ਮਲਟੀਪਲ ਟ੍ਰੈਫਿਕ ਉਲੰਘਣਾਵਾਂ ਦੇ ਚਲਦੇ ਲੈਂਗਲੀ ਦੀ ਚਾਲਕ 'ਤੇ ਲੱਗੇ ਮੋਟੇ ਜੁਰਮਾਨੇ

ਬੀ.ਸੀ. ਹਾਈਵੇ ਪੈਟਰੋਲ ਨੇ ਲੈਂਗਲੇ ਦੀ ਇੱਕ 50 ਸਾਲਾ ਮਹਿਲਾ ਨੂੰ ਜਾਅਲੀ ਅਸਥਾਈ ਓਪਰੇਟਿੰਗ ਪਰਮਿਟ ਨਾਲ ਗੱਡੀ ਚਲਾਉਣ ਅਤੇ ਐਚ.ਓ.ਵੀ ਲੇਨ ਦੀ ਉਲੰਘਣਾ ਦੇ ਮਾਮਲੇ ਵਿਚ ਤਿੰਨ ਜੁਰਮਾਨਾ ਟਿਕਟ ਜਾਰੀ ਕੀਤੀਆਂ ਹਨ, ਨਾਲ ਹੀ ਉਸ ਨੂੰ ਅਪਰਾਧਿਕ ਦੋਸ਼ ਵਿਚ ਕੋਰਟ ਪੇਸ਼ੀ ਦਾ ਵੀ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਮਿਨੀਵੈਨ ਚਲਾ ਰਹੀ ਇਸ ਮਹਿਲਾ ਨੂੰ 15 ਅਪ੍ਰੈਲ ਨੂੰ ਡੈਲਟਾ ਵਿਚ ਹਾਈਵੇਅ 99 'ਤੇ ਰੋਕਿਆ ਗਿਆ ਸੀ, ਜਿੱਥੇ ਉਹ ਐਚ.ਓ.ਵੀ ਲੇਨ ਵਿਚ ਇਕੱਲੇ ਡਰਾਈਵ ਕਰ ਰਹੀ ਸੀ।

ਸੀ.ਪੀ.ਐਲ. ਮਾਈਕਲ ਮੈਕਲਾਫਲਿਨ ਮੁਤਾਬਕ, ਵੈਨ 'ਤੇ ਨਿਯਮਤ ਪਲੇਟਾਂ ਨਹੀਂ ਸੀ, ਇਸ ਦੀ ਬਜਾਏ ਕਾਗਜ਼ ਦਾ ਇੱਕ ਅਸਥਾਈ ਓਪਰੇਟਿੰਗ ਪਰਮਿਟ ਸੀ, ਜੋ ਜਾਂਚ ਵਿਚ ਨਕਲੀ ਪਾਇਆ ਗਿਆ। ਇਸ ਲਈ ਮਹਿਲਾ ਡਰਾਈਵਰ ਨੂੰ ਐਚ.ਓ.ਵੀ ਲੇਨ ਦੀ ਉਲੰਘਣਾ ਦੇ ਮਾਮਲੇ ਵਿਚ $109 ਦਾ ਜੁਰਮਾਨਾ,ਠੋਸ ਵਾਈਟ ਲੇਨ ਉਤੇ ਲੇਨ ਬਦਲਣ ਲਈ $109 ਦਾ ਜੁਰਮਾਨਾ ਅਤੇ ਬਿਨਾਂ ਇੰਸ਼ੋਰੈਂਸ ਦੇ ਗੱਡੀ ਚਲਾਉਣ ਲਈ $598 ਦਾ ਜੁਰਮਾਨਾ ਲਗਾਇਆ ਗਿਆ ਹੈ। ਇਸ ਤੋਂ ਇਲਾਵਾ ਕੋਰਟ ਵਿਚ ਪੇਸ਼ ਹੋਣ ਲਈ ਉਸ ਨੂੰ ਸੰਮਨ ਜਾਰੀ ਕੀਤੇ ਗਏ ਹਨ।