ਸੈਂਟਰ ਦੇ 3 ਖੇਤੀ ਬਿੱਲਾਂ ਖ਼ਿਲਾਫ਼ ਕਿਸਾਨਾਂ ਦਾ ਧਰਨਾ 20ਵੇਂ ਦਿਨ ਵੀ ਜਾਰੀ

ਕਿਸਾਨਾਂ ਦਾ ਕੇਂਦਰ ਦੇ ਖੇਤੀ ਬਿੱਲਾਂ ਖ਼ਿਲਾਫ਼ ਦਿੱਲੀ ਦੇ ਸਿੰਘੂ ਬਾਰਡਰ 'ਤੇ ਚੱਲ ਰਿਹਾ ਵਿਰੋਧ ਅੱਜ ਮੰਗਲਵਾਰ ਨੂੰ 20ਵੇਂ ਦਿਨ 'ਚ ਦਾਖਲ ਹੋ ਗਿਆ ਹੈ|

ਕਈ ਸਾਬਕਾ ਫੌਜੀ ਵੀ ਕਿਸਾਨਾਂ ਦੇ ਇਸ ਸੰਘਰਸ਼ 'ਚ ਸ਼ਾਮਲ ਹੋ ਗਏ ਹਨ|

ਫੌਜ ਤੋਂ 5 ਸਾਲ ਪਹਿਲਾਂ ਸੇਵਾਮੁਕਤ ਹੋਏ ਕਮਲਦੀਪ ਸਿੰਘ ਨੇ ਆਖਿਆ, "ਮੈਂ ਮੁਲਕ ਦੇ ਵੱਖੋ-ਵੱਖ ਹਿੱਸਿਆਂ 'ਚ ਰਿਹਾ ਹਾਂ| ਅਸੀਂ ਕਿਸਾਨ ਦੇ ਪੁੱਤਰ ਹਾਂ| ਮੈਂ ਇੱਥੇ ਇੱਕ ਕਿਸਾਨ ਦੇ ਤੌਰ 'ਤੇ ਆਇਆ ਹਾਂ| ਮੈਨੂੰ ਇਹ ਮੈਡਲ ਆਪਣੀ ਬਹਾਦਰੀ ਅਤੇ ਬਾਰਡਰ 'ਤੇ ਡੱਟਣ ਕਰਕੇ ਮਿਲੇ ਹਨ| ਅਸੀਂ ਸਰਕਾਰ ਨੂੰ ਦੱਸ ਦੇਣਾ ਚਾਹੁੰਦੇ ਹਾਂ ਕਿ ਜੇ ਇਹ ਕਾਲੇ ਕਾਨੂੰਨ ਵਾਪਸ ਨਾ ਲਏ ਗਏ, ਤਾਂ ਅਸੀਂ ਇੱਥੇ ਹੀ ਰਹਾਂਗੇ|"

ਉਸਨੇ ਅੱਗੇ ਆਖਿਆ, "ਅਸੀਂ ਕਿਸਾਨ ਹਾਂ ਅਤੇ ਆਪਣੇ ਹੱਕ ਮੰਗਣਾ ਗ਼ਲਤ ਨਹੀਂ ਹੈ| ਅਸੀਂ ਸਮਾਜ ਦੇ ਹਰ ਵਰਗ ਦਾ ਆਦਰ ਕਰਦੇ ਹਾਂ ਅਤੇ ਇੱਥੇ ਅਸੀਂ ਸਿਰਫ ਕਿਸਾਨਾਂ ਖ਼ਿਲਾਫ਼ ਬਣੇ ਹਨ ਕਾਨੂੰਨਾਂ ਦਾ ਵਿਰੋਧ ਕਰਨ ਲਈ ਹਾਂ|"

ਸਿੰਘੂ ਬਾਰਡਰ 'ਤੇ ਮੁਜ਼ਾਹਰਾ ਕਰ ਰਹੇ ਕੁਝ ਕਿਸਾਨਾਂ ਦਾ ਆਖਣਾ ਹੈ ਕਿ ਉੱਥੇ ਸਾਫ਼-ਸਫ਼ਾਈ ਨਹੀਂ ਹੈ|

ਪੰਜਾਬ ਤੋਂ ਸੰਗਰੂਰ ਦੇ ਇੱਕ ਕਿਸਾਨ ਭਾਗ ਸਿੰਘ ਨੇ ਕਿਹਾ, "ਨਿਜ਼ਾਮ ਵੱਲੋਂ ਇੱਥੇ ਗੁਸਲਖਾਨਿਆਂ 'ਚ ਬਿਲਕੁਲ ਵੀ ਪਾਣੀ ਮੁੱਹਈਆ ਨਹੀਂ ਕਰਾਇਆ ਜਾ ਰਿਹਾ, ਜੋ ਕਿ ਗਲਤ ਹੈ| ਅਸੀਂ ਬਿਮਾਰੀਆਂ ਨਾਲ ਮਰ ਜਾਵਾਂਗੇ ਪਰ ਆਪਣੀਆਂ ਮੰਗੇ ਜਾਣ ਤੱਕ ਨਹੀਂ ਜਾਵਾਂਗੇ|"

ਅੱਜ ਕਿਸਾਨਾਂ ਦੇ ਮੁਜ਼ਾਹਰੇ ਦੇ 20ਵੇਂ ਦਿਨ 'ਚ ਦਾਖਲ ਹੋਣ ਦੇ ਨਾਲ ਹੀ ਸਿੰਘੂ (ਦਿੱਲੀ-ਹਰਿਆਣਾ) ਬਾਰਡਰ 'ਤੇ ਰੈਪਿਡ ਐਕਸ਼ਨ ਫੋਰਸ ਅਤੇ ਹੋਰ ਦਸਤੇ ਤਾਇਨਾਤ ਕਰ ਦਿੱਤੇ ਗਏ ਹਨ|

ਦੱਸਣਯੋਗ ਹੈ ਕਿ ਕਿਸਾਨ ਬੀਤੀ 26 ਨਵੰਬਰ ਤੋਂ ਕੌਮੀ ਰਾਜਧਾਨੀ ਦੇ ਵੱਖੋ-ਵੱਖਰੇ ਬਰਡਰਾਂ 'ਤੇ 3 ਨਵੇਂ ਖੇਤੀ ਬਿੱਲਾਂ ਕਿਸਾਨ ਉਪਜ,ਵਪਾਰ ਅਤੇ ਵਣਜ ਬਿੱਲ(ਤਰੱਕੀ ਅਤੇ ਸਹੂਲਤ), 2020 , ਕਿਸਾਨ (ਸਸ਼ਕਤੀਕਰਨ ਅਤੇ ਰੱਖਿਆ) ਸਮਰਥਨ ਮੁੱਲ ਸਮਝੌਤਾ ਅਤੇ ਖੇਤੀ ਸੇਵਾਵਾਂ ਬਿੱਲ,2020 ਅਤੇ ਜ਼ਰੂਰੀ ਵਸਤਾਂ(ਸੋਧ) ਬਿੱਲ,2020 ਦਾ ਵਿਰੋਧ ਕਰ ਰਹੇ ਹਨ|