13.04C Vancouver 13.04C VancouverApr 23, 2020 4:38 PM -
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਮੁਤਾਬਕ ਫੈਡਰਲ ਸਰਕਾਰ ਕੋਵਿਡ-19 ਦੇ ਵੈਕਸੀਨ ਨੂੰ ਵਿਕਸਤ, ਟੈਸਟ ਅਤੇ ਤਿਆਰ ਕਰਨ, ਅਤੇ ਵਾਇਰਸ ਦੇ ਫੈਲਾਅ ਨੂੰ ਬੇਹਤਰ ਸਮਝਣ ਲਈ $1 ਬਿਲੀਅਨ ਤੋਂ ਵੱਧ ਖਰਚੇਗੀ।
ਇਹ ਰਕਮ ਮਾਰਚ ਵਿੱਚ ਲਿਬਰਲ ਸਰਕਾਰ ਵਲੋਂ ਰਿਸਰਚ ਲਈ ਐਲਾਨੇ ਗਏ $275 ਮਿਲੀਅਨ ਤੋਂ ਵੱਖਰੀ ਹੋਵੇਗੀ।
ਨਵੇਂ ਐਲਾਨੇ ਗਏ ਜ਼ਿਆਦਾਤਰ ਪੈਸੇ ਦੀ ਵਰਤੋਂ ਵੈਕਸੀਨ ਨੂੰ ਵਿਕਸਤ ਕਰਨ ਅਤੇ ਕਲੀਨਿਕਲ ਟਰਾਇਲ ਲਈ ਕੀਤੀ ਜਾਣੀ ਹੈ।
ਸਰਕਾਰ ਮੁਤਾਬਕ $600 ਮਿਲੀਅਨ ਅਗਲੇ ਦੋ ਸਾਲਾਂ ਵਿੱਚ ਫੈਡਰਲ ਇਨੋਵੇਸ਼ਨ ਫੰਡ ਲਈ ਇਸਤੇਮਾਲ ਕੀਤੇ ਜਾਣਗੇ ਜਿਸ ਨਾਲ ਦੇਸ਼ ਦੇ ਬਾਇਓ ਮੈਨੂਫੈਕਚਰਿੰਗ ਸੈਕਟਰ ਨੂੰ ਸਹਿਯੋਗ ਮਿਲੇਗਾ।
ਫੰਡਿੰਗ ਦਾ ਕੁਝ ਹਿੱਸਾ ਵਾਇਰਸ ਦੇ ਵੱਖ ਵੱਖ ਮਰੀਜ਼ਾਂ ਦੀ ਸਿਹਤ ਤੇ ਹੋਏ ਵੱਖਰੇ ਅਸਰ ਨੂੰ ਪਛਾਨਣ ਅਤੇ ਸਮਝਣ ਲਈ ਇਸਤੇਮਾਲ ਕੀਤਾ ਜਾਵੇਗਾ।
ਟਰੂਡੋ ਨੇ ਇੱਕ ਨਵੀਂ ਟਾਸਕ ਫੋਰਸ ਦਾ ਵੀ ਐਲਾਨ ਕੀਤਾ ਜਿਸ ਵਿੱਚ ਕੈਨੇਡਾ ਦੀ ਚੀਫ ਪਬਲਿਕ ਹੈਲਥ ਅਫਸਰ ਡਾਕਟਰ ਟਰੀਸਾ ਟੈਮ ਅਤੇ ਲੰਬਾ ਸਮਾਂ ਲਿਬਰਲ ਅਤੇ ਕੰਸਰਵੇਟਿਵ ਸਰਕਾਰਾਂ ਲਈ ਸਿਹਤ ਅਤੇ ਵਿਗਿਆਨ ਦੇ ਸਲਾਹਕਾਰ ਰਹਿ ਚੁੱਕੇ ਡਾਕਟਰ ਡੇਵਿਡ ਨੇਲਰ ਸ਼ਾਮਲ ਹੋਣਗੇ।
ਟਾਸਕ ਫੋਰਸ ਦੀ ਜ਼ਿੰਮੇਵਾਰੀ ਦੇਸ਼ ਭਰ ਵਿੱਚ ਇਮਿਊਨਿਟੀ ਨੂੰ ਸਮਝਣ ਲਈ ਕੀਤੇ ਜਾਂਦੇ ਬਲੱਡ ਟੈਸਟ ਸਰਵੇਖਣਾਂ ਉੱਤੇ ਨਿਗਰਾਨੀ ਰੱਖਣਾ ਹੋਵੇਗਾ।
