14.42C Vancouver 14.42C VancouverJan 20, 2022 8:02 PM - The Canadian Press
ਬੀ.ਸੀ. ਦੇ ਟਰਾਂਸਪੋਰਟੇਸ਼ਨ ਮੰਤਰਾਲੇ ਵੱਲੋਂ ਲੋਕਾਂ ਨੂੰ ਕੋਕਿਹਾਲਾ ਹਾਈਵੇਅ ਬਾਰੇ ਸਾਵਧਾਨ ਕੀਤਾ ਗਿਆ ਹੈ।
ਇਸ ਹਾਈਵੇਅ 'ਤੇ ਆਵਾਜਾਈ ਪੂਰੀ ਤਰ੍ਹਾਂ ਸ਼ੁਰੂ ਹੋਣ ਤੋਂ ਬਾਅਦ ਟਰਾਂਸਪੋਰਟ ਮੰਤਰਾਲੇ ਵੱਲੋਂ ਇੱਕ ਸੋਸ਼ਲ ਮੀਡੀਆ ਪੋਸਟ ਆਸਰੇ ਲੋਕਾਂ ਨੂੰ ਸੇਫਟੀ ਪ੍ਰਤੀ ਧਿਆਨ ਦੇਣ ਦੀ ਅਪੀਲ ਕੀਤੀ ਗਈ ਹੈ।
ਮੰਤਰਾਲੇ ਦਾ ਕਹਿਣਾ ਹੈ ਕਿ ਅਜਿਹੀਆਂ ਰਿਪੋਰਟਸ ਮਿਲੀਆਂ ਹਨ ਕਿ, ਲੋਕ ਅਸੁਰੱਖਿਅਤ ਢੰਗ ਨਾਲ ਹੜ੍ਹਾਂ ਕਾਰਨ ਨੁਕਸਾਨੇ ਗਏ ਰਸਤੇ ਦੀਆਂ ਤਸਵੀਰਾਂ ਖਿੱਚਣ ਲਈ ਰੁਕ ਰਹੇ ਹਨ।
ਹਾਈਵੇਅ 5 ਦਾ ਕਰੀਬ 130km ਦਾ ਲੋਅਰ ਮੇਨਲੈਂਡ ਅਤੇ ਇੰਟੀਰੀਅਰ ਵਿਚਾਲੇ ਦਾ ਹਿੱਸਾ ਨਵੰਬਰ 'ਚ ਦਸਤਕ ਦੇਣ ਵਾਲੇ ਹੜ੍ਹਾਂ ਅਤੇ ਮਡਸਲਾਈਡਸ ਵਿਚਾਲੇ ਨੁਕਸਾਨਿਆ ਗਿਆ ਸੀ।
ਇਸੇ ਦੌਰਾਨ ਰਸਤੇ 'ਤੇ ਕਰੀਬ 7 ਪੁਲ ਵੀ ਬੁਰੀ ਤਰ੍ਹਾਂ ਨੁਕਸਾਨੇ ਗਏ ਸਨ।
ਮੰਤਰਾਲੇ ਦਾ ਕਹਿਣਾ ਹੈ ਕਿ ਕਰਿਊਸ ਵੱਲੋਂ ਕੀਤੇ ਗਏ ਅਣਥੱਕ ਕੰਮ ਦੇ ਆਸਰੇ 35 ਦਿਨਾਂ ਵਿਚਾਲੇ ਹੀ ਇਸ ਰਸਤੇ 'ਤੇ ਦੋਵਾਂ ਦਿਸ਼ਾਵਾਂ 'ਚ ਇੱਕ-ਇੱਕ ਲੇਨ 'ਤੇ ਆਵਾਜਾਈ ਸ਼ੁਰੂ ਹੋ ਸਕੀ ਸੀ।
ਹਾਲਾਂਕਿ ਉਸ ਸਮੇਂ ਰਸਤੇ ਨੂੰ ਕਮਰਸ਼ਲ ਵਾਹਨਾਂ ਤਕ ਸੀਮਤ ਰੱਖਿਆ ਗਿਆ ਸੀ।
ਬੁੱਧਵਾਰ ਨੂੰ ਹਾਈਵੇਅ ਖੁੱਲ੍ਹਣ ਤੋਂ ਬਾਅਦ 2 ਵਾਹਨ ਚਾਲਕਾਂ ਦੀ ਗੈਸ ਖਤਮ ਹੋਣ ਅਤੇ ਕਈ ਚਾਲਕਾਂ ਦੇ ਅਸੁਰੱਖਿਅਤ ਤਰੀਕੇ ਨਾਲ ਵਾਹਨਾਂ ਵਿੱਚੋਂ ਨਿਕਲ ਕੇ ਤਸਵੀਰਾਂ ਖਿੱਚਣ ਦੀ ਜਾਣਕਾਰੀ ਸਾਹਮਣੇ ਆਈ।
ਲੋਕਾਂ ਨੂੰ ਆਖਿਆ ਗਿਆ ਹੈ ਕਿ ਸੜਕ 'ਤੇ ਕਈ ਕਿਸਮ ਦੀਆਂ ਤਬਦੀਲੀਆਂ ਹੋਈਆਂ ਹਨ ਅਤੇ ਅਜਿਹੇ 'ਚ ਰਸਤੇ ਦੇ ਕਿਨਾਰੇ ਰੁਕਣਾ ਖੁਦ ਲਈ ਅਤੇ ਹੋਰ ਲਈ ਖਤਰਨਾਕ ਸਾਬਿਤ ਹੋ ਸਕਦਾ ਹੈ।
