17.64C Vancouver 17.64C VancouverJan 7, 2021 2:30 AM -
ਫੈਡਰਲ ਸਰਕਾਰ ਵੱਲੋਂ ਇੱਕ ਪ੍ਰੈਸ ਕਾਨਫਰੰਸ ਕਰ ਜਾਣਕਾਰੀ ਦਿੱਤੀ ਗਈ ਹੈ ਕਿ ਕੱਲ ਤੋਂ ਕੈਨੇਡਾ ਪਹੁੰਚ ਰਹੇ ਕਿਸੇ ਵੀ ਹਵਾਈ ਸਫਰ ਕਰ ਰਹੇ ਵਿਅਕਤੀ ਨੂੰ 72 ਘੰਟੇ ਵਿਚਾਲੇ ਹਾਸਿਲ ਕੀਤੇ ਕੋਵਿਡ-19 ਦੇ ਨੈਗੇਟਿਵ ਨਤੀਜੇ ਵਿਖਾਉਣਾ ਜ਼ਰੂਰੀ ਹੋਵੇਗਾ।
ਹਾਲਾਂਕਿ 14 ਜਨਵਰੀ ਤੱਕ ਇਸ 'ਚ ਇੰਨੀ ਕੁ ਢਿੱਲ ਦਿੱਤੀ ਗਈ ਹੈ ਕਿ ਜਿਹੜੇ ਲੋਕ ਅਜਿਹੇ ਦੇਸ਼ਾਂ 'ਚ ਹਨ, ਜਿੱਥੇ ਇਹ ਨਤੀਜੇ ਸਮੇਂ ਸੀਮਾ 'ਚ ਹਾਸਿਲ ਨਹੀਂ ਹੋ ਸਕਦੇ, ਉਹ 96 ਘੰਟੇ ਵਿਚਾਲੇ ਹਾਸਿਲ ਕੀਤੇ ਨਤੀਜੇ ਵਿਖਾ ਕੇ ਦੇਸ਼ 'ਚ ਦਾਖਿਲ ਹੋ ਸਕਣਗੇ।
ਇਹ ਨਤੀਜੇ ਡਿਪਾਰਚਰ ਤੋਂ ਪਹਿਲਾਂ ਵਿਖਾਉਣੇ ਜ਼ਰੂਰੀ ਹੋਣਗੇ।
ਪਬਲਿਕ ਸੇਫਟੀ ਮੰਤਰੀ ਬਿਲ ਬਲੇਅਰ ਨੇ ਦੱਸਿਆ ਕਿ ਹਵਾਈ ਯਾਤਰਾ ਤੋਂ ਪਹਿਲਾਂ ਏਅਰਲਾਈਨ ਵੱਲੋਂ ਸ਼ਰੀਰਕ ਤਾਪਮਾਨ ਵੀ ਜਾਂਚਿਆ ਜਾਵੇਗਾ ਅਤੇ ਯਾਤਰੀਆਂ ਨੂੰ ਅਰਾਈਵੀਕੈਨ ਐਪ (ArriveCan app) 'ਤੇ ਵੀ ਕੁਝ ਜਾਣਕਾਰੀਆਂ ਜ਼ਾਹਿਰ ਕਰਨੀਆਂ ਹੋਣਗੀਆਂ।
ਵਿਦੇਸ਼ ਮੰਤਰੀ ਫ੍ਰਾਂਸੂਆ ਫਿਲਿਪ ਸ਼ੈਂਪੇਨ ਦੀ ਟਿੱਪਣੀ
ਵਿਦੇਸ਼ ਮਾਮਲਿਆਂ ਬਾਰੇ ਮੰਤਰੀ ਫ੍ਰਾਂਸੂਆ ਫਿਲਿਪ ਸ਼ੈਂਪੇਨ ਨੇ ਕਿਹਾ ਕਿ ਸਰਕਾਰ ਜਾਣਦੀ ਹੈ ਕਿ ਅਜਿਹਾ ਕਰਨ ਨਾਲ ਕੁਝ ਅਸੁਵਿਧਾਵਾਂ ਹੋਣਗੀਆਂ।
ਪਰ ਉਨ੍ਹਾਂ ਕਿਹਾ ਕਿ ਇਹ ਫੈਸਲਾ ਸਭ ਦੀ ਸਿਹਤ ਨੂੰ ਧਿਆਨ 'ਚ ਰੱਖ ਕੇ ਲਿਆ ਗਿਆ ਹੈ।
ਯਾਦ ਰਹੇ ਅੱਜ ਰਾਤ ਤੋਂ ਇੰਗਲੈਂਡ ਤੋਂ ਆਉਣ ਵਾਲੇ ਯਾਤਰੀਆਂ 'ਤੇ ਲੱਗੀ ਪਬੰਦੀ ਵੀ ਹਟਾ ਦਿੱਤੀ ਜਾਵੇਗੀ।
ਕੈਦੀਆਂ ਨੂੰ ਵੈਕਸੀਨ ਦੇਣ 'ਤੇ ਬਿਲ ਬਲੇਅਰ ਤੇ ਡਗ ਫੋਰਡ ਦੀ ਵਿਪਰੀਤ ਟਿੱਪਣੀ
ਕੈਨੇਡਾ ਦੇ ਪਬਲਿਕ ਸੇਫਟੀ ਮੰਤਰੀ, ਬਿਲ ਬਲੇਅਰ ਨੇ ਅੱਜ ਇੱਕ ਸਵਾਲ ਦਾ ਜਵਾਬ ਦਿੰਦਿਆਂ ਕਿਹਾ ਕਿ ਜੇਲ੍ਹਾਂ 'ਚ ਬੰਦ ਕੈਦੀਆਂ ਨੂੰ ਕੋਵਿਡ-19 ਵੈਕਸੀਨ ਪ੍ਰਦਾਨ ਕਰਨ ਦਾ ਫੈਸਲਾ ਸੋਚ ਸਮਝ ਕੇ ਲਿਆ ਗਿਆ ਹੈ।
ਉਨ੍ਹਾਂ ਕਿਹਾ ਕਿ ਕਿਸੇ ਵੀ ਦੇਸ਼ਵਾਸੀ ਦੀ ਤਰ੍ਹਾਂ ਇਹਨਾਂ ਲੋਕਾਂ ਦਾ ਵੀ ਸਿਹਤ ਸੰਬੰਧੀ ਹੱਕ ਹੈ।
ਉਨ੍ਹਾਂ ਕਿਹਾ ਕਿ ਇਹਨਾਂ ਦੀ ਸੰਭਾਲ ਕਰਨਾ ਵੀ ਸਰਕਾਰ ਦੀ ਜਿੰਮੇਵਾਰੀ ਹੈ।
ਯਾਦ ਰਹੇ ਅੱਜ ਔਂਟੈਰੀਓ ਦੇ ਪ੍ਰੀਮਿਅਰ ਡਗ ਫੋਰਡ ਉਚੇਚੇ ਤੌਰ 'ਤੇ ਇੱਕ ਟਿੱਪਣੀ ਕਰਦਿਆਂ ਕਿਹਾ ਸੀ ਕਿ ਫੈਡਰਲ ਸਰਕਾਰ ਵੱਲੋਂ ਜੇਲ੍ਹਾਂ 'ਚ ਬੰਦ ਕੈਦੀਆਂ ਨੂੰ ਵੈਕਸੀਨੇਟ ਕਰਨ ਦਾ ਫੈਸਲਾ ਬੇਹੱਦ ਨਿਰਾਸ਼ਾਜਨਕ ਹੈ।
ਉਨ੍ਹਾਂ ਕਿਹਾ ਕਿ ਫਿਲਹਾਲ ਲੌਂਗ ਟਰਮ ਕੇਅਰ ਹੋਮਸ ਅਤੇ ਹੈਲਥ ਕੇਅਰ ਵਰਕਰਾਂ ਲਈ ਵੀ ਵੈਕਸੀਨ ਪੂਰੀ ਨਹੀਂ ਪੈ ਰਹੀ ਅਤੇ ਫੈਡਰਲ ਸਰਕਾਰ ਨੂੰ ਪਹਿਲਾਂ ਕੈਦੀਆਂ ਨੂੰ ਬਚਾਉਣ ਦੀ ਫਿਕਰ ਖੜੀ ਹੋ ਰਹੀ ਹੈ।
