ਸਰੀ, ਰਿਚਮੰਡ ਤੇ ਬਰਨਬੀ 'ਚ ਠੱਗੀ ਦੇ ਮਾਮਲਿਆਂ 'ਚ ਕਲੇਟਨ ਬਰੂਕਸ ਹੇਡਨ ਦੋਸ਼ੀ ਕਰਾਰ, ਕੈਦ ਤੋਂ ਇਲਾਵਾ ਠੱਗੀ ਦੇ ਪੀੜਤਾਂ ਨੂੰ ਪੈਸਾ ਮੋੜਨ ਦੇ ਹੁਕਮ

ਸਰੀ ਆਰ.ਸੀ.ਐਮ.ਪੀ. ਨੇ ਜਾਣਕਾਰੀ ਜਾਰੀ ਕੀਤੀ ਹੈ ਕਿ ਕਲੇਟਨ ਬਰੂਕਸ ਹੇਡਨ ਨਾਮ ਦੇ ਵਿਅਕਤੀ ਨੂੰ ਧੋਖਾਧੜੀ ਨਾਲ ਸੰਬੰਧੀ 15 ਮਾਮਲਿਆਂ 'ਚ ਦੋਸ਼ੀ ਪਾਇਆ ਗਿਆ ਹੈ।

ਇਸੇ ਸਾਲ ਅਪ੍ਰੈਲ ਦੇ ਮਹੀਨੇ 'ਚ ਸਰੀ ਆਰ.ਸੀ.ਐਮ.ਪੀ. ਨੇ ਲੋਕਾਂ ਤੋਂ ਮਦਦ ਦੀ ਅਪੀਲ ਕੀਤੀ ਸੀ ਕਿ ਕਲੇਟਨ ਬਰੂਕਸ ਹੇਡਨ ਨਾਮ ਦੇ ਵਿਅਕਤੀ ਨੂੰ ਭਾਲਿਆ ਜਾਵੇ।

ਠੱਗੀ ਦੇ ਮਾਮਲੇ ਕਈ ਫਾਈਨੈਂਸ਼ੀਅਲ ਇੰਸਟੀਟਿਊਸ਼ਨਸ ਨਾਲ ਜੁੜੇ ਸਨ। ਹਰ ਮਾਮਲੇ 'ਚ ਪੀੜਤ ਵੱਲੋਂ ਲੋਕਾਂ ਤਕ ਇਹ ਕਹਿ ਕੇ ਪਹੁੰਚ ਕੀਤੀ ਗਈ ਸੀ ਕਿ ਉਸ ਨੂੰ ਕੈਸ਼ ਦੀ ਲੋੜ ਹੈ ਅਤੇ ਹਰ ਮੌਕੇ ਲੋਕਾਂ ਨੂੰ ਚੈੱਕ ਦੇ ਦਿੱਤੇ ਜਾਂਦੇ ਸਨ, ਪਰ ਬਾਅਦ 'ਚ ਪਤਾ ਲਗਦਾ ਸੀ ਕਿ ਦੋਸ਼ੀ ਪੈਸੇ ਲੈਕੇ ਨਿਕਲ ਗਿਆ ਜਦਕਿ ਚੈੱਕ ਝੂਠੇ ਸਨ।

ਸਰੀ, ਰਿਚਮੰਡ ਅਤੇ ਬਰਨਬੀ 'ਚ ਵਾਪਰੀਆਂ ਘਟਨਾਵਾਂ ਸੰਬੰਧੀ ਸਰੀ ਆਰ.ਸੀ.ਐਮ.ਪੀ. ਦੇ ਫਾਈਨੈਂਸ਼ੀਅਲ ਕਰਾਈਮ ਯੂਨਿਟ ਨੇ ਜਾਂਚ ਕੀਤੀ।

ਪੁਲਿਸ ਨੇ ਦੱਸਿਆ ਕਿ ਕਲੇਟਨ ਬਰੂਕਸ ਹੇਡਨ ਨੇ 15 ਦੋਸ਼ ਕਬੂਲੇ ਸਨ ਅਤੇ 16 ਨਵੰਬਰ ਨੂੰ ਉਸ ਨੂੰ 15 ਮਹੀਨੇ ਦੀ ਕੈਦ ਸੁਣਾਈ ਗਈ ਅਤੇ ਉਸ ਨੂੰ 2 ਸਾਲ ਪ੍ਰੋਬੇਸ਼ਨ 'ਤੇ ਰੱਖਿਆ ਜਾਵੇਗਾ।

ਉਸ ਨੂੰ 15 ਪੀੜਤਾਂ ਨੂੰ ਉਨ੍ਹਾਂ ਦਾ ਪੈਸਾ ਵਾਪਿਸ ਮੋੜਨ ਲਈ ਕਿਹਾ ਗਿਆ ਹੈ।