ਕੈਨੇਡੀਅਨ ਫੇਸਬੁੱਕ ਉਪਭੋਗਤਾਵਾਂ ਨੂੰ Meta ਨੇ ਕੀਤੀ 51 ਮਿਲੀਅਨ ਡਾਲਰ ਦੀ ਪੇਸ਼ਕਸ਼

ਕੈਨੇਡੀਅਨ ਫੇਸਬੁੱਕ ਯੂਜ਼ਰਸ ਨੂੰ ਮੈਟਾ ਵਲੋਂ ਕਲਾਸ ਐਕਸ਼ਨ ਮੁਕੱਦਮੇ ਵਿਚ $51 ਮਿਲੀਅਨ ਦੀ ਪੇਸ਼ਕਸ਼ ਕੀਤੀ ਗਈ ਹੈ। ਸੋਸ਼ਲ ਮੀਡੀਆ ਦੀ ਇਸ ਦਿੱਗਜ ਕੰਪਨੀ ਵਿਰੁੱਧ ਕੈਨੇਡੀਅਨ ਦੀ ਪੈਰਵੀ ਕਰਨ ਵਾਲੇ ਵਕੀਲ ਵਲੋਂ ਇਸ ਦੀ ਪੁਸ਼ਟੀ ਕਰਦੇ ਹੋਏ ਦੱਸਿਆ ਗਿਆ ਕਿ ਮੈਟਾ ਵਲੋਂ ਭੇਜਿਆ ਗਿਆ ਇਹ ਸਮਝੌਤੇ ਦਾ ਪ੍ਰਸਤਾਵ ਦੂਜੀਆਂ ਕੰਪਨੀਆਂ ਲਈ ਵੀ ਇਕ ਸਕਾਰਾਤਮਕ ਸੰਕੇਤ ਹੈ।

ਮੈਟਾ ਫੇਸਬੁੱਕ ’ਤੇ ਸਪਾਂਸਰ ਕੀਤੀਆਂ ਕਹਾਣੀਆਂ ਨਾਂ ਦੇ ਇਸ਼ਤਿਹਾਰੀ ਪ੍ਰੋਗਰਾਮ ਲਈ 4 ਸੂਬਿਆਂ ਦੇ ਮੁਕੱਦਮਿਆਂ ਦਾ ਸਾਹਮਣਾ ਕਰ ਰਿਹਾ ਹੈ ਜੋ 2011 ਤੋਂ 2014 ਤਕ ਚੱਲਿਆ ਸੀ।

ਇਸ ਪ੍ਰੋਗਰਾਮ ਵਿਚ ਲੋਕਾਂ ਦੀ ਜਾਣਕਾਰੀ ਤੋਂ ਬਿਨ੍ਹਾਂ ਉਨ੍ਹਾਂ ਦੇ ਨਾਂ ਅਤੇ ਤਸਵੀਰਾਂ ਦਾ ਇਸਤੇਮਾਲ ਕੀਤਾ ਗਿਆ ਸੀ। ਹੁਣ ਮੈਟਾ ਵਲੋਂ ਇਨ੍ਹਾਂ ਮੁਕੱਦਮਿਆਂ ਵਿਚ ਸਮਝੋਤੇ ਲਈ $51 ਮਿਲੀਅਨ ਦੀ ਪੇਸ਼ਕਸ਼ ਕੀਤੀ ਜਾ ਰਹੀ ਹੈ।

ਇਹ ਮੁਕੱਦਮਾ ਬੀ.ਸੀ ਦੀ ਇਕ ਔਰਤ ਵਲੌਂ 2019 ਵਿਚ ਦਾਇਰ ਕੀਤਾ ਗਿਆ ਸੀ ਜਿਸ ਵਿਚ ਸਸਕੈਚਵਨ, ਮੈਨੀਟੋਬਾ, ਨਿਊਫਾਊਂਡਲੈਂਡ ਅਤੇ ਲੈਬਰਾਡੋਰ ਦੇ ਨਾਗਰਿਕ ਵੀ ਸ਼ਾਮਿਲ ਹੋ ਗਏ ਸਨ। ਸਪਾਂਸਰਡ ਕਹਾਣੀ ਪ੍ਰੋਗਰਾਮ ਵਿਚ ਜੇਕਰ ਕੋਈ ਯੂਜ਼ਰ ਉਤਪਾਦ ਨੂੰ ਪਸੰਦ ਕਰਦਾ ਹੈ ਤਾਂ ਫੇਸਬੁੱਕ ਉਸਦੇ ਨਾਮ ਅਤੇ ਪ੍ਰੋਫਾਈਲ ਫੋਟੋ ਦੀ ਵਰਤੋਂ ਕਰਕੇ ਇੱਕ ਨਿਊਜ਼ ਫੀਡ ਸਮਰਥਨ ਤਿਆਰ ਕਰਦਾ ਹੈ ਪਰ ਉਸ ਨੂੰ ਇਸ ਬਾਰੇ ਜਾਣਕਾਰੀ ਨਹੀਂ ਦਿੱਤੀ ਜਾਂਦੀ।