ਆਗਾਮੀ ਫੈਡਰਲ ਬਜਟ ਵਿਚ ਵਰਕਰਜ਼ ਲਈ ਨਵੇਂ ਸਪੋਰਟ ਪ੍ਰੋਗਰਾਮ ਕੀਤੇ ਜਾਣਗੇ ਸ਼ੁਰੂ: ਪੈਟੀ ਹਾਜਦੂ

ਕੈਨੇਡਾ ਦੀ ਜੌਬਸ ਮਿਨਿਸਟਰ ਪੈਟੀ ਹਾਜਦੂ ਨੇ ਆਗਾਮੀ ਫੈਡਰਲ ਬਜਟ ਵਿਚ ਵਰਕਰਜ਼ ਲਈ ਨਵੇਂ ਸਪੋਰਟ ਪ੍ਰੋਗਰਾਮ ਸ਼ੁਰੂ ਕੀਤੇ ਜਾਣ ਦਾ ਐਲਾਨ ਕੀਤਾ ਹੈ। ਇਨ੍ਹਾਂ ਉਪਾਵਾਂ ਦਾ ਉਦੇਸ਼ ਮੇਜਰ ਇਨਫਰਾਸਟਕਚਰ ਹੈਲਥ ਕੇਅਰ ਅਤੇ ਲੱਖਾਂ ਘਰਾਂ ਦੇ ਨਿਰਮਾਣ ਵਾਸਤੇ ਦੇਸ਼ ਵਿਚ ਸਕਿਲਡ ਵਰਕਫੋਰਸ ਦੀ ਘਾਟ ਨੂੰ ਦੂਰ ਕਰਨਾ ਹੈ।

ਇਸ ਕਦਮ ਤਹਿਤ ਕੈਨੇਡੀਅਨ ਬਿਲਡਰ ਦੀ ਨਵੀਂ ਪੀੜੀ ਨੂੰ ਟ੍ਰੇਨਿੰਗ ਦੇਣ ਲਈ ਯੂਨੀਅਨ ਸਿਖਲਾਈ ਅਤੇ ਨਵੀਨਤਾ ਪ੍ਰੋਗਰਾਮ ਦਾ ਵਿਸਥਾਰ ਕੀਤਾ ਜਾਵੇਗਾ, ਜਿਸ ਲਈ ਬਜਟ ਵਿਚ ਤਿੰਨ ਸਾਲਾਂ ਵਾਸਤੇ $75 ਮਿਲੀਅਨ ਅਲਾਟ ਕੀਤੇ ਜਾਣਗੇ।

ਦੂਜਾ, ਬਜਟ ਵਿਚ ਨਵਾਂ ਪਰਸਨਲ ਸਪੋਰਟ ਵਰਕਰ ਟੈਕਸ ਕ੍ਰੈਡਿਟ ਸ਼ਾਮਲ ਹੋਵੇਗਾ, ਜਿਸ ਤਹਿਤ ਯੋਗ ਕਾਮੇ $1,100 ਤੱਕ ਦਾ ਸਾਲਾਨਾ ਰਿਫੰਡਏਬਲ ਟੈਕਸ ਕ੍ਰੈਡਿਟ ਕਲੇਮ ਕਰ ਸਕਣਗੇ। ਇਸ ਤੋਂ ਇਲਾਵਾ ਵਿਦੇਸ਼ੀ ਸਿਖਲਾਈ ਪ੍ਰਾਪਤ ਪੇਸ਼ੇਵਰ ਨੂੰ ਕੈਨੇਡਾ ਦੀ ਵਰਕਫੋਰਸ ਦਾ ਜਲਦ ਹਿੱਸਾ ਬਣਾਉਣ ਲਈ ਫੈਡਰਲ ਸਰਕਾਰ ਸੂਬਿਆਂ ਨਾਲ ਮਿਲ ਕੇ ਇਸ ਪ੍ਰਕਿਰਿਆ ਨੂੰ ਆਸਾਨ ਬਣਾਏਗੀ।

ਹਾਜਦੂ ਨੇ ਕਿਹਾ ਕਿ ਲੇਬਰ ਮੋਬੀਲਿਟੀ ਨੂੰ ਸੌਖਾ ਬਣਾਉਣ ਲਈ 4 ਨਵੰਬਰ ਨੂੰ ਪੇਸ਼ ਕੀਤੇ ਜਾਣ ਵਾਲੇ ਬਜਟ ਵਿਚ ਕੈਨੇਡਾ ਲੇਬਰ ਕੋਡ ਵਿਚ ਸੋਧ ਕੀਤਾ ਜਾਣਾ ਵੀ ਸ਼ਾਮਲ ਹੈ।