ਵਾਤਾਵਰਣ ਤੇ ਊਰਜਾ ਮੰਤਰੀਆਂ ਵਲੋਂ ਜਗਮੀਤ ਸਿੰਘ ਨੂੰ ਕਾਰਬਨ ਕੀਮਤ ’ਤੇ ਬ੍ਰੀਫਿੰਗ ਦੇਣ ਲਈ ਸੱਦਾ

ਐੱਨ.ਡੀ.ਪੀ. ਲੀਡਰ ਜਗਮੀਤ ਸਿੰਘ ਵਲੋਂ ਜਲਵਾਯੂ ਤਬਦੀਲੀ ਦੇ ਮੁੱਦੇ ਨੂੰ ਲੈ ਕੇ ਲਿਬਰਲਸ ’ਤੇ ਸਾਧੇ ਜਾ ਰਹੇ ਨਿਸ਼ਾਨਿਆਂ ਵਿਚਕਾਰ ਵਾਤਾਵਰਣ ਮੰਤਰੀ ਸਟੀਵਨ ਗਿਲਬੌਰਟ ਅਤੇ ਊਰਜਾ ਮੰਤਰੀ ਜੋਨਾਥਨ ਵਿਲਕਿਨਸਨ ਨੇ ਜਗਮੀਤ ਸਿੰਘ ਨੂੰ ਕਾਰਬਨ ਕੀਮਤ ’ਤੇ ਬ੍ਰੀਫਿੰਗ ਦੇਣ ਲਈ ਸੱਦਾ ਦਿੱਤਾ ਹੈ, ਤਾਂ ਜੋ ਐੱਨ. ਡੀ. ਪੀ. ਲੀਡਰ ਇਹ ਬਿਹਤਰ ਢੰਗ ਨਾਲ ਸਮਝ ਸਕਣ ਕਿ ਇਹ ਟੈਕਸ ਕਲਾਈਮੇਟ ਚੇਂਜ ਨਾਲ ਲੜਨ ਵਿਚ ਕਿਵੇਂ ਮਦਦ ਕਰਦਾ ਹੈ।

ਜਗਮੀਤ ਸਿੰਘ ਨੂੰ ਭੇਜੇ ਗਏ ਪੱਤਰ ਵਿਚ ਗਿਲਬੌਰਟ ਅਤੇ ਵਿਲਕਿਨਸਨ ਨੇ ਕਿਹਾ ਕਿ ਇਹ ਬਹੁਤ ਨਿਰਾਸ਼ਾਜਨਕ ਹੈ ਕਿ ਐੱਨ. ਡੀ. ਪੀ. ਜਲਵਾਯੂ ਨੀਤੀ ਬਾਰੇ ਕੰਜ਼ਰਵੇਟਿਵ ਦੀ ਝੂਠੀ ਮੁਹਿੰਮ ਦੇ ਝਾਂਸੇ ਵਿਚ ਆ ਗਈ ਹੈ।

ਜਗਮੀਤ ਸਿੰਘ ਨੇ ਹਾਲ ਹੀ ਵਿਚ ਆਪਣੀ ਪਾਰਟੀ ਦੀ ਬੈਠਕ ਵਿਚ ਲਿਬਰਲਸ ਅਤੇ ਕੰਜ਼ਰਵੇਟਿਵਸ ਦੋਵਾਂ ਦੀ ਜਲਵਾਯੂ ਨੀਤੀ ਨਾਲ ਲੜਨ ਦੇ ਉਨ੍ਹਾਂ ਦੇ ਤਰੀਕਿਆਂ ਦੀ ਆਲੋਚਨਾ ਕੀਤੀ ਸੀ ਅਤੇ ਕਿਹਾ ਸੀ ਕਿ ਐੱਨ.ਡੀ.ਪੀ. ਵਰਕਿੰਗ ਲੋਕਾਂ ’ਤੇ ਬੋਝ ਨਹੀਂ ਚਾਹੁੰਦੀ ਪਰ ਉਨ੍ਹਾਂ ਇਹ ਸਪੱਸ਼ਟ ਨਹੀਂ ਕੀਤਾ ਕਿ ਜੇ ਐੱਨ. ਡੀ. ਪੀ. ਨੂੰ ਸਰਕਾਰ ਬਣਾਉਣ ਦਾ ਮੌਕਾ ਮਿਲਿਆ ਤਾਂ ਕਿ ਲੋਕਾਂ ਨਾਲ ਸਿੱਧੀਆਂ ਜੁੜੀਆਂ ਚੀਜ਼ਾਂ ’ਤੇ ਕਾਰਬਨ ਟੈਕਸ ਨੂੰ ਬਰਕਰਾਰ ਰੱਖਣਗੇ ਜਾਂ ਇਸ ਨੂੰ ਖ਼ਤਮ ਕਰਨਗੇ।