ਫੈਡਰਲ ਐਨ.ਡੀ.ਪੀ. ਨੇ ਲੀਡਰਸ਼ਿਪ ਦੌੜ ਕੀਤੀ ਸ਼ੁਰੂ

ਕੈਨੇਡਾ ਦੀ ਫੈਡਰਲ ਨਿਊ ਡੈਮੋਕ੍ਰੇਟਿਕ ਪਾਰਟੀ ਨੇ ਜਗਮੀਤ ਸਿੰਘ ਦੀ ਥਾਂ ਆਪਣੇ ਅਗਲੇ ਨਵੇਂ ਲੀਡਰ ਦੀ ਚੋਣ ਲਈ ਰਸਮੀ ਤੌਰ 'ਤੇ ਦੌੜ ਸ਼ੁਰੂ ਕਰ ਦਿੱਤੀ ਹੈ। ਲੀਡਰਸ਼ਿਪ ਦੌੜ ਵਿਚ ਵੋਟ ਪਾਉਣ ਦੇ ਯੋਗ ਹੋਣ ਲਈ ਨਵੇਂ ਐਨ.ਡੀ.ਪੀ. ਮੈਂਬਰਾਂ ਨੂੰ 28 ਜਨਵਰੀ 2026 ਤੋਂ ਪਹਿਲਾਂ ਰਜਿਸਟਰ ਹੋਣਾ ਲਾਜ਼ਮੀ ਹੈ ਅਤੇ ਉਮੀਦਵਾਰਾਂ ਨੂੰ 31 ਜਨਵਰੀ ਤੱਕ ਬੈਲਟ 'ਤੇ ਰਜਿਸਟਰ ਹੋਣਾ ਹੋਵੇਗਾ।

ਐਨ.ਡੀ.ਪੀ. ਪ੍ਰਧਾਨ ਮੈਰੀ ਸ਼ਾਰਟਾਲ ਨੇ ਬਿਆਨ ਵਿਚ ਇਸ ਲੀਡਰਸ਼ਿਪ ਰੇਸ ਨੂੰ ਪਾਰਟੀ ਮੈਂਬਰ ਅਤੇ ਦੇਸ਼ ਭਰ ਦੇ ਲੋਕਾਂ ਲਈ ਇੱਕ ਦਿਲਚਸਪ ਮੌਕੇ ਵਜੋਂ ਕਰਾਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਮੈਂ ਸਮਝਦੀ ਹਾਂ ਕਿ ਸਾਡੇ ਮੈਂਬਰ ਇਸ ਮੁਕਾਬਲੇਬਾਜ਼ੀ ਵਿਚ ਹਿੱਸਾ ਲੈਣ ਲਈ ਉਤਸੁਕ ਹਨ।

ਗੌਰਤਲਬ ਹੈ ਕਿ ਜਗੀਮਤ ਸਿੰਘ ਨੇ 28 ਅਪ੍ਰੈਲ ਦੇ ਚੋਣ ਨਤੀਜਿਆਂ ਵਿਚ ਆਪਣੀ ਹਾਰ ਅਤੇ ਪਾਰਟੀ ਦੇ ਨਿਰਾਸ਼ਾਜਨਕ ਪ੍ਰਦਰਸ਼ਨ ਤੋਂ ਬਾਅਦ ਅਹੁਦਾ ਛੱਡਣ ਦੀ ਘੋਸ਼ਣਾ ਕਰ ਦਿੱਤੀ ਸੀ। 5 ਮਈ ਨੂੰ ਵੈਨਕੂਵਰ ਕਿੰਗਸਵੇ ਤੋਂ ਐਮ.ਪੀ. ਡੌਨ ਡੇਵਿਸ ਨੂੰ ਅੰਤਰਿਮ ਆਗੂ ਚੁਣਿਆ ਗਿਆ ਸੀ।

ਹੁਣ ਐਨ.ਡੀ.ਪੀ. ਮੈਂਬਰ ਨਵੇਂ ਸਾਲ ਵਿਚ 27 ਮਾਰਚ ਤੋਂ 29 ਮਾਰਚ ਤੱਕ ਨਵੇਂ ਲੀਡਰ ਦੀ ਚੋਣ ਲਈ ਵੋਟ ਕਰਨਗੇ ਅਤੇ 29 ਮਾਰਚ 2026 ਨੂੰ ਹੀ ਵਿਨੀਪੈਗ ਵਿਚ ਪਾਰਟੀ ਸੰਮੇਲਨ ਵਿਚ ਨਤੀਜੇ ਦੀ ਘੋਸ਼ਣਾ ਹੋਵੇਗੀ।