ਫ੍ਰੀਲੈਂਡ ਨੇ ਪਹਿਲੀ ਵਾਰ ਘਰ ਖਰੀਦਣ ਵਾਲਿਆਂ ਲਈ ਜੀ.ਐੱਸ.ਟੀ. ਛੋਟ ਦਾ ਰੱਖਿਆ ਪ੍ਰਸਤਾਵ

ਕੈਨੇਡਾ ਦੀ ਸੱਤਾਧਾਰੀ ਲਿਬਰਲ ਪਾਰਟੀ ਦੀ ਲੀਡਰਸ਼ਿਪ ਦੌੜ ਵਿਚ ਸ਼ਾਮਲ ਸਾਬਕਾ ਵਿੱਤ ਮੰਤਰੀ ਕ੍ਰਿਸਟੀਆ ਫ੍ਰੀਲੈਂਡ ਦਾ ਕਹਿਣਾ ਹੈ ਕਿ ਜੇ ਉਹ ਪੀ.ਐੱਮ. ਬਣਨ ਦੀ ਰੇਸ ਜਿੱਤਦੇ ਹਨ ਤਾਂ ਉਹ ਨੌਜਵਾਨ ਕੈਨੇਡੀਅਨਾਂ ਨੂੰ ਪਹਿਲੀ ਵਾਰ ਘਰ ਖਰੀਦਣ ’ਤੇ ਜੀ.ਐੱਸ.ਟੀ. ਵਿਚ ਛੋਟ ਦੇਣਗੇ।

ਫ੍ਰੀਲੈਂਡ ਦੀ ਪ੍ਰਸਤਾਵਿਤ ਜੀ.ਐੱਸ.ਟੀ. ਰਾਹਤ $1.5 ਮਿਲੀਅਨ ਤੱਕ ਦੇ ਘਰਾਂ ’ਤੇ ਲਾਗੂ ਹੋਵੇਗੀ, ਇਸ ਨਾਲ ਪਹਿਲੇ ਘਰ ਦੀ ਖਰੀਦ ’ਤੇ 75,000 ਡਾਲਰ ਤੱਕ ਦੀ ਬਚਤ ਹੋ ਸਕਦੀ ਹੈ। ਲੀਡਰਸ਼ਿਪ ਦੌੜ 9 ਮਾਰਚ ਨੂੰ ਸਮਾਪਤ ਹੋਣ ਤੋਂ ਪਹਿਲਾਂ ਫ੍ਰੀਲੈਂਡ ਵਲੋਂ ਕੈਨੇਡੀਅਨਾਂ ਲਈ ਪ੍ਰਸਤਾਵਿਤ ਕੀਤੀ ਗਈ ਇਹ ਨਵੀਂ ਪਾਲਿਸੀ ਯੋਜਨਾ ਹੈ। ਉਨ੍ਹਾਂ ਇਸ ਰਾਹੀਂ ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੂੰ ਵੀ ਸਾਧਣ ਦੀ ਕੋਸ਼ਿਸ਼ ਕੀਤੀ ਹੈ।

ਦਰਅਸਲ, ਪੌਲੀਐਵ ਨੇ ਪਿਛਲੇ ਸਾਲ ਅਕਤੂਬਰ ਵਿਚ ਘੋਸ਼ਣਾ ਕੀਤੀ ਸੀ ਕਿ ਕੰਜ਼ਰਵੇਟਿਵ ਦੀ ਸਰਕਾਰ ਬਣਨ ’ਤੇ $1 ਮਿਲੀਅਨ ਤੱਕ ਦੇ ਨਵੇਂ ਘਰਾਂ ਨੂੰ ਫੈਡਰਲ ਸੇਲ ਟੈਕਸ ਤੋਂ ਮੁਕਤ ਕਰ ਦਿੱਤਾ ਜਾਵੇਗਾ ਅਤੇ ਪ੍ਰੀਮੀਅਰਾਂ ਨੂੰ ਵੀ ਸੂਬਾਈ ਟੈਕਸ ਸਮਾਪਤ ਕਰਨ ਲਈ ਕਿਹਾ ਜਾਵੇਗਾ।

ਕੰਜ਼ਰਵੇਟਿਵ ਦਾ ਅਨੁਮਾਨ ਹੈ ਕਿ ਉਨ੍ਹਾਂ ਦੇ ਇਸ ਉਪਾਅ ਨਾਲ ਨਵੇਂ ਘਰ ਖਰੀਦਦਾਰਾਂ ਨੂੰ $800,000 ਦੀ ਕੀਮਤ ਵਾਲੇ ਘਰ ’ਤੇ $40,000 ਦੀ ਬਚਤ ਹੋ ਸਕਦੀ ਹੈ। ਉਥੇ ਹੀ, ਫ੍ਰੀਲੈਂਡ ਹੁਣ $1.5 ਮਿਲੀਅਨ ਤੱਕ ਦੇ ਘਰਾਂ ’ਤੇ ਜੀਐਸਟੀ ਛੋਟ ਦੇਣ ਲਈ ਤਿਆਰ ਹਨ।