ਟਰੂਡੋ ਦੀ ਸਰਕਾਰ ਵਿਚ ਪਾਬਲੋ ਰੌਡਰਿਗਜ਼੍ਰ ਅਗਲੇ ਹਫ਼ਤੇ ਦੇ ਸਕਦੇ ਹਨ ਅਸਤੀਫ਼ਾ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਸਰਕਾਰ ਵਿਚ ਟਰਾਂਸਪੋਰਟ ਮੰਤਰੀ ਪਾਬਲੋ ਰੌਡਰਿਗਜ਼੍ਰ ਅਗਲੇ ਹਫ਼ਤੇ ਅਸਤੀਫਾ ਦੇ ਸਕਦੇ ਹਨ। ਜਾਣਕਾਰੀ ਮੁਤਾਬਕ, ਰੌਡਰਿਗਜ਼੍ਰ ਕਿਊਬੈਕ ਵਿਚ ਲਿਬਰਲ ਪਾਰਟੀ ਦੀ ਵਾਗਡੋਰ ਸੰਭਾਲਣ ਲਈ ਪ੍ਰਧਾਨਗੀ ਦੀ ਦੌੜ ਵਿਚ ਸ਼ਾਮਲ ਹੋ ਰਹੇ ਹਨ। ਉਨ੍ਹਾਂ ਵਲੋਂ ਵੀਰਵਾਰ ਨੂੰ ਅਸਤੀਫੇ ਦੀ ਘੋਸ਼ਣਾ ਕੀਤੀ ਜਾ ਸਕਦੀ ਹੈ। ਕਿਊਬੈਕ ਵਿਚ ਲਿਬਰਲ ਪਾਰਟੀ 2022 ਦੀਆਂ ਸੂਬਾਈ ਚੋਣਾਂ ਤੋਂ ਬਾਅਦ ਬਿਨਾਂ ਲੀਡਰ ਦੇ ਚੱਲ ਰਹੀ ਹੈ।

ਹਾਲਾਂਕਿ, ਲਿਬਰਲ ਪਾਰਟੀ ਆਫ਼ ਕਿਊਬੈਕ ਦੇ ਲੀਡਰਸ਼ਿਪ ਦੌੜ ਰਸਮੀ ਤੌਰ ’ਤੇ 2025 ਵਿਚ ਸ਼ੁਰੂ ਹੋਵੇਗੀ ਅਤੇ ਨਵੇਂ ਲੀਡਰ ਦੀ ਘੋਸ਼ਣਾ 14 ਜੂਨ ਨੂੰ ਕਿਊਬੈਕ ਸਿਟੀ ਵਿਚ ਕੀਤੀ ਜਾਵੇਗੀ।

ਗੌਰਤਲਬ ਹੈ ਕਿ ਰੌਡਰਿਗਜ਼੍ਰ ਦੇ ਟਰੂਡੋ ਮੰਤਰੀ ਮੰਡਲ ਛੱਡੇ ਜਾਣ ਦੀ ਖ਼ਬਰ ਉਸ ਸਮੇਂ ਆਈ ਹੈ ਜਦੋਂ ਮਾਂਟਰੀਅਲ ਜ਼ਿਮਨੀ ਚੋਣ ਵਿਚ ਲਿਬਰਲਸ ਨੇ ਬਲਾਕ ਕਿਊਬੈਕਵਾ ਤੋਂ ਕਰਾਰੀ ਹਾਰ ਦਾ ਸਾਹਮਣਾ ਕੀਤਾ ਹੈ ਅਤੇ ਆਗਾਮੀ ਚੋਣਾਂ ਤੋਂ ਪਹਿਲਾਂ ਕਈ ਲਿਬਰਲ ਐੱਮ.ਪੀ. ਅਗਲੇ ਇਲੈਕਸ਼ਨ ਨਾ ਲੜਨ ਦੀ ਘੋਸ਼ਣਾ ਕਰ ਚੁੱਕੇ ਹਨ। ਕਿਹਾ ਜਾਂਦਾ ਹੈ ਕਿ ਰੌਡਰਿਗਜ਼੍ਰ ਦੇ ਮੰਤਰੀ ਮੰਡਲ ਛੱਡਣ ਦਾ ਫੈਸਲਾ ਟਰੂਡੋ ਲਈ ਇੱਕ ਹੋਰ ਝਟਕਾ ਹੋਵੇਗਾ।