ਲੈਂਗਲੀ 'ਚ ਚਾਕੂ ਨਾਲ ਹਮਲੇ 'ਚ ਦੋ ਲੋਕ ਜ਼ਖਮੀ

ਲੈਂਗਲੀ ਵਿਚ ਅੱਜ ਸਵੇਰ ਦੋ ਲੋਕਾਂ ਨੂੰ ਚਾਕੂ ਮਾਰਿਆ ਗਿਆ ਹੈ, ਜੋ ਹਸਪਤਾਲ ਵਿਚ ਜ਼ੇਰੇ ਇਲਾਜ ਹਨ। ਪੁਲਿਸ ਦਾ ਕਹਿਣਾ ਹੈ ਕਿ ਸ਼ੱਕੀ ਨੂੰ ਹਿਰਾਸਤ ਵਿਚ ਲਿਆ ਜਾ ਚੁੱਕਾ ਹੈ। ਲੈਂਗਲੀ ਆਰਸੀਐਮਪੀ ਨੇ ਇੱਕ ਨਿਊਜ਼ ਰਿਲੀਜ਼ ਵਿਚ ਕਿਹਾ ਕਿ ਤੜਕੇ ਕਰੀਬ 3:40 ਵਜੇ ਦੇ ਕਰੀਬ 56 ਐਵੇਨਿਊ ਦੇ 19800 ਬਲਾਕ ਵਿਚ ਉਨ੍ਹਾਂ ਨੂੰ ਗੜਬੜੀ ਦੀਆਂ ਰਿਪੋਰਟਾਂ ਮਿਲੀਆਂ ਸਨ।

ਮੌਕੇ 'ਤੇ ਪਹੁੰਚੇ ਅਧਿਕਾਰੀਆਂ ਨੂੰ ਦੋ ਲੋਕ ਚਾਕੂ ਨਾਲ ਹਮਲੇ ਵਿਚ ਜ਼ਖਮੀ ਮਿਲੇ ਅਤੇ ਪੀੜਤਾਂ ਨੂੰ ਹਸਪਤਾਲ ਲਿਜਾਣ ਤੋਂ ਪਹਿਲਾਂ ਮੁੱਢਲੀ ਡਾਕਟਰੀ ਸਹਾਇਤਾ ਦਿੱਤੀ। ਲੈਂਗਲੀ ਆਰਸੀਐਮਪੀ ਮੁਤਾਬਕ, ਗ੍ਰਿਫਤਾਰ ਕੀਤਾ ਗਿਆ 30 ਸਾਲਾ ਵਿਅਕਤੀ ਫਿਲਹਾਲ ਹਿਰਾਸਤ ਵਿਚ ਹੈ।

ਸਾਰਜੈਂਟ ਜ਼ਾਈਨਲ ਸ਼ਾਰੂਮ ਨੇ ਕਿਹਾ ਕਿ ਜਾਂਚ ਸ਼ੁਰੂਆਤੀ ਦੌਰ ਵਿਚ ਹੈ ਅਤੇ ਘਟਨਾ ਸਥਾਨ ਤੋਂ ਵੇਰਵੇ ਇਕੱਠੇ ਕੀਤੇ ਜਾ ਰਹੇ ਹਨ। ਸ਼ਾਰੂਮ ਵਲੋਂ ਲੋਕਾਂ ਨੂੰ ਵੀ ਘਟਨਾ ਸਬੰਧੀ ਜਾਣਕਾਰੀ ਦੀ ਸੂਚਨਾ ਪੁਲਿਸ ਨਾਲ ਸਾਂਝੀ ਕਰਨ ਦੀ ਬੇਨਤੀ ਕੀਤੀ ਗਈ ਹੈ।