16.71C Vancouver 16.71C VancouverJul 31, 2020 9:38 PM -
ਕੈਨੇਡਾ ਦੇ ਅਟੌਰਨੀ ਜਨਰਲ ਦੇ ਵਕੀਲਾਂ ਵੱਲੋਂ ਪੇਸ਼ ਕੀਤੇ ਗਏ ਦਸਤਾਵੇਜ਼ਾਂ 'ਚ ਦੱਸਿਆ ਗਿਆ ਹੈ ਕਿ ਕਈ ਐਸੇ ਗਵਾਹ ਹਨ ਜੋ ਕਿ ਸਾਬਿਤ ਕਰਨਗੇ ਕਿ ਵੁਆਵੇ ਐਗਜ਼ੀਕਿਊਟਿਵ ਮੰਗ ਵਾਂਜੋ ਨੇ ਐਚ.ਐਸ.ਬੀ.ਸੀ. ਬੈਂਕ ਨੂੰ ਇਰਾਨ ਦੀ ਸਕਾਈਕੌਮ ਕੰਪਨੀ ਨਾਲ ਆਪਣੇ ਰਿਸ਼ਤਿਆਂ ਸੰਬੰਧੀ ਝੂਠ ਕਿਹਾ ਸੀ।
ਸ਼ੁੱਕਰਵਾਰ ਨੂੰ ਜਾਰੀ ਕੀਤੇ ਗਏ ਦਸਤਾਵੇਜ਼ਾਂ ਦੀ ਵਰਤੋਂ ਅਗਲੇ ਸਾਲ ਅਪ੍ਰੈਲ ਦੇ ਮਹੀਨੇ 'ਚ ਪੇਸ਼ ਕੀਤੀਆਂ ਜਾਣ ਵਾਲੀਆਂ ਦਲੀਲਾਂ ਦੌਰਾਨ ਹੋਵੇਗੀ ਅਤੇ ਕਿਹਾ ਗਿਆ ਹੈ ਕਿ ਇਹ ਦਸਤਾਵੇਜ਼ ਮੰਗ ਵਾਂਜੋ ਦੀ ਅਮਰੀਕਾ ਨੂੰ ਸਪੁਰਦਗੀ ਦੇ ਲਈ ਸਹਿਯੋਗ ਪ੍ਰਦਾਨ ਕਰਨ ਲਈ ਕਾਫੀ ਹਨ।
ਦਸਤਾਵੇਜ਼ਾਂ 'ਚ ਕਿਹਾ ਗਿਆ ਹੈ ਕਿ ਗਵਾਹਾਂ ਦੇ ਵਿੱਚ ਵੁਆਵੇ ਦੇ ਸਾਬਕਾ ਕਰਮਚਾਰੀ, ਐਫ.ਬੀ.ਆਈ. ਜਾਂਚ ਅਧਿਕਾਰੀ ਅਤੇ ਐਚ.ਐਸ.ਬੀ.ਸੀ. ਦੀ ਅਧਿਕਾਰੀ ਸ਼ਾਮਿਲ ਹਨ, ਅਤੇ ਇਹ ਕਹਿਣਗੇ ਕਿ ਮੰਗ ਵਾਂਜੋ ਨੇ ਝੂਠ ਕਿਹਾ ਕਿ ਵੁਆਵੇ, ਸਕਾਈਕੌਮ ਨੂੰ ਕੰਟਰੋਲ ਨਹੀਂ ਕਰਦੀ।
ਯਾਦ ਰਹੇ ਮੰਗ ਵਾਂਜੋ ਦੀ ਗ੍ਰਿਫਤਾਰੀ ਅਮਰੀਕਾ ਦੀ ਬੇਨਤੀ 'ਤੇ ਹੋਈ ਸੀ, ਜਦ ਦਿਸੰਬਰ 2018 'ਚ ਉਨ੍ਹਾਂ ਨੂੰ ਵੈਨਕੂਵਰ ਹਵਾਈ ਅੱਡੇ 'ਤੇ ਹਿਰਾਸਤ 'ਚ ਲਿਆ ਗਿਆ ਸੀ।
ਦਸਤਾਵੇਜ਼ਾਂ 'ਚ ਦੱਸਿਆ ਗਿਆ ਹੈ ਕਿ ਮੰਗ ਵਾਂਜੋ ਨੇ ਐਚ.ਐਸ.ਬੀ.ਸੀ. ਦੇ ਇੱਕ ਸੀਨੀਅਰ ਅਧਿਕਾਰੀ ਨੂੰ ਦੱਸਿਆ ਸੀ ਕਿ ਸਕਾਈਕੌਮ ਦੇ ਨਾਲ ਵੁਆਵੇ ਦੀ ਲੋਕਲ ਪੱਧਰ ਦੀ ਪਾਰਟਨਰਸ਼ਿਪ ਸੀ, ਅਤੇ ਚੀਨੀ ਕੰਪਨੀ ਨੇ ਇਰਾਨ 'ਚ ਇਸ ਕੰਪਨੀ ਦੇ ਸ਼ੇਅਰਜ਼ ਮੋੜ ਦਿੱਤੇ ਸਨ।
ਇਸ ਬੈਠਕ ਤੋਂ ਕੁਝ ਸਮੇਂ ਬਾਅਦ ਵੁਆਵੇ ਨੇ ਐਲਾਨ ਕੀਤਾ ਸੀ ਕਿ ਉਨ੍ਹਾਂ ਨੂੰ ਐਚ.ਐਸ.ਬੀ.ਸੀ. ਅਤੇ ਕਈ ਅੰਤਰਰਾਸ਼ਟਰੀ ਬੈਂਕਾਂ ਨੇ $1.5 ਬਿਲੀਅਨ ਦਾ ਲੋਨ ਦੇ ਦਿੱਤਾ ਸੀ।
