13.41C Vancouver 13.41C VancouverSep 10, 2020 3:37 PM -
ਕੈਨੇਡਾ ਇਲੈਕਸ਼ਨਜ਼ ਦੇ ਕਮਿਸ਼ਨਰ ਮੁਤਾਬਕ ਸਾਬਕਾ ਵਿੱਤ ਮੰਤਰੀ ਬਿੱਲ ਮੋਰਨੌ ਨੇ ਆਪਣੇ ਅਹੁਦੇ ਤੇ ਹੁੰਦਿਆਂ ਲਿਬਰਲ ਉਮੀਦਵਾਰਾਂ ਦਾ ਪ੍ਰਚਾਰ ਕਰ ਕਾਨੂੰਨ ਦੀ ਉਲੰਘਣਾ ਕੀਤੀ ਹੈ।
ਕਮਿਸ਼ਨਰ ਅਨੁਸਾਰ ਮੋਰਨੌ ਉਦੋਂ ਫਾਈਨਾਂਸ ਮਨਿਸਟਰ ਸਨ ਜਦ ਉਨ੍ਹਾਂ ਨੇ ਪਿਛਲੀਆਂ ਫੈਡਰਲ ਚੋਣਾਂ ਤੋਂ ਪਹਿਲਾਂ ਵੱਖਰੇ ਸਮਾਗਮਾਂ ਦੌਰਾਨ ਸੰਭਾਵੀ ਲਿਬਰਲ ਉਮੀਦਵਾਰਾਂ ਦਾ ਪ੍ਰਚਾਰ ਕੀਤਾ।
ਇਨ੍ਹਾਂ ਉਮੀਦਵਾਰਾਂ ਵਿੱਚੋਂ ਇੱਕ ਅਨੀਤਾ ਆਨੰਦ ਸਨ, ਜੋ ਕਿ ਹੁਣ ਇੱਕ ਕੈਬਿਨੇਟ ਮੰਤਰੀ ਹਨ।
ਮੰਤਰੀਆਂ ਨੂੰ ਆਪਣੇ ਵਿਭਾਗ ਦੇ ਬਜਟ ਵਿੱਚੋਂ ਜਨਤਕ ਸਰੋਤ ਅਤੇ ਫੰਡ ਪੱਖਪਾਤੀ ਉਦੇਸ਼ਾਂ ਲਈ ਵਰਤਣ ਦੀ ਇਜਾਜ਼ਤ ਨਹੀਂ ਹੁੰਦੀ ਅਤੇ ਚੋਣ ਪ੍ਰਚਾਰ ਦੌਰਾਨ ਡੋਨੇਸ਼ਨ ਦੇਣ ਉੱਤੇ ਵੀ ਰੋਕ ਹੁੰਦੀ ਹੈ।
ਕਮਿਸ਼ਨਰ ਮੁਤਾਬਕ ਉਮੀਦਵਾਰਾਂ ਦਾ ਪ੍ਰਚਾਰ ਕਰ ਮੋਰਨੌ ਨੇ ਇਸ ਨਿਯਮ ਦੀ ਉਲੰਘਣਾ ਕੀਤੀ ਹੈ ਅਤੇ ਸਰਕਾਰੀ ਸਰੋਤਾਂ ਦੀ ਵਰਤੋਂ ਲਿਬਰਲ ਪਾਰਟੀ ਦੇ ਫਾਇਦੇ ਲਈ ਕੀਤੀ ਹੈ।
ਕਮਿਸ਼ਨਰ ਦਾ ਕਹਿਣਾ ਹੈ ਕਿ ਇਸ ਗੱਲ ਦਾ ਕੋਈ ਸੰਕੇਤ ਨਹੀਂ ਹੈ ਕਿ ਮੋਰਨੌ ਨੇ ਜਨਤਕ ਸਰੋਤਾਂ ਨੂੰ ਪੱਖਪਾਤੀ ਉਦੇਸ਼ਾਂ ਲਈ ਵਰਤਣ ਦਾ ਇਰਾਦਾ ਬਣਾਇਆ ਸੀ ਜਾਂ ਸਮਾਗਮਾਂ ਨੂੰ ਆਯੋਜਿਤ ਕਰਨ ਵਿੱਚ ਉਹ ਨਿਜੀ ਤੌਰ ਤੇ ਸ਼ਾਮਲ ਸਨ।
ਮੋਰਨੌ ਦੀ ਰਾਈਡਿੰਗ ਐਸੋਸੀਏਸ਼ਨ ਨੇ ਦੋਵੇਂ ਸਮਾਗਮਾਂ ਦੇ ਖਰਚੇ ਦਾ ਭੁਗਤਾਨ ਕਰ ਦਿੱਤਾ ਹੈ ਅਤੇ ਮੋਰਨੌ ਨੂੰ ਆਪ $300 ਦਾ ਜੁਰਮਾਨਾ ਭਰਨਾ ਪਵੇਗਾ।
