24.72C Vancouver 24.72C VancouverAug 6, 2026 6:33 PM - Connect Newsroom - Ramanpreet kaur with files from The Canadian Press
ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਦੀ ਸਰਕਾਰ ਨੇ ਸ਼ਰਨਾਰਥੀ ਅਤੇ ਸ਼ਰਣ ਮੰਗਣ ਵਾਲਿਆਂ ਲਈ ਹੈਲਥ ਕੇਅਰ ਸਰਵਿਸਿਜ਼ ਵਿਚ ਕੀਤੀਆਂ ਗਈਆਂ ਕਟੌਤੀਆਂ ਨੂੰ ਵਾਪਸ ਲੈਂਦੇ ਹੋਏ ਪੂਰੀ ਕਵਰੇਜ ਨੂੰ ਮੁੜ ਬਹਾਲ ਕਰ ਦਿੱਤਾ ਹੈ। ਸਰਕਾਰ ਨੇ ਇਸੇ ਸਾਲ 1 ਮਈ ਨੂੰ ਅੰਤਰਿਮ ਫੈਡਰਲ ਹੈਲਥ ਪ੍ਰੋਗਰਾਮ ਅਧੀਨ ਨਵੇਂ ਨਿਯਮ ਲਾਗੂ ਕੀਤੇ ਸਨ।
ਇਸ ਤਹਿਤ ਸ਼ਰਨਾਰਥੀਆਂ ਨੂੰ ਦਵਾਈਆਂ ਲਈ $4 ਦੀ ਸਹਿ-ਭੁਗਤਾਨ ਅਤੇ ਦੰਦਾਂ ਦੀ ਦੇਖਭਾਲ, ਅੱਖਾਂ ਦੇ ਇਲਾਜ, ਫਿਜ਼ੀਓਥੈਰੇਪੀ ਅਤੇ ਮਾਨਸਿਕ ਸਿਹਤ ਸਬੰਧੀ ਸਪਲੀਮੈਂਟਲ ਸਰਵਿਸਸ ਦਾ 30 ਫੀਸਦੀ ਖ਼ਰਚਾ ਖ਼ੁਦ ਚੁੱਕਣ ਲਈ ਕਿਹਾ ਗਿਆ ਸੀ। ਇਨ੍ਹਾਂ ਕਟੌਤੀਆਂ ਦਾ ਫਰੰਟਲਾਈਨ ਡੌਕਟਰਜ਼, ਮਨੁੱਖੀ ਅਧਿਕਾਰ ਸੰਗਠਨਾਂ ਅਤੇ ਸਮਾਜਿਕ ਕਾਰਕੁਨਾਂ ਵੱਲੋਂ ਵਿਰੋਧ ਕੀਤਾ ਜਾ ਰਿਹਾ ਸੀ।
ਉਨ੍ਹਾਂ ਦਾ ਤਰਕ ਸੀ ਕਿ ਇਸ ਨਾਲ ਸਭ ਤੋਂ ਕਮਜ਼ੋਰ ਤਬਕੇ ਦੇ ਲੋਕ ਇਲਾਜ ਵਿਚ ਦੇਰੀ ਦਾ ਸਾਹਮਣਾ ਕਰ ਸਕਦੇ ਹਨ। ਚੌਤਰਫ਼ਾ ਦਬਾਅ ਮਗਰੋਂ ਸਰਕਾਰ ਨੇ ਹੁਣ ਆਪਣੇ ਫੈਸਲੇ ਨੂੰ ਪਲਟ ਦਿੱਤਾ ਹੈ। ਉਥੇ ਹੀ, ਕੰਜ਼ਰਵੇਟਿਵ ਪਾਰਟੀ ਇਸ ਪ੍ਰੋਗਰਾਮ ਦੀ ਵਧਦੀ ਲਾਗਤ 'ਤੇ ਸਵਾਲ ਉਠਾ ਚੁੱਕੀ ਹੈ।
ਰਿਪੋਰਟਸ ਮੁਤਾਬਕ, ਸ਼ਰਨਾਰਥੀਆਂ ਲਈ ਇਸ ਹੈਲਥ ਕੇਅਰ ਪ੍ਰੋਗਰਾਮ 'ਤੇ ਸਰਕਾਰੀ ਖ਼ਰਚ ਸਾਲ 2020-21 ਵਿਚ $210 ਮਿਲੀਅਨ ਸੀ, ਜੋ ਸਾਲ 2024-25 ਵਿਚ ਵੱਧ ਕੇ $896 ਮਿਲੀਅਨ ਤੱਕ ਪਹੁੰਚ ਗਿਆ ਅਤੇ ਸਰਕਾਰ ਵਲੋਂ ਸਹਿ-ਭੁਗਤਾਨ ਲਾਗੂ ਕੀਤੇ ਜਾਣ ਮਗਰੋਂ PBO ਨੇ 2026-27 ਵਿਚ $162 ਮਿਲੀਅਨ ਦੀ ਬਚਤ ਹੋਣ ਦਾ ਅਨੁਮਾਨ ਲਗਾਇਆ ਸੀ।
