ਵੈਸਟਜੈੱਟ ਦੇ ਮੁਸਾਫਰਾਂ ਲਈ ਇਹ ਹਫ਼ਤਾ ਰਹੇਗਾ ਪ੍ਰੇਸ਼ਾਨੀ ਵਿੱਚ

ਵੈਸਟਜੈੱਟ ਦੇ ਮੁਸਾਫਰਾਂ ਲਈ ਇਹ ਹਫ਼ਤਾ ਵੀ ਪ੍ਰੇਸ਼ਾਨੀ ਵਾਲਾ ਰਹਿ ਸਕਦਾ ਹੈ। ਏਅਰਲਾਈਨ ਦਾ ਕਹਿਣਾ ਹੈ ਕਿ ਮਕੈਨਿਕ ਦੀ ਹੜਤਾਲ ਸਮਾਪਤ ਕਰਨ ਲਈ ਸਮਝੌਤਾ ਹੋ ਗਿਆ ਹੈ ਪਰ ਫਲਾਈਟ ਓਪਰੇਸ਼ਨ ਵਿਚ ਰੁਕਾਵਟ ਇਸ ਹਫ਼ਤੇ ਵੀ ਜਾਰੀ ਰਹਿਣ ਦੀ ਉਮੀਦ ਹੈ।

ਵੈਸਟਜੈੱਟ ਨੇ ਬਿਆਨ ਵਿਚ ਕਿਹਾ ਕਿ ਓਪਰੇਸ਼ਨ ਨੂੰ ਪੂਰੀ ਤਰ੍ਹਾਂ ਬਹਾਲ ਕਰਨ ਵਿਚ ਸਮਾਂ ਲੱਗੇਗਾ ਅਤੇ ਆਉਣ ਵਾਲੇ ਦਿਨਾਂ ਵਿਚ ਹੋਰ ਵੀ ਫਲਾਈਟਸ ਰੱਦ ਕਰਨੀਆਂ ਪੈ ਸਕਦੀਆਂ ਹਨ। ਲੇਬਰ ਮੰਤਰੀ ਸੀਮਸ ਓਰੇਗਨ ਦੀ ਦਖ਼ਲ ਦੇ ਬਾਵਜੂਦ ਵੈਸਟਜੈੱਟ ਦੀ ਮਕੈਨਿਕ ਐਸੋਸੀਏਸ਼ਨ ਦੇ ਲਗਭਗ 680 ਮੈਂਬਰਸ ਸ਼ੁੱਕਰਵਾਰ ਸ਼ਾਮ ਹੜਤਾਲ ’ਤੇ ਚਲੇ ਗਏ ਸਨ।

ਦੋਹਾਂ ਧਿਰਾਂ ਵਿਚਕਾਰ ਅਸਥਾਈ ਸਮਝੌਤੇ ਦੀ ਘੋਸ਼ਣਾ ਐਤਵਾਰ ਦੇਰ ਰਾਤ ਕੀਤੀ ਗਈ ਪਰ ਸੰਭਾਵਿਤ ਹੜਤਾਲ ਦੇ ਮੱਦੇਨਜ਼ਰ ਕੈਨੇਡਾ ਡੇਅ ਦੇ ਲਾਂਗ ਵੀਕਐਂਡ ਡੇਅ ਦੌਰਾਨ ਹਜ਼ਾਰਾਂ ਮੁਸਾਫਰਾਂ ਦੀਆਂ ਯਾਤਰਾ ਯੋਜਨਾਵਾਂ ਪਹਿਲਾਂ ਹੀ ਪ੍ਰਭਾਵਿਤ ਹੋ ਗਈਆਂ ਸਨ। ਏਅਰਲਾਈਨ ਨੇ ਦੱਸਿਆ ਕਿ ਮੰਗਲਵਾਰ ਲਈ 27 ਉਡਾਣਾਂ ਰੱਦ ਕੀਤੀਆਂ ਗਈਆਂ ਹਨ। ਇਸ ਤੋਂ ਪਹਿਲਾਂ ਵੀਰਵਾਰ ਤੋਂ ਸੋਮਵਾਰ ਵਿਚਕਾਰ 830 ਫਲਾਈਟਾਂ ਰੱਦ ਕੀਤੀਆਂ ਗਈਆਂ ਸਨ ਪਰ ਬਾਅਦ ਵਿਚ ਸੋਮਵਾਰ ਨੂੰ ਏਅਰਲਾਈਨ ਨੇ 214 ਹੋਰ ਉਡਾਣਾਂ ਨੂੰ ਰੱਦ ਕਰ ਦਿੱਤਾ ਸੀ।

ਵੈਸਟਜੈੱਟ ਦਾ ਕਹਿਣਾ ਹੈ ਕਿ ਉਸ ਦੇ ਸਾਹਮਣੇ ਚੁਣੌਤੀ ਇਹ ਹੈ ਕਿ ਉਸ ਦੇ ਹਵਾਈ ਜਹਾਜ਼ ਕੈਨੇਡਾ ਭਰ ਦੇ 13 ਹਵਾਈ ਅੱਡਿਆਂ ’ਤੇ ਖੜ੍ਹੇ ਹਨ ਅਤੇ ਕਈ ਮਾਮਲਿਆਂ ਵਿਚ ਚਾਲਕ ਦਲ ਨੂੰ ਉੱਥੇ ਪਹੁੰਚਾਉਣ ਦੀ ਜ਼ਰੂਰਤ ਹੈ।