ਗ੍ਰੇਗ ਫਰਗਸ ਨੂੰ ਮੰਗਣੀ ਪਵੇਗੀ ਦੁਬਾਰਾ ਮੁਆਫ਼ੀ ਤੇ ਭਰਨਾ ਪਵੇਗਾ ਜੁਰਮਾਨਾ: ਕਮੇਟੀ

ਕੈਨੇਡਾ ਦੇ ਹਾਊਸ ਆਫ ਕਾਮਨਜ਼ ਦੇ ਸਪੀਕਰ ਗ੍ਰੇਗ ਫਰਗਸ ਵੀਡੀਓ ਵਿਵਾਦ ਵਿੱਚ ਘਿਰੇ ਹੋਏ ਹਨ। ਜਿੱਥੇ ਲਗਾਤਾਰ ਉਨ੍ਹਾਂ ਤੋਂ ਵਿਰੋਧੀ ਪਾਰਟੀਆਂ ਅਸਤੀਫੇ ਦੀ ਮੰਗ ਕਰ ਰਹੀਆਂ ਹਨ। ਉੱਥੇ ਹੀ ਗ੍ਰੇਗ ਫਰਗਸ ਨੇ ਇਸਨੂੰ ਆਪਣੀ ਗ਼ਲਤੀ ਮੰਨਦੇ ਹੋਏ ਮੁਆਫ਼ੀ ਵੀ ਮੰਗੀ ਹੈ। ਹੁਣ ਇਸ ਮਾਮਲੇ 'ਤੇ ਹਾਊਸ ਆਫ ਕਾਮਨਜ਼ ਕਮੇਟੀ ਨੇ ਗ੍ਰੇਗ ਫਰਗਸ ਨੂੰ ਸਪੀਕਰ ਦੇ ਅਹੁਦੇ 'ਤੇ ਬਣੇ ਰਹਿਣ ਲਈ ਦੁਬਾਰਾ ਮੁਆਫੀ ਮੰਗਣ ਤੇ ਜੁਰਮਾਨਾ ਭਰਨ ਲਈ ਕਿਹਾ ਹੈ।

ਸਵੇਰੇ ਜਾਰੀ ਕੀਤੀ ਗਈ ਇੱਕ ਰਿਪੋਰਟ ਵਿੱਚ ਹਾਊਸ ਦੀ ਪ੍ਰੋਸੀਡਰ ਕਮੇਟੀ ਨੇ ਕਿਹਾ ਕਿ ਭਵਿੱਖ ਵਿੱਚ ਉਨ੍ਹਾਂ ਨੂੰ ਯਕੀਨੀ ਬਣਾਉਣਾ ਪਵੇਗਾ ਕਿ ਉਨ੍ਹਾਂ ਦੀ ਭੂਮਿਕਾ ਨਿਰਪੱਖ ਰਹੇਗੀ। ਕਮੇਟੀ ਦੀ ਰਿਪੋਰਟ ਵਿੱਚ ਇਹ ਨਹੀਂ ਦੱਸਿਆ ਗਿਆ ਹੈ ਕਿ ਫਰਗਸ ਨੂੰ ਸੰਸਦ ਦੀ ਅਦਾਇਗੀ ਲਈ ਕਿੰਨਾ ਭੁਗਤਾਨ ਕਰਨਾ ਪੈਣਾ ਹੈ।

ਜ਼ਿਕਰਯੋਗ ਹੈ ਕਿ ਫਰਗਸ ਦਾ ਇਹ ਵਿਵਾਦ ਉਨ੍ਹਾਂ ਦੇ ਵੀਡੀਓ ਮੈਸੇਜ ਨੂੰ ਲੈ ਕੇ ਹੈ ਜੋ ਹਾਲ ਹੀ ਵਿੱਚ ਓਨਟੇਰੀਓ ਦੀ ਲਿਬਰਲ ਲੀਡਰਸ਼ਿਪ ਸੰਮੇਲਨ ਵਿੱਚ ਚਲਾਇਆ ਗਿਆ ਸੀ। ਇਸ 105 ਸਕਿੰਟ ਦੀ ਵੀਡੀਓ ਵਿੱਚ ਫਰਗਸ ਨੇ ਸਪੀਕਰ ਦੇ ਚੈਂਬਰ ਤੋਂ ਓਨਟੇਰਿਓ ਲਿਬਰਲ ਪਾਰਟੀ ਦੇ ਅੰਤਰਿਮ ਲੀਡਰ ਤੇ ਆਪਣੇ ਪੁਰਾਣੇ ਮਿੱਤਰ ਜੌਨ ਫਰੇਜ਼ਰ ਦੀ ਵਿਦਾਇਗੀ ਮੌਕੇ ਤੇ ਉਨ੍ਹਾਂ ਨੂੰ ਸ਼ਰਧਾਂਜਲੀ ਦਿੱਤੀ ਸੀ। ਇਸ ਦੌਰਾਨ ਉਹ ਸਪੀਕਰ ਦੀ ਪੁਸ਼ਾਕ ਵਿੱਚ ਵੀ ਸਨ।