18.33C Vancouver 18.33C VancouverJun 23, 2020 3:38 PM -
ਪਾਰਲੀਮੈਂਟਰੀ ਬਜਟ ਅਫ਼ਸਰ ਦੀ ਨਵੀਂ ਰਿਪੋਰਟ ਦੇ ਅਨੁਮਾਨ ਮੁਤਾਬਕ ਕੈਨੇਡਾ ਐਮਰਜੈਂਸੀ ਰਿਸਪਾਂਸ ਬੈਨੇਫਿਟ ਨੂੰ ਅੱਠ ਹੋਰ ਹਫਤਿਆਂ ਲਈ ਮੁਹੱਈਆ ਕਰਵਾਉਣ ਦਾ ਖਰਚਾ $17.9 ਬਿਲੀਅਨ ਹੋਵੇਗਾ।
ਬਜਟ ਅਫ਼ਸਰ ਈਵ ਜੀਰੋ ਵੱਲੋਂ ਜਾਰੀ ਕੀਤੀ ਗਈ ਰਿਪੋਰਟ ਮੁਤਾਬਕ ਇਸ ਨਾਲ ਬੈਨੇਫਿਟ ਪ੍ਰੋਗਰਾਮ ਦਾ ਕੁੱਲ ਖਰਚਾ $71.3 ਬਿਲੀਅਨ ਹੋ ਜਾਵੇਗਾ।
ਕੈਨੇਡਾ ਐਮਰਜੈਂਸੀ ਰਿਸਪਾਂਸ ਬੈਨੇਫਿਟ, ਜਿਸ ਦਾ ਬਜਟ $60 ਬਿਲੀਅਨ ਹੈ, ਨਾਲ 4 ਜੂਨ ਤੱਕ 8.41 ਮਿਲੀਅਨ ਲੋਕਾਂ ਨੂੰ $43.51 ਬਿਲੀਅਨ ਮੁਹੱਈਆ ਕਰਵਾਏ ਜਾ ਚੁੱਕੇ ਹਨ।
ਇਸ ਬੈਨੀਫਿਟ ਲਈ ਅਰਜ਼ੀਆਂ ਦੇਣ ਵਾਲੇ ਵਿਅਕਤੀਆਂ ਦੇ ਪਹਿਲੇ ਸਮੂਹ ਦੀ 16 ਹਫਤਿਆਂ ਦੀ ਮਿਆਦ ਅਗਲੇ ਮਹੀਨੇ ਖ਼ਤਮ ਹੋਣ ਵਾਲੀ ਹੈ ਅਤੇ ਲਿਬਰਲ ਸਰਕਾਰ ਨੇ ਇਸ ਨੂੰ ਵਧਾ ਕੇ 24 ਹਫਤੇ ਕਰਨ ਦਾ ਐਲਾਨ ਕੀਤਾ ਹੈ।
ਜੀਰੋ ਦੀ ਰਿਪੋਰਟ ਅਨੁਸਾਰ ਇਸ ਪ੍ਰੋਗਰਾਮ ਦਾ ਹੋਰ ਖਰਚਾ ਬਹੁਤ ਹੱਦ ਤੱਕ ਆਉਣ ਵਾਲੇ ਦਿਨਾਂ ਵਿੱਚ ਮਹਾਂਮਾਰੀ ਦੇ ਅਸਰ, ਅਰਥ ਵਿਵਸਥਾ ਅਤੇ ਰੁਜ਼ਗਾਰ ਉੱਤੇ ਨਿਰਭਰ ਕਰੇਗਾ।
ਰਿਪੋਰਟ ਮੁਤਾਬਕ ਪ੍ਰੋਗਰਾਮ ਦੇ ਅੰਤਿਮ ਖਰਚੇ ਬਾਰੇ ਹੋਰ ਅਨਿਸ਼ਚਿਤਤਾ ਫੈਡਰਲ ਵੇਜ ਸਬਸਿਡੀ ਪ੍ਰੋਗਰਾਮ ਦੇ ਲਾਭ ਉੱਤੇ ਨਿਰਭਰ ਕਰਦੀ ਹੈ, ਜਿਸ ਵਿੱਚ ਲਿਬਰਲਾਂ ਵਲੋਂ ਤਬਦੀਲੀਆਂ ਕਰਨ ਦੀ ਯੋਜਨਾ ਹੈ।
