ਰੋਲਓਵਰ ਕਰੈਸ਼ ਤੋਂ ਬਾਅਦ ਡੰਪ ਟਰੱਕ ਡਰਾਈਵਰ ਨੇ ਗਵਾਈ ਨੌਕਰੀ ਤੇ ਲਾਈਸੈਂਸ

ਬੀ.ਸੀ. ਹਾਈਵੇਅ ਪੈਟਰੋਲ ਨੇ ਇੱਕ ਰੋਲਓਵਰ ਦੀ ਘਟਨਾ ਦੇ ਸਬੰਧ ਵਿਚ ਐਬਟਸਫੋਰਡ ਦੇ 44 ਸਾਲਾ ਡੰਪ ਟਰੱਕ ਡਰਾਈਵਰ ਦਾ ਲਾਈਸੈਂਸ ਸਸਪੈਂਡ ਕੀਤਾ ਹੈ ਅਤੇ ਨਾਲ ਹੀ ਉਸ ਨੂੰ ਦੋ ਮਾਮਲਿਆਂ ਵਿਚ ਜੁਰਮਾਨਾ ਲਗਾਇਆ ਹੈ। ਪੁਲਿਸ ਨੇ ਕਿਹਾ ਕਿ 4 ਸਤੰਬਰ ਨੂੰ ਦੁਪਹਿਰ 2:30 ਵਜੇ ਦੇ ਕਰੀਬ ਬੀ.ਸੀ. ਹਾਈਵੇ ਪੈਟਰੋਲ ਨੂੰ Deroche ਨੇੜੇ ਲੌਹੀਡ ਹਾਈਵੇਅ 'ਤੇ ਇੱਕ ਡੰਪ ਟਰੱਕ ਦੇ ਸੜਕੇ ਕਿਨਾਰੇ ਖਾਈ ਵਿਚ ਪਲਟਣ ਦੀ ਸੂਚਨਾ ਮਿਲੀ ਸੀ।

ਪੁਲਿਸ ਵਲੋਂ ਜਾਂਚ ਵਿਚ ਪਾਇਆ ਗਿਆ ਕਿ ਡਰਾਈਵਰ ਨਸ਼ੇ ਦੀ ਹਾਲਤ ਵਿਚ ਸੀ। ਉਸ ਨੂੰ ਜੌਬ ਵੀ ਗੁਆਉਣੀ ਪਈ। ਪੁਲਿਸ ਨੇ ਉਸ ਦੇ ਡਰਾਈਵਰ ਲਾਈਸੈਂਸ ਨੂੰ ਜ਼ਬਤ ਕਰਨ ਤੋਂ ਇਲਾਵਾ ਲਾਪਰਵਾਹੀ ਨਾਲ ਡਰਾਈਵ ਕਰਨ ਦੇ ਮਾਮਲੇ ਵਿਚ $368 ਦਾ ਜੁਰਮਾਨਾ ਤੇ ਗੱਡੀ ਵਿਚ ਖੁੱਲ੍ਹੀ ਸ਼ਰਾਬ ਮਿਲਣ ਦੇ ਮਾਮਲੇ ਵਿਚ $230 ਦਾ ਜੁਰਮਾਨਾ ਕੀਤਾ। ਬੀ.ਸੀ. ਹਾਈਵੇਅ ਪੈਟਰੋਲ ਨੇ ਕਿਹਾ ਕਿ ਡੰਪ ਟਰੱਕ ਨੂੰ ਵੀ 30 ਦਿਨ ਲਈ ਜ਼ਬਤ ਕੀਤਾ ਗਿਆ ਹੈ।

ਕਾਰਪੋਰਲ ਮਾਈਕਲ ਮੈਕਲਾਫਲਿਨ ਨੇ ਕਿਹਾ ਕਿ ਜਦੋਂ ਪੁਲਿਸ ਹਾਦਸੇ ਵਾਲੀ ਥਾਂ 'ਤੇ ਜਾਂਚ ਕਰ ਰਹੀ ਸੀ ਤਾਂ ਡੰਪ ਟਰੱਕ ਡਰਾਈਵਰ ਦਾ ਸੁਪਰਵਾਈਜ਼ਰ ਪਹੁੰਚ ਗਿਆ ਅਤੇ ਡਰਾਈਵਰ ਦੀ ਨੌਕਰੀ ਮੌਕੇ 'ਤੇ ਹੀ ਖਤਮ ਕਰ ਦਿੱਤੀ। ਮੈਕਲਾਫਲਿਨ ਨੇ ਚਿਤਾਵਨੀ ਦਿੱਤੀ ਕਿ ਨਸ਼ੇ ਵਿਚ ਗੱਡੀ ਚਲਾਉਣ ਨੂੰ ਬਿਲਕੁਲ ਵੀ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ।