ਫੈਡਰਲ ਤੇ ਸੂਬੇ ਦੇ ਲੀਡਰਜ਼ ਨੇ ਹੌਂਡਾ ਦੇ ਕੈਨੇਡਾ ਤੋਂ ਬਾਹਰ ਜਾਣ ਨੂੰ ਦੱਸਿਆ ਅਫਵਾਹ

ਕੈਨੇਡਾ ਦੀ ਇੰਡਸਟਰੀ ਮਿਨਿਸਟਰ ਅਨੀਤਾ ਅਨੰਦ ਅਤੇ ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਨੇ ਹੌਂਡਾ ਦੇ ਕੈਨੇਡਾ ਛੱਡ ਕੇ ਜਾਣ ਦੀਆਂ ਰਿਪੋਰਟਸ ਦਾ ਖੰਡਨ ਕੀਤਾ ਹੈ। ਇੰਡਸਟਰੀ ਮਿਨਿਸਟਰ ਅਨੀਤਾ ਅਨੰਦ ਨੇ ਕਿਹਾ ਕਿ ਉਹ ਹੌਂਡਾ ਦੇ ਅਧਿਕਾਰੀਆਂ ਨਾਲ ਸੰਪਰਕ ਵਿਚ ਹਨ ਅਤੇ ਦਾਅਵਾ ਕੀਤਾ ਕਿ ਕੰਪਨੀ ਫਿਲਹਾਲ ਕੈਨੇਡਾ ਤੋਂ ਆਪਣਾ ਕੋਈ ਵੀ ਉਤਪਾਦਨ ਅਮਰੀਕਾ ਲਿਜਾਣ ਦਾ ਵਿਚਾਰ ਨਹੀਂ ਕਰ ਰਹੀ।

ਉਨ੍ਹਾਂ ਕਿਹਾ ਕਿ ਉਹ ਅੱਜ ਸ਼ਾਮ ਹੋਂਡਾ ਕੈਨੇਡਾ ਦੇ ਸੀ. ਈ. ਓ. ਨਾਲ ਮੁਲਾਕਾਤ ਵੀ ਕਰਨਗੇ। ਉਥੇ ਹੀ, ਐੱਨ. ਡੀ. ਪੀ. ਲੀਡਰ ਜਗਮੀਤ ਸਿੰਘ ਨੇ ਕਿਹਾ ਕਿ ਕੈਨੇਡਾ ਨੇ ਆਟੋ ਸੈਕਟਰ ਅਤੇ ਇਸ ਨਾਲ ਸਬੰਧਤ ਇਨਫਰਾਸਟਕਚਰ ਵਿਚ ਭਾਰੀ ਨਿਵੇਸ਼ ਕੀਤਾ ਹੈ ਅਤੇ ਕੈਨੇਡਾ ਖਪਤਕਾਰ ਦਾ ਇੱਕ ਵੱਡਾ ਅਤੇ ਵਧਦਾ ਬਾਜ਼ਾਰ ਹੈ ਜੋ ਇਸ ਨੂੰ ਕਾਰ ਕੰਪਨੀਆਂ ਲਈ ਇੱਕ ਪਸੰਦੀਦਾ ਬਾਜ਼ਾਰ ਬਣਾਉਂਦਾ ਹੈ।

ਉਨ੍ਹਾਂ ਕਿਹਾ ਕਿ ਜੇ ਕੰਪਨੀਆਂ ਕੈਨੇਡਾ ਦੇ ਲੋਕਾਂ ਨੂੰ ਕਾਰਾਂ ਵੇਚਣਾ ਚਾਹੁੰਦੀਆਂ ਹਨ ਤਾਂ ਉਨ੍ਹਾਂ ਨੂੰ ਇੱਥੇ ਹੀ ਨਿਰਮਾਣ ਕਰਨਾ ਹੋਵੇਗਾ।