ਸਟੈਟਿਸਟਿਕਸ ਕੈਨੇਡਾ : ਕੈਨੇਡਾ ਦੀ ਆਰਥਿਕਤਾ ਦੂਜੀ ਤਿਮਾਹੀ ਦੌਰਾਨ ਸੁੰਗੜੀ

ਕੈਨੇਡੀਅਨ ਆਰਥਿਕਤਾ ਦੂਜੀ ਤਿਮਾਹੀ ਵਿੱਚ ਰੁੱਕ ਗਈ ਦਿਖਾਈ ਦਿੱਤੀ ਹੈ ,ਕਿਉਂਕਿ ਹਾਊਸਿੰਗ ਵਿਚ ਘਟਦੇ ਨਿਵੇਸ਼ ਅਤੇ ਨਵੀਂ ਉਸਾਰੀ ਵਿਚ ਕਮੀ ਦੇ ਚਲਦਿਆਂ ਕੈਨੇਡੀਅਨ ਆਰਥਿਕਤਾ ਰੁੱਕ ਗਈ ਹੈ।

ਸਟੈਟਿਸਟਿਕਸ ਕੈਨੇਡਾ ਨੇ ਸ਼ੁੱਕਰਵਾਰ ਨੂੰ ਨਵੇਂ ਅੰਕੜੇ ਜਾਰੀ ਕੀਤੇ ਨੇ ਕਿ ਦੂਸਰੀ ਤਿਮਾਹੀ ਵਿੱਚ ਆਰਥਿਕਤਾ 0.2 ਪ੍ਰਤੀਸ਼ਤ ਸਾਲਾਨਾ ਸੁੰਗੜ ਗਈ ਹੈ। ਸਟੈਟਿਸਟਿਕਸ ਕੈਨੇਡਾ ਦੇ ਸ਼ੁਰੂਆਤੀ ਅਨੁਮਾਨਾਂ ਮੁਤਾਬਕ ਜੁਲਾਈ ਵਿਚ ਅਸਲ ਜੀ.ਡੀ.ਪੀ. ਵਿਚ ਮੋਟੇ ਤੌਰ ‘ਤੇ ਤਬਦੀਲੀ ਨਹੀਂ ਹੋਈ। ਹਾਲਾਂਕਿ ਏਜੰਸੀ ਨੇ ਕਿਹਾ ਕਿ ਸ਼ੁਰੂਆਤੀ ਅੰਕੜਿਆਂ ਨੂੰ ਅਪਡੇਟ ਕੀਤਾ ਜਾਵੇਗਾ।

ਏਜੰਸੀ ਨੇ ਪਿਛਲੀ ਤਿਮਾਹੀ ਦੇ ਅੰਕੜਿਆਂ ਨੂੰ ਵੀ ਰਿਵਾਈਜ਼ ਕੀਤਾ ਜਿਸ ਨਾਲ ਪਹਿਲਾਂ ਦਰਸਾਈ 3.1% ਦੀ ਸਲਾਨਾ ਵਿਕਾਸ ਦਰ ਘਟਾ ਕੇ 2.6% ਕੀਤੀ ਗਈ ਹੈ।

ਪਿਛਲੀਆਂ ਪੰਜ ਤਿਮਾਹੀਆਂ ਵਿਚ ਹਾਊਸਿੰਗ ਨਿਵੇਸ਼ ਵਿਚ ਲਗਾਤਾਰ ਕਮੀ ਹੁੰਦੀ ਦੇਖੀ ਗਈ ਹੈ। ਦੂਸਰੀ ਤਿਮਾਹੀ ਦੌਰਾਨ ਨਵੀਂ ਉਸਾਰੀ ਵਿੱਚ ਵੀ 8.2% ਗਿਰਾਵਟ ਆਈ ਅਤੇ ਰੈਨੋਵੇਸ਼ਨ ਖ਼ਰਚ ਵੀ 4.3% ਨਿੱਘਰਿਆ ਹੈ।

ਮਹਿੰਗਾਈ ‘ਤੇ ਕਾਬੂ ਪਾਉਣ ਲਈ ਬੈਂਕ ਔਫ਼ ਕੈਨੇਡਾ ਵੱਲੋਂ ਵਿਆਜ ਦਰਾਂ ਉੱਚੀਆਂ ਕੀਤੀਆਂ ਗਈਆਂ ਹਨ।