ਕੇਲੋਨਾ ਹਵਾਈ ਅੱਡੇ 'ਤੇ ਸਾਈਬਰ ਹਮਲੇ ਕਾਰਨ ਉਡਾਣਾਂ ਵਿੱਚ ਹੋਈ ਦੇਰੀ

ਕੇਲੋਨਾ ਇੰਟਰਨੈਸ਼ਨਲ ਏਅਰਪੋਰਟ ਦੇ ਪਬਲਿਕ ਇਨਫਰਮੇਸ਼ਨ ਸਿਸਟਮ ਨੂੰ ਸਾਈਬਰ ਹਮਲੇ ਨਾਲ ਨਿਸ਼ਾਨਾ ਬਣਾਇਆ ਗਿਆ ਹੈ, ਜਿਸ ਕਾਰਨ ਮੰਗਲਵਾਰ ਸ਼ਾਮ ਨੂੰ ਕੁਝ ਫਲਾਈਟਸ ਵਿਚ ਦੇਰੀ ਹੋਈ। ਏਅਰਪੋਰਟ ਮੁਤਾਬਕ, ਹੈਕਰਾਂ ਨੇ ਟਰਮੀਨਲ ਦੀਆਂ ਫਲਾਈਟ ਇਨਫਰਮੇਸ਼ਨ ਡਿਸਪਲੇ ਸਕਰੀਨ ਅਤੇ ਪਬਲਿਕ ਅਡਰੈਸ ਸਿਸਟਮ 'ਤੇ ਕੰਟਰੋਲ ਕਰ ਲਿਆ ਤੇ ਹਮਾਸ ਪੱਖੀ ਅਤੇ ਟਰੰਪ ਵਿਰੋਧੀ ਸੰਦੇਸ਼ ਅਤੇ ਔਡੀਓ ਕਲਿੱਪ ਚਲਾਏ।

ਹਮਾਸ ਪੱਖੀ ਹੈਕਰਾਂ ਵਲੋਂ ਸਕ੍ਰੀਨਾਂ 'ਤੇ ਇਜ਼ਰਾਈਲ ਜੰਗ ਹਾਰ ਗਿਆ, ਹਮਾਸ ਜਿੱਤ ਗਿਆ ਵਰਗੇ ਸੰਦੇਸ਼ ਵੀ ਪ੍ਰਦਰਸ਼ਿਤ ਕੀਤੇ ਗਏ, ਜਿਸ ਤੋਂ ਬਾਅਦ ਹਵਾਈ ਅੱਡੇ ਦੇ ਸਟਾਫ ਨੇ ਜਲਦ ਹੀ ਸਿਸਟਮ ਨੂੰ ਡਿਸਕਨੈਕਟ ਕਰ ਦਿੱਤਾ ਅਤੇ ਯਾਤਰੀਆਂ ਨਾਲ ਕਮਿਊਨੀਕੇਟ ਕਰਨ ਲਈ ਮੈਗਾਫੋਨ ਦੀ ਵਰਤੋਂ ਕੀਤੀ ਗਈ।

ਹਾਲਾਂਕਿ, ਉਡਾਣਾਂ ਚਲਦੀਆਂ ਰਹੀਆਂ ਪਰ ਇਸ ਘਟਨਾ ਕਾਰਨ ਉਲਝਣ ਅਤੇ ਵਿਘਨ ਪੈਣ ਕਾਰਨ ਹਵਾਈ ਅੱਡੇ 'ਤੇ ਕੁਝ ਦੇਰੀ ਹੋਈ। ਜਾਣਕਾਰੀ ਮੁਤਾਬਕ, ਇਸ ਵਜ੍ਹਾ ਨਾਲ ਦੋ ਉਡਾਣਾਂ ਪ੍ਰਭਾਵਿਤ ਹੋਈਆਂ, ਇੱਕ ਦੀ ਰਵਾਨਗੀ ਚਾਰ ਘੰਟੇ ਦੇਰੀ ਨਾਲ ਅਤੇ ਇੱਕ ਦੀ ਅਰਾਈਵਲ ਦੋ ਘੰਟੇ ਦੇਰੀ ਨਾਲ ਹੋਈ। ਕੇਲੋਨਾ ਇੰਟਰਨੈਸ਼ਨਲ ਏਅਰਪੋਰਟ ਮੁਤਾਬਕ, ਆਰ.ਸੀ.ਐਮ.ਪੀ., ਕੈਨੇਡੀਅਨ ਸੈਂਟਰ ਫਾਰ ਸਾਈਬਰ ਸਕਿਓਰਿਟੀ ਅਤੇ ਟਰਾਂਸਪੋਰਟ ਕੈਨੇਡਾ ਇਸ ਘਟਨਾ ਦੀ ਜਾਂਚ ਕਰ ਰਹੇ ਹਨ।