ਫੈਡਰਲ ਐਨ.ਡੀ.ਪੀ. ਕਨਵੈਨਸ਼ਨ ਵਿਨੀਪੈਗ ਵਿੱਚ ਸ਼ੁਰੂ

ਕੈਨੇਡਾ ਦੀ ਫੈਡਰਲ ਐਨ.ਡੀ.ਪੀ. ਦਾ ਰਾਸ਼ਟਰੀ ਸੰਮੇਲਨ ਅੱਜ ਵਿਨੀਪੈਗ ਵਿਖੇ ਸ਼ੁਰੂ ਹੋ ਗਿਆ ਹੈ। ਇਸ ਤਿੰਨ-ਰੋਜ਼ਾ ਸੰਮੇਲਨ ਦਾ ਮੁੱਖ ਉਦੇਸ਼ ਪਾਰਟੀ ਦੇ ਨਵੇਂ ਲੀਡਰ ਦੀ ਚੋਣ ਕਰਨਾ ਅਤੇ ਭਵਿੱਖ ਦੀਆਂ ਨੀਤੀਆਂ 'ਤੇ ਚਰਚਾ ਕਰਨਾ ਹੈ। ਇਸ ਵੀਕੈਂਡ ਦੇ ਅੰਤ ਤੱਕ ਪਾਰਟੀ ਨੂੰ ਆਪਣਾ ਨਵਾਂ ਫੈਡਰਲ ਲੀਡਰ ਮਿਲ ਜਾਵੇਗਾ, ਜੋ ਪਿਛਲੀਆਂ ਚੋਣਾਂ ਵਿਚ ਪਾਰਟੀ ਦੀ ਹੋਈ ਕਰਾਰੀ ਹਾਰ ਤੋਂ ਬਾਅਦ ਮੁੜ ਇਸ ਨੂੰ ਉਭਾਰਨ ਦੀ ਕਮਾਨ ਸੰਭਾਲੇਗਾ।

ਲੀਡਰਸ਼ਿਪ ਲਈ ਮੈਦਾਨ ਵਿਚ ਪੰਜ ਉਮੀਦਵਾਰ ਹਨ, ਜਿਨ੍ਹਾਂ ਵਿਚ ਫਿਲਮ ਨਿਰਮਾਤਾ ਐਵੀ ਲੇਵਿਸ, ਐਡਮਿੰਟਨ ਤੋਂ ਐਮਪੀ ਹੀਥਰ ਮੈਕਫਰਸਨ, ਲੇਬਰ ਯੂਨੀਅਨ ਲੀਡਰ ਰੌਬ ਐਸ਼ਟਨ, ਸੋਸ਼ਲ ਵਰਕਰ ਟੈਨਿਲੇ ਜੌਹਨਸਟਨ ਅਤੇ ਕਿਸਾਨ ਟੋਨੀ ਮੈਕਕੁਏਲ ਸ਼ਾਮਲ ਹਨ। ਜਗਮੀਤ ਸਿੰਘ ਦੀ ਜਗ੍ਹਾ ਨਵੇਂ ਪਰਮਾਨੈਂਟ ਲੀਡਰ ਦੀ ਚੋਣ ਲਈ ਪਾਰਟੀ ਦੀ ਵੋਟਿੰਗ ਪ੍ਰਕਿਰਿਆ ਸ਼ਨੀਵਾਰ ਸ਼ਾਮ ਨੂੰ ਸਮਾਪਤ ਹੋਵੇਗੀ ਅਤੇ ਨਵੇਂ ਲੀਡਰ ਦਾ ਅਧਿਕਾਰਤ ਐਲਾਨ ਐਤਵਾਰ ਸਵੇਰ ਨੂੰ ਕੀਤਾ ਜਾਵੇਗਾ।

ਗੌਰਤਲਬ ਹੈ ਕਿ 1 ਅਕਤੂਬਰ 2017 ਤੋਂ 28 ਅਪ੍ਰੈਲ 2025 ਤੱਕ ਫੈਡਰਲ ਐਨ.ਡੀ.ਪੀ. ਦੀ ਅਗਵਾਈ ਜਗਮੀਤ ਸਿੰਘ ਕਰ ਰਹੇ ਸਨ ਪਰ ਪਿਛਲੀਆਂ ਚੋਣਾਂ ਵਿਚ ਪਾਰਟੀ ਦੀ ਵੱਡੀ ਹਾਰ ਅਤੇ ਖੁਦ ਦੀ ਸੀਟ ਹਾਰਨ ਤੋਂ ਬਾਅਦ ਉਨ੍ਹਾਂ ਅਸਤੀਫਾ ਦੇ ਦਿੱਤਾ ਸੀ।