ਨਾਨਾਇਮੋ ਆਰ.ਸੀ.ਐਮ.ਪੀ. ਨੇ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਕਰਨ ਵਾਲੇ ਇਕ ਘਰ ਦਾ ਕੀਤਾ ਪਰਦਾਫਾਸ਼

ਨਾਨਾਇਮੋ ਆਰ.ਸੀ.ਐਮ.ਪੀ. ਨੇ ਪੰਜ ਮਹੀਨਿਆਂ ਤੱਕ ਚੱਲੀ ਗੁਪਤ ਜਾਂਚ ਤੋਂ ਬਾਅਦ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਕਰਨ ਵਾਲੇ ਇੱਕ ਘਰ ਦਾ ਪਰਦਾਫਾਸ਼ ਕੀਤਾ ਹੈ। ਇਸ ਕਾਰਵਾਈ ਦੌਰਾਨ ਅਧਿਕਾਰੀਆਂ ਨੇ ਦੋ ਵਿਅਕਤੀਆਂ ਨੂੰ ਗੈਰ-ਕਾਨੂੰਨੀ ਨਸ਼ੀਲੇ ਪਦਾਰਥਾਂ, ਦੋ ਹਥਿਆਰਾਂ ਅਤੇ ਬੁਲੇਟਪਰੂਫ ਜੈਕਟ ਸਮੇਤ ਗ੍ਰਿਫਤਾਰ ਕੀਤਾ।

ਪੁਲਿਸ ਅਨੁਸਾਰ ਨਵੰਬਰ 2024 ਵਿਚ ਸ਼ੱਕ ਦੇ ਆਧਾਰ 'ਤੇ ਜਾਂਚ ਸ਼ੁਰੂ ਕੀਤੀ ਗਈ ਸੀ। ਲੰਬੀ ਪੜਤਾਲ ਤੋਂ ਬਾਅਦ 17 ਅਪ੍ਰੈਲ 2025 ਨੂੰ ਜਨਰਲ ਇਨਵੈਸਟੀਗੇਸ਼ਨ ਸੈਕਸ਼ਨ ਅਤੇ ਡਰੱਗ ਯੂਨਿਟ ਦੀ ਮਦਦ ਨਾਲ ਸ਼ੱਕੀ ਰਿਹਾਇਸ਼ 'ਤੇ ਤਲਾਸ਼ੀ ਵਾਰੰਟ ਤਹਿਤ ਛਾਪਾ ਮਾਰਿਆ ਗਿਆ, ਜਿਸ ਮੌਕੇ ਘਰ ਵਿਚੋਂ 52 ਗ੍ਰਾਮ ਫੈਂਟਾਨਿਲ, 25 ਗ੍ਰਾਮ ਕੋਕੀਨ, 30 ਗ੍ਰਾਮ ਮੇਥਾਮਫੇਟਾਮਾਈਨ ਅਤੇ 213 ਗੈਰ-ਕਾਨੂੰਨੀ ਗੋਲੀਆਂ ਬਰਾਮਦ ਹੋਈਆਂ।

ਨਸ਼ੀਲੇ ਪਦਾਰਥਾਂ ਤੋਂ ਇਲਾਵਾ ਇਨਵੈਸਟੀਗੇਟਰਸ ਨੂੰ ਇੱਕ ਰੁਗਰ ਕਾਰਬਾਈਨ ਅਤੇ ਇੱਕ ਨੋਰਿੰਕੋ ਚੀਨੀ ਸ਼ਾਟਗਨ ਵੀ ਮਿਲੇ। ਪੁਲਿਸ ਨੇ ਕਿਹਾ ਕਿ ਬਰਾਮਦ ਹੋਈ ਰੁਗਰ ਕਾਰਬਾਈਨ, ਪੋਰਟ ਅਲਬਰਨੀ ਤੋਂ ਚੋਰੀ ਹੋਈ ਸੀ। ਇਸ ਮਾਮਲੇ ਵਿਚ 8 ਦਸੰਬਰ ਨੂੰ ਨਾਨਾਇਮੋ ਨਿਵਾਸੀ 44 ਸਾਲਾ ਨੌਰਮਨ ਮਿਲਰ ਅਤੇ 42 ਸਾਲਾ ਕਾਰਲੀਨ ਸਨੇਡਨ 'ਤੇ ਕਈ ਗੰਭੀਰ ਚਾਰਜਿਜ਼ ਲਗਾਏ ਗਏ ਹਨ।