ਐਬਟਸਫੋਰਡ ਵਿੱਚ ਪੁਲਿਸ ਤੋਂ ਬਚ ਕੇ ਭੱਜਦੇ ਡਰਾਈਵਰ ਦੀ ਦਰੱਖਤ ਨਾਲ ਟਕਰਾਉਣ ਕਾਰਨ ਹੋਈ ਮੌਤ

ਐਬਟਸਫੋਰਡ ਵਿਚ ਸੋਮਵਾਰ ਰਾਤ ਨੂੰ ਪੁਲਿਸ ਤੋਂ ਬਚ ਕੇ ਭੱਜੀ ਇੱਕ ਗੱਡੀ ਦਰੱਖਤ ਨਾਲ ਜਾ ਟਕਰਾਈ, ਜਿਸ ਵਿਚ ਡੌਜ ਰੈਮ ਟਰੱਕ ਦੇ ਡਰਾਈਵਰ ਦੀ ਮੌਕੇ 'ਤੇ ਮੌਤ ਹੋ ਗਈ।

ਪੁਲਿਸ ਮੁਤਾਬਕ, ਰਾਤ 11:30 ਵਜੇ ਦੇ ਕਰੀਬ ਇੱਕ ਅਧਿਕਾਰੀ ਨੇ ਟਾਊਨਲਾਈਨ ਰੋਡ ਨੇੜੇ ਮੈਕਲੂਰ ਰੋਡ 'ਤੇ ਸਪੀਡ ਨਾਲ ਆ ਰਹੇ ਡੌਜ ਰੈਮ ਟਰੱਕ ਦੇ ਡਰਾਈਵਰ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ ਸੀ, ਜਿਸ ਨੇ ਰੁਕਣ ਦੀ ਬਜਾਏ ਗੱਡੀ ਭਜਾ ਲਈ ਅਤੇ ਕੁਝ ਹੀ ਦੂਰੀ 'ਤੇ ਮੈਕਲੂਰ ਰੋਡ ਅਤੇ ਓਲਡ ਯੇਲ ਰੋਡ ਦੇ ਇੰਟਰਸੈਕਸ਼ਨ ਕੋਲ ਇਹ ਸਿੱਧੀ ਇੱਕ ਦਰੱਖਤ ਵਿਚ ਜਾ ਵੱਜੀ।

ਪੁਲਿਸ ਨੇ ਪੁਸ਼ਟੀ ਕੀਤੀ ਕਿ ਡਰਾਈਵਰ ਮੌਕੇ 'ਤੇ ਮ੍ਰਿਤਕ ਪਾਇਆ ਗਿਆ ਅਤੇ ਹਾਦਸੇ ਵਿਚ ਕੋਈ ਹੋਰ ਗੱਡੀ ਸ਼ਾਮਲ ਨਹੀਂ ਸੀ। ਪੁਲਿਸ ਦੀ ਕਥਿਤ ਕਾਰਵਾਈ ਨਾਲ ਸਬੰਧਤ ਮਾਮਲਾ ਹੋਣ ਕਾਰਨ ਇਸ ਦੀ ਜਾਂਚ ਇਨਡੀਪੈਂਨਡੈਂਟ ਇਨਵੈਸਟੀਗੇਸ਼ਨ ਔਫਿਸ ਵਲੋਂ ਸੰਭਾਲੀ ਗਈ ਹੈ।

ਇਨਵੈਸਟੀਗੇਟਰਸ ਨੇ ਅਪੀਲ ਕੀਤੀ ਹੈ ਕਿ ਜੇਕਰ ਕਿਸੇ ਕੋਲ ਇਸ ਘਟਨਾ ਦੀ ਡੈਸ਼ਕੈਮ ਵੀਡੀਓ ਹੈ ਜਾਂ ਕੋਈ ਚਸ਼ਮਦੀਦ ਗਵਾਹ ਹੈ ਤਾਂ ਉਹ ਜਾਂਚ ਵਿਚ ਸਹਿਯੋਗ ਲਈ ਐਬਟਸਫੋਰਡ ਪੁਲਿਸ ਨਾਲ 604-859-5225 'ਤੇ ਸੰਪਰਕ ਕਰ ਸਕਦਾ ਹੈ।