ਕੀਤੇ ਗਏ ਐਂਟੀਬੌਡੀ ਟੈਸਟ ਦੀ ਵਰਤੋਂ ਕੀਤੀ ਜਾਵੇਗੀ।
ਇਸਦੇ ਨਾਲ ਕੋਵਿਡ-19 ਸੰਬੰਧੀ ਪਤਾ ਲਗਾਉਣ ਦੀ ਕੋਸ਼ਿਸ਼ ਕੀਤੀ ਜਾਵੇਗੀ ਕਿ ਦੇਸ਼ ਦੇ ਕਿੰਨੇ ਕੁ ਲੋਕ ਇਸਦੇ ਸੰਪਰਕ 'ਚ ਆਏ ਹਨ।
ਉਨ੍ਹਾਂ ਕਿਹਾ ਕਿ ਇਹ ਜਲਦਬਾਜ਼ੀ ਹੋਵੇਗੀ ਕਿ ਇਸ ਟੈਸਟ ਦੀ ਵਰਤੋਂ ਨਾਲ ਇਹ ਪਤਾ ਕੀਤਾ ਜਾ ਸਕੇ ਕਿ ਕੌਣ-ਕੌਣ ਇਸ ਵਾਇਰਸ ਤੋਂ ਇਮਿਊਨ (immune) ਹੋ ਗਿਆ ਹੈ, ਕਿਉਂਕਿ ਅਜੇ ਇਹ ਪਤਾ ਨਹੀਂ ਕੀਤਾ ਜਾ ਸਕਿਆ ਹੈ ਕਿ ਇਹ ਨੈਚੁਰਲ ਐਂਟੀਬੌਡੀਜ਼ (natural antibodies) ਕਿੰਨੇ ਕੁ ਅਸਰਦਾਰ ਹਨ।
"ਹੈਲਥ ਕੇਅਰ ਹਾਸਿਲ ਕਰਨ 'ਚ ਨਾ ਵਰਤੀ ਜਾਵੇ ਢਿੱਲ"
ਡਾ. ਥਰੈਸਾ ਟੈਮ ਦਾ ਕਹਿਣਾ ਹੈ ਕਿ ਲੋਕਾਂ ਨੂੰ ਜੇਕਰ ਹੈਲਥ ਕੇਅਰ ਦੀ ਲੋੜ ਹੈ ਤਾਂ ਇਸਨੂੰ ਹਾਸਿਲ ਕਰਨ 'ਚ ਢਿੱਲ ਨਹੀਂ ਵਰਤੀ ਜਾਣੀ ਚਾਹੀਦੀ।
ਉਨ੍ਹਾਂ ਕਿਹਾ ਕਿ ਜੇਕਰ ਲੋਕਾਂ ਨੇ ਤੁਰੰਤ ਲੋੜੀਂਦੀ ਮਦਦ ਲੈਣ 'ਚ ਢਿੱਲ ਵਰਤੀ, ਤਾਂ ਪਹਿਲਾਂ ਤੋਂ ਜਾਰੀ ਮੌਤਾਂ ਦੇ ਮਾਮਲਿਆਂ 'ਚ ਵਾਧਾ ਹੋ ਸਕਦਾ ਹੈ।
ਡਾ. ਟੈਮ ਨੇ ਕਿਹਾ ਕਿ ਕਰੋਨਿਕ ਬਿਮਾਰੀਆਂ ਨਾਲ ਜੂਝ ਰਹੇ ਲੋਕਾਂ ਦੀ ਸਿਹਤ ਹੋਰ ਵਿਗੜ ਸਕਦੀ ਹੈ ਅਤੇ ਲੰਮੇ ਸਮੇਂ 'ਚ ਇਸਦੇ ਗੰਭੀਰ ਨਤੀਜੇ ਹੋ ਸਕਦੇ ਹਨ।
ਡਾ. ਟੈਮ ਨੇ ਕਿਹਾ ਕਿ ਲੋਕਾਂ ਨੂੰ ਹੋਰ ਕਿਸਮ ਦੀਆਂ ਵੈਕਸੀਨੇਸ਼ਨਜ਼ ਵੀ ਜਾਰੀ ਰੱਖਣੀਆਂ ਚਾਹੀਦੀਆਂ ਹਨ, ਤਾਂ ਜੋ ਬਚਾਅ ਕੀਤੇ ਜਾ ਸਕਣ ਵਾਲੀਆਂ ਬਿਮਾਰੀਆਂ ਤੋਂ ਬਚਿਆ ਜਾ ਸਕੇ।
