ਪੁਲਿਸ ਨੇ ਘਰ ਵਿਚ ਛਾਪੇਮਾਰੀ ਦੌਰਾਨ ਜ਼ਬਤ ਕੀਤੇ ਨਸ਼ੀਲੇ ਪਦਾਰਥ ਤੇ ਹਥਿਆਰ

ਪ੍ਰਿੰਸ ਜਾਰਜ ਪੁਲਿਸ ਨੇ ਇੱਕ ਲੋਕਲ ਰਿਹਾਇਸ਼ 'ਤੇ ਛਾਪੇਮਾਰੀ ਵਿਚ ਡਰੱਗਜ਼, ਹਥਿਆਰ ਬਰਾਮਦ ਕੀਤੇ ਜਾਣ ਦੀ ਜਾਣਕਾਰੀ ਦਿੱਤੀ ਹੈ। ਇਸ ਦੌਰਾਨ ਘਰ ਅੰਦਰੋਂ ਕਈ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ, ਜਿਨ੍ਹਾਂ ਵਿਚੋਂ ਕਈ ਮੁਲਜ਼ਮ ਪਹਿਲਾਂ ਵੀ ਪੁਲਿਸ ਅੜਿੱਕੇ ਚੜ੍ਹ ਚੁੱਕੇ ਸਨ। ਪ੍ਰਿੰਸ ਜਾਰਜ ਆਰਸੀਐਮਪੀ ਨੇ ਇੱਕ ਬਿਆਨ ਵਿਚ ਕਿਹਾ ਕਿ ਇਹ ਕਾਰਵਾਈ 16 ਅਪ੍ਰੈਲ ਨੂੰ ਨਿਕੋਲਸਨ ਸਟ੍ਰੀਟ ਦੇ 300-ਬਲਾਕ ਦੇ ਇੱਕ ਘਰ ਵਿਚ ਕੀਤੀ ਗਈ।

ਰਿਹਾਇਸ਼ ਦੇ ਅੰਦਰ ਜਾਣ ਤੋਂ ਬਾਅਦ ਪੁਲਿਸ ਨੂੰ ਗੰਨਜ਼ ਦੇ ਨਾਲ-ਨਾਲ ਹੋਰ ਤੇਜ਼ਧਾਰ ਹਥਿਆਰ ਅਤੇ ਕਾਰਤੂਸ ਸਮੇਤ ਲਗਭਗ ਦਸ ਗ੍ਰਾਮ ਸ਼ੱਕੀ ਕੋਕੀਨ, 20 ਗ੍ਰਾਮ ਸ਼ੱਕੀ ਫੈਂਟਾਨਾਇਲ, 30 ਗ੍ਰਾਮ ਸ਼ੱਕੀ ਮੈਥੈਂਫੇਟਾਮਾਈਨ ਅਤੇ 55 ਗ੍ਰਾਮ ਸ਼ੱਕੀ ਦਵਾਈਆਂ ਮਿਲੀਆਂ। ਪੁਲਿਸ ਨੇ ਕਿਹਾ ਕਿ ਪਿਛਲੇ ਸਾਲ ਵੀ ਇਹ ਰਿਹਾਇਸ਼ ਕਈ ਜਾਂਚ ਦਾ ਕੇਂਦਰ ਰਹੀ ਸੀ, ਮਈ 2024 ਇੱਥੇ ਦੋ ਵਾਰ ਛਾਪੇ ਮਾਰੇ ਗਏ ਸਨ।

ਪ੍ਰਿੰਸ ਜਾਰਜ ਆਰਸੀਐਮਪੀ ਨੇ ਕਿਹਾ ਕਿ ਗ੍ਰਿਫਤਾਰ ਕੀਤੇ ਗਏ ਸ਼ੱਕੀ ਰਿਹਾਅ ਕਰ ਦਿੱਤੇ ਗਏ ਸਨ ਕਿਉਂਕਿ ਹੋਰ ਸੰਭਾਵੀ ਚਾਰਜਿਜ਼ ਲਗਾਉਣ ਤੋਂ ਪਹਿਲਾਂ ਜ਼ਬਤ ਕੀਤੀ ਗਈ ਡਰੱਗਜ਼ ਦੀ ਲੈਬ ਰਿਪੋਰਟ ਆਉਣੀ ਬਾਕੀ ਹੈ।