ਸਸਕੈਟੂਨ ਦੇ ਵਿਦਿਆਰਥੀ ਨੂੰ ਅੱਗ ਲਾਉਣ ਤੋਂ ਬਾਅਦ ਲੜਕੀ ’ਤੇ ਕਤਲ ਦੀ ਕੋਸ਼ਿਸ਼ ਦਾ ਦੋਸ਼

ਸਸਕੈਚਵਨ ਦੇ ਇੱਕ ਹਾਈ ਸਕੂਲ ਵਿਚ 15 ਸਾਲਾ ਲੜਕੀ ਨੂੰ ਉਸ ਦੇ ਨਾਲ ਪੜ੍ਹਦੀ 14 ਸਾਲਾ ਲੜਕੀ ਵਲੋਂ ਅੱਗ ਲਗਾਏ ਜਾਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਪੁਲਿਸ ਅਨੁਸਾਰ, ਘਟਨਾ ਵੀਰਵਾਰ ਦੁਪਹਿਰ ਨੂੰ ਸਸਕੈਟੂਨ ਸਿਟੀ ਦੇ ਈਵਾਨ ਹਾਰਡੀ ਕਾਲਜੀਏਟ ਵਿਚ ਵਾਪਰੀ, 15 ਸਾਲਾ ਲੜਕੀ ਨੂੰ ਉਸ ਦੀ ਹੀ ਸਹਿਪਾਠੀ ਨੇ ਅੱਗ ਲਗਾ ਦਿੱਤੀ, ਮੌਕੇ ’ਤੇ ਪਹੁੰਚੇ ਅਧਿਕਾਰੀਆਂ ਨੇ 14 ਸਾਲਾ ਲੜਕੀ ਹਿਰਾਸਤ ਵਿਚ ਲੈ ਲਈ।

ਪੁਲਿਸ ਨੇ ਦੱਸਿਆ ਕਿ ਅੱਗ ਬੁਝਾਉਣ ਵਿਚ ਅਧਿਆਪਕਾਂ ਨੇ ਮਦਦ ਕੀਤੀ। 15 ਸਾਲਾ ਪੀੜਤ ਨੂੰ ਤੁਰੰਤ ਹਸਪਤਾਲ ਲਿਜਾਇਆ ਗਿਆ, ਉਹ ਗੰਭੀਰ ਜ਼ਖਮੀ ਸੀ। ਸਾਰਜੈਂਟ ਕੈਨ ਕੇਨ ਨੇ ਕਿਹਾ ਕਿ ਅੱਗ ਬੁਝਾਉਂਦੇ ਸਮੇਂ ਇੱਕ ਟੀਚਰ ਨੂੰ ਵੀ ਸੱਟਾਂ ਲੱਗੀਆਂ ਸਨ, ਜਿਸ ਨੂੰ ਇਲਾਜ ਲਈ ਹਸਪਤਾਲ ਲਿਜਾਣ ਦੀ ਲੋੜ ਪਈ।

ਔਫੀਸਰਜ਼ ਨੇ ਕਿਹਾ ਕਿ ਪੀੜਤ ਲੜਕੀ ਦੇ ਮਾਤਾ-ਪਿਤਾ ਉਸ ਦੇ ਨਾਲ ਹਨ ਪਰ ਉਸ ਦੀ ਸਥਿਤੀ ਬਾਰੇ ਕੋਈ ਜਾਣਕਾਰੀ ਨਹੀਂ ਹੈ। ਸਸਕੈਟੂਨ ਪਬਲਿਕ ਸਕੂਲ ਨੇ ਕਿਹਾ ਕਿ ਕਲਾਸਾਂ ਵੀਰਵਾਰ ਨੂੰ ਬਾਕੀ ਦਿਨ ਲਈ ਰੱਦ ਕਰ ਦਿੱਤੀਆਂ ਗਈਆਂ ਸਨ ਅਤੇ ਸ਼ੁੱਕਰਵਾਰ ਨੂੰ ਵੀ ਕੈਂਸਲ ਰੱਖੀਆਂ ਗਈਆਂ। ਫਿਲਹਾਲ ਘਟਨਾ ਦੀ ਵਜ੍ਹਾ ਬਾਰੇ ਡਿਟੇਲਸ ਸਾਹਮਣੇ ਨਹੀਂ ਆਈ।