10.83C Vancouver 10.83C VancouverMar 15, 2021 9:18 AM -
ਕੇਂਦਰ ਸਰਕਾਰ ਦੇ ਖੇਤੀ ਕਾਨੂੰਨਾਂ ਦੇ ਵਿਰੋਧ 'ਚ ਦਿੱਤੇ ਜਾ ਰਹੇ ਕਿਸਾਨਾਂ ਦੇ ਧਰਨੇ ਕਰਕੇ ਬੰਦ ਗ਼ਾਜ਼ੀਪੁਰ ਬਾਰਡਰ ਅੱਜ ਸੋਮਵਾਰ ਨੂੰ ਆਵਾਜਾਈ ਲਈ ਖੋਲ ਦਿੱਤਾ ਗਿਆ ਹੈ।
ਹਾਲਾਕਿ ਇਹ ਆਵਾਜਾਈ ਕੌਮੀ ਰਾਜਧਾਨੀ ਤੋਂ ਉੱਤਰ ਪ੍ਰਦੇਸ਼ ਜਾਣ ਵਾਲਿਆਂ ਲਈ ਹੀ ਚਾਲੂ ਕੀਤੀ ਗਈ ਹੈ।
ਦਿੱਲੀ ਤੋਂ ਗ਼ਾਜ਼ਿਆਬਾਦ ਜਾਣ ਵਾਲੇ ਕੌਮੀ ਹਾਈਵੇ-24 ਨੂੰ ਖੋਲਣ ਦਾ ਫ਼ੈਲਸਾ ਦਿੱਲੀ ਪੁਲਿਸ ਅਤੇ ਗ਼ਾਜ਼ਿਆਬਾਦ ਜ਼ਿਲੇ ਦੇ ਪੁਲਿਸ ਅਧਿਕਾਰੀਆਂ ਵੱਲੋਂ ਸਲਾਹ ਕਰਕੇ ਲਿਆ ਗਿਆ ਹੈ।
"ਗਾਜ਼ੀਪੁਰ ਬਾਰਡਰ 'ਤੇ ਚੱਲ ਰਹੇ ਕਾਨੂੰਨ ਅਤੇ ਹੁਕਮ ਦੇ ਮੌਜੂਦਾ ਹਾਲਾਤ ਮੁਤਾਬਕ ਅਤੇ ਜਨਤਾ ਦੀ ਸਹੂਲੀਅਤ ਨੂੰ ਵੇਖਦਿਆਂ, ਦਿੱਲੀ ਤੋਂ ਗ਼ਾਜ਼ਿਆਬਾਦ ਜਾਂਦਾ ਕੌਮੀ ਰਾਹ-੨੪ ਉੱਤਰ ਪ੍ਰਦੇਸ਼ ਦੀ ਗ਼ਾਜ਼ਿਆਬਾਦ ਪੁਲਿਸ ਨਾਲ ਗੱਲ-ਬਾਤ ਕਰਕੇ ਖੋਲ ਦਿੱਤਾ ਗਿਆ ਹੈ,"ਦਿੱਲੀ ਪੁਲਿਸ ਨੇ ਆਖਿਆ।
ਦਿੱਲੀ ਪੁਲਿਸ ਨੇ ਟਵੀਟ ਕਰਕੇ ਦੱਸਿਆ,"ਆਵਾਜਾਈ ਚੇਤਾਵਨੀ: ਦਿੱਲੀ ਤੋਂ ਗ਼ਾਜ਼ੀਪੁਰ ਜਾਣ ਵਾਲੇ ਗ਼ਾਜ਼ੀਪੁਰ ਬਾਰਡਰ ਨੂੰ ਆਵਾਜਾਈ ਲਈ ਖੋਲ ਦਿੱਤਾ ਗਿਆ ਹੈ।"
ਦੱਸਣਯੋਗ ਹੈ ਕਿ 26 ਜਨਵਰੀ ਨੂੰ ਹੋਈ ਹਿੰਸਾ ਤੋਂ ਬਾਅਦ, ਉਸ ਦਿਨ ਤੋਂ ਹੀ ਬੰਦ ਕੀਤੇ ਗ਼ਾਜ਼ੀਪੁਰ ਬਾਰਡਰ ਨੂੰ 2 ਮਾਰਚ ਨੂੰ ਹੀ ਵਾਹਨਾਂ ਲਈ ਖੋਲ ਦਿੱਤਾ ਗਿਆ ਸੀ।
ਉਸ ਤੋਂ ਬਾਅਦ ਬਾਰਡਰ ਨੂੰ ਆਵਾਜਾਈ ਲਈ ਬੰਦ ਕਰ ਦਿੱਤਾ ਗਿਆ ਸੀ।
ਗ਼ੌਰਤਲਬ ਹੈ ਕਿ ਗ਼ਾਜ਼ੀਪੁਰ ਬਾਰਡਰ ਵੀ ਸ਼ਹਿਰ ਦੇ ਹੋਰਨਾਂ ਬਾਰਡਰਾਂ 'ਚੋਂ ਇੱਕ ਹੈ, ਜਿੱਥੇ ਕਿਸਾਨ ਬੀਤੇ ਸਾਲ ਦੀ 26 ਨਵੰਬਰ ਤੋਂ ਹੀ ਭਾਰਤ ਸਰਕਾਰ ਵਲੋਂ ਪਾਸ ਕੀਤੇ ਤਿੰਨ ਨਵੇਂ ਖੇਤੀ ਬਿੱਲਾਂ-ਉਪਜ,ਵਪਾਰ ਅਤੇ ਵਣਜ ਬਿੱਲ(ਤਰੱਕੀ ਅਤੇ ਸਹੂਲਤ), 2020, ਕਿਸਾਨ (ਸਸ਼ਕਤੀਕਰਨ ਅਤੇ ਰੱਖਿਆ) ਸਮਰਥਨ ਮੁੱਲ ਸਮਝੌਤਾ ਅਤੇ ਖੇਤੀ ਸੇਵਾਵਾਂ ਬਿੱਲ,2020 ਅਤੇ ਜ਼ਰੂਰੀ ਵਸਤਾਂ(ਸੋਧ) ਬਿੱਲ,2020 ਦਾ ਵਿਰੋਧ ਕਰ ਰਹੇ ਹਨ।
ਜ਼ਿਕਰਯੋਗ ਹੈ ਕਿ ਜਦੋਂ ਕਾਨੂੰਨਾਂ ਖ਼ਿਲਾਫ਼ ਇਕੱਠੇ ਹੋਏ ਕਿਸਾਨਾਂ ਵੱਲੋਂ ਗ਼ਾਜ਼ੀਪੁਰ ਬਾਰਡਰ 'ਤੇ ਪੁਲਿਸ ਦੇ ਬੈਰੀਕੇਡ ਤੋੜਨ ਦੀ ਕੋਸ਼ਿਸ਼ ਕੀਤੀ ਗਈ, ਤਾਂ ਉੱਤਰ ਪ੍ਰਦੇਸ਼ ਤੋਂ ਦਿੱਲੀ ਜਾਣ ਵਾਲੇ ਕੌਮੀ ਰਾਹ-24 ਨੂੰ ਪਹਿਲੀ ਵਾਰ ਬੀਤੇ ਸਾਲ 3 ਦਸੰਬਰ ਨੂੰ ਆਵਾਜਾਈ ਲਈ ਬੰਦ ਕਰ ਦਿੱਤਾ ਗਿਆ ਸੀ।
