ਕੈਨੇਡਾ ਵਿਚ ਚੋਣ ਕੰਪੇਨ ਦਾ ਅੰਤਿਮ ਹਫ਼ਤਾ, ਲਿਬਰਸ ਤੇ ਕੰਜ਼ਰਵੇਟਿਵ ਵਿਚਾਲੇ ਸਖ਼ਤ ਟੱਕਰ

ਕੈਨੇਡਾ ਵਿਚ ਚੋਣ ਕੰਪੇਨ ਦਾ ਇਹ ਆਖਰੀ ਹਫ਼ਤਾ ਹੈ, ਉਥੇ ਹੀ ਲਿਬਰਲ ਪਾਰਟੀ ਨੇ ਸ਼ਨੀਵਾਰ ਆਪਣਾ ਚੋਣ ਪਲੇਟਫਾਰਮ ਜਾਰੀ ਕੀਤਾ, ਜਿਸ ਨੂੰ ਲੈ ਕੇ ਉਹ ਵਿਰੋਧੀਆਂ ਦੇ ਨਿਸ਼ਾਨੇ 'ਤੇ ਹੈ। ਲਿਬਰਲ ਪਾਰਟੀ ਨੇ ਮਾਰਕ ਕਾਰਨੀ ਦੀ ਅਗਵਾਈ ਵਿਚ ਉਨ੍ਹਾਂ ਦੀ ਸਰਕਾਰ ਬਣਨ 'ਤੇ ਅਗਲੇ 4 ਸਾਲਾਂ ਵਿਚ ਲਗਭਗ $130 ਬਿਲੀਅਨ ਦੇ ਨਵੇਂ ਖਰਚ ਦੀ ਘੋਸ਼ਣਾ ਕੀਤੀ ਹੈ। ਇਸ ਪਲੈਨ ਵਿਚ ਟੈਕਸ ਵਿੱਚ ਕਟੌਤੀ, ਰਿਹਾਇਸ਼ੀ ਸਹਾਇਤਾ ਅਤੇ ਰਾਸ਼ਟਰੀ ਰੱਖਿਆ ਸਬੰਧੀ ਉਪਾਅ ਸ਼ਾਮਲ ਹਨ। ਹਾਲਾਂਕਿ, ਇਸ ਨੂੰ ਮੌਜੂਦਾ ਖ਼ਰਚ ਨਾਲ ਜੋੜਨ 'ਤੇ ਫੈਡਰਲ ਕਰਜ਼ $225-ਬਿਲੀਅਨ ਵਧਣ ਦੀ ਉਮੀਦ ਹੈ।

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਲਿਬਰਲਸ ਦੇ ਚੋਣ ਪਲੇਟਫਾਰਮ ਨੂੰ ਲੈ ਕੇ ਕਾਰਨੀ 'ਤੇ ਨਿਸ਼ਾਨਾ ਸਾਧਦਿਆਂ ਉਨ੍ਹਾਂ ਨੂੰ ਟਰੂਡੋ ਨਾਲੋਂ ਵੀ ਜ਼ਿਆਦਾ ਖ਼ਰਚੀਲਾ ਦੱਸਿਆ। ਪੌਲੀਐਵ ਨੇ ਦੋਸ਼ ਲਗਾਇਆ ਕਿ ਕਾਰਨੀ ਨੇ ਈਸਟਰ ਵੀਕਐਂਡ ਦੌਰਾਨ ਆਪਣੇ ਖ਼ਰਚ ਦੀ ਯੋਜਨਾ ਦਾ ਖੁਲਾਸਾ ਕਰਕੇ ਉਸ ਨੂੰ ਖ਼ਬਰਾਂ ਵਿਚ ਆਉਣ ਤੋਂ ਲੁਕਾਉਣ ਤੋਂ ਕੋਸ਼ਿਸ਼ ਕੀਤੀ ਅਤੇ ਉਨ੍ਹਾਂ ਨੂੰ ਲੱਗਾ ਕਿ ਇਹ ਕਿਸੇ ਨੂੰ ਪਤਾ ਨਹੀਂ ਲੱਗੇਗਾ।

ਓਧਰ ਕਾਰਨੀ ਨੇ ਆਪਣੇ ਪਲੈਨ ਨੂੰ ਡਿਫੈਂਡ ਕੀਤਾ। ਉਨ੍ਹਾਂ ਕਿਹਾ ਕਿ ਅਮਰੀਕਾ ਵਲੋਂ ਵਪਾਰ ਯੁੱਧ ਅਤੇ ਗਲੋਬਲ ਆਰਥਿਕਤਾ ਲਈ ਪੈਦਾ ਹੋਏ ਖ਼ਤਰੇ ਕਾਰਨ ਅਸੀਂ ਆਪਣੇ ਜ਼ਿੰਦਗੀ ਦੇ ਸਭ ਤੋਂ ਮੁਸ਼ਕਲ ਦੌਰ ਵਿਚ ਹਾਂ, ਲਿਹਾਜਾ ਸਾਨੂੰ ਨਿਰਮਾਣ ਅਤੇ ਨਿਵੇਸ਼ ਕਰਨ ਦੀ ਲੋੜ ਹੈ।