31.58C Vancouver 31.58C VancouverMar 17, 2021 3:33 PM -
ਕੈਨੇਡਾ ਦੀ ਮਿਲੀਟਰੀ ਦੀ ਇੱਕ ਪ੍ਰਮੁੱਖ ਔਰਤ ਉੱਚ ਅਧਿਕਾਰੀ ਨੇ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਹੈ।
36th ਬ੍ਰਿਗੇਡ ਗਰੁੱਪ ਦੀ ਡਿਪਟੀ ਕਮਾਂਡਰ ਲੀਊਟੈਨੇਂਟ ਕੱਲ੍ਹਨਲ ਐਲੇਨੋਰ ਟੇਲਰ ਮੁਤਾਬਕ ਆਰਮਡ ਫੋਰਸਿਜ਼ ਵਿੱਚ ਸੀਨੀਅਰ ਫੌਜੀ ਆਗੂਆਂ ਨਾਲ ਸੰਬੰਧਤ ਜਿਨਸੀ ਬਦਸਲੂਕੀ ਦੀਆਂ ਰਿਪੋਰਟਾਂ ਤੋਂ ਉਹ ਬੇਹੱਦ ਪਰੇਸ਼ਾਨ ਹਨ।
ਮਿਲੀਟਰੀ ਦੇ ਸੀਨੀਅਰ ਆਗੂਆਂ ਨੂੰ ਸੌਂਪੇ ਆਪਣੇ ਅਸਤੀਫ਼ੇ ਵਿੱਚ ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਮੁੱਦਿਆਂ ਦਾ ਇੰਨੇ ਸਮੇਂ ਬਾਅਦ ਸਾਹਮਣੇ ਆਉਣਾ ਬੇਹੱਦ ਨਿਰਾਸ਼ਾਜਨਕ ਹੈ।
ਅਫਗਾਨਿਸਤਾਨ ਵਿੱਚ ਯੁੱਧ ਦੀ ਵੈਟਰਨ, ਟੇਲਰ ਨੇ ਸੈਨਾ ਦੀਆਂ ਵਿਸ਼ੇਸ਼ ਫੌਜਾਂ ਨਾਲ ਵੀ ਸੇਵਾਵਾਂ ਨਿਭਾਈਆਂ ਹਨ ਅਤੇ ਹਾਲ ਹੀ ਵਿੱਚ ਹੈਲੀਫੈਕਸ ਵਿਚ ਰਿਜ਼ਰਵ ਯੂਨਿਟ ਦੇ ਨਾਲ ਇਕ ਉੱਚ ਅਹੁਦਾ ਸੰਭਾਲਿਆ ਹੈ।
ਟੇਲਰ ਮੁਤਾਬਕ ਉਹ ਇਨ੍ਹਾਂ ਰਿਪੋਰਟਾਂ ਤੋਂ ਬਦਕਿਸਮਤੀ ਨਾਲ ਹੈਰਾਨ ਨਹੀਂ ਹਨ ਅਤੇ ਆਪਣੇ ਮਿਲਟਰੀ ਦੇ ਸਫ਼ਰ ਦੌਰਾਨ ਉਨ੍ਹਾਂ ਨੇ ਤਾਕਤ ਦੀ ਦੁਰਵਰਤੋਂ ਜਿਣਸੀ ਸ਼ੋਸ਼ਣ ਲਈ ਹੁੰਦੀ ਦੇਖੀ ਹੈ।
ਜ਼ਿਕਰਯੋਗ ਹੈ ਕਿ ਕੈਨੇਡਾ ਦੇ ਦੋ ਸੀਨੀਅਰ ਮਿਲਟਰੀ ਲੀਡਰ, ਸਾਬਕਾ ਚੀਫ ਆਫ ਡਿਫੈਂਸ ਸਟਾਫ ਜਨਰਲ ਜੌਨਾਥਨ ਵੈਂਸ ਅਤੇ ਉਨ੍ਹਾਂ ਦੇ ਅਹੁਦੇ ’ਤੇ ਨਿਯੁਕਤ ਕੀਤੇ ਗਏ ਐਡਮਿਰਲ ਆਰਟ ਮੈਕਡੋਨਲਡ ਦੀ ਜਿਨਸੀ ਬਦਸਲੂਕੀ ਦੇ ਵੱਖ ਵੱਖ ਇਲਜ਼ਾਮਾਂ ਕਾਰਨ ਜਾਂਚ ਕੀਤੀ ਜਾ ਰਹੀ ਹੈ।
