10.17C Vancouver 10.17C VancouverDec 3, 2020 2:14 AM -
ਅੱਜ ਕਵਸਚਨ ਪੀਰੀਅਡ ਦੇ ਦੌਰਾਨ ਵਿਰੋਧੀ ਪੱਖ ਕੰਜ਼ਰਵੇਟਿਵ ਪਾਰਟੀ ਦੇ ਲੀਡਰ ਐਰਿਨ ਓ'ਟੂਲ ਨੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਸਵਾਲ ਕੀਤਾ ਕਿ ਫੈਡਰਲ ਸਰਕਾਰ ਨੇ ਚੀਨ ਦੇ ਨਾਲ ਵੈਕਸੀਨ ਦੇ ਕਰਾਰ ਨੂੰ ਲੈ ਕੇ ਦੇਸ਼ ਨੂੰ ਵੈਕਸੀਨ ਹਾਸਿਲ ਕਰਨ ਦੀ ਦੌੜ 'ਚ ਪਿੱਛੇ ਕਿਉਂ ਧੱਕ ਦਿੱਤਾ।
ਉਨ੍ਹਾਂ ਕਿਹਾ ਕਿ ਆਖਿਰ 'ਚ ਚੀਨ ਨਾਲ ਕਰਾਰ ਟੁੱਟ ਗਿਆ।
ਓ'ਟੂਲ ਨੇ ਕਿਹਾ ਕਿ ਪ੍ਰਧਾਨ ਮੰਤਰੀ ਨੂੰ ਦੱਸਣਾ ਚਾਹੀਦਾ ਹੈ ਕਿ ਉਨ੍ਹਾਂ ਚੀਨ ਦੇ ਨਾਲ ਕਰਾਰ ਕਰਨ ਦੀ ਜ਼ਿਦ 'ਚ ਕਨੇਡੀਅਨ ਲੋਕਾਂ ਨੂੰ ਵੈਕਸੀਨ ਦੇ ਮਾਮਲੇ 'ਚ ਦੇਰੀ ਕਿਉਂ ਕਰਵਾ ਦਿੱਤੀ।
ਟਰੂਡੋ ਨੇ ਕਿਹਾ ਕੰਜ਼ਰਵੇਟਿਵਸ ਕਰ ਰਹੇ ਗੁੰਮਰਾਹ ਕਰਨ ਦੀ ਕੋਸ਼ਿਸ਼
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਅੱਜ ਕੰਜ਼ਰਵੇਟਿਵ ਲੀਡਰ 'ਤੇ ਕੈਨੇਡਾ ਵਾਸੀਆਂ ਨੂੰ ਗੁੰਮਰਾਹ ਕਰਨ ਦੇ ਇਲਜ਼ਾਮ ਲਗਾਏ।
ਕਵਸਚਨ ਪੀਰੀਅਡ ਦੌਰਾਨ ਟਰੂਡੋ ਨੇ ਕਿਹਾ ਕਿ ਚੀਨ ਦੇ ਨਾਲ ਡੀਲ ਫੇਲ੍ਹ ਹੋ ਗਈ ਸੀ, ਪਰ ਕੈਨੇਡਾ ਨੇ ਬਾਕੀ ਦੇ ਡੀਲ ਰੱਦ ਨਹੀਂ ਹੋਣ ਦਿੱਤੇ ਅਤੇ ਇਸੇ ਮਹਿਨਤ ਦਾ ਨਤੀਜਾ ਹੈ ਕਿ ਅੱਜ ਦੇਸ਼ ਕੋਲ ਵੈਕਸੀਨ ਸੰਬੰਧੀ 7 ਕਰਾਰ ਹੋ ਚੁੱਕੇ ਹਨ।
ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੀ ਲੀਡਰਸ਼ਿਪ ਲੋਕਾਂ ਦੇ ਲਈ ਅਸਲ 'ਚ ਕੰਮ ਕਰ ਕੇ ਵਿਖਾਉਂਦੀ ਹੈ।
ਜਗਮੀਤ ਸਿੰਘ ਨੇ ਵੈਕਸੀਨ ਦੇ ਮਾਮਲੇ 'ਚ ਕੰਜ਼ਰਵੇਟਿਵ ਤੇ ਲਿਬਰਲ ਸਰਕਾਰਾਂ 'ਤੇ ਚੁੱਕੇ ਸਵਾਲ
ਐਨ.ਡੀ.ਪੀ. ਲੀਡਰ ਜਗਮੀਤ ਸਿੰਘ ਨੇ ਅੱਜ ਲਿਬਰਲ ਸਰਕਾਰ ਨੂੰ ਘੇਰਿਆ ਅਤੇ ਕਿਹਾ ਕਿ ਯੂ.ਕੇ. ਨੇ ਕੈਨੇਡਾ ਤੋਂ ਪਹਿਲਾਂ ਕੋਵਿਡ-19 ਵੈਕਸੀਨ ਨੂੰ ਹਾਸਿਲ ਕਰਨ ਲਈ ਹਰੀ ਝੰਡੀ ਵਿਖਾ ਦਿੱਤੀ ਹੈ।
ਜਗਮੀਤ ਸਿੰਘ ਨੇ ਕਿਹਾ ਕਿ ਯੂ.ਕੇ. ਵਿੱਚ ਅਗਲੇ ਹਫ਼ਤੇ ਤੋਂ ਇਸ ਵੈਕਸੀਨ ਨੂੰ ਬਣਾਉਣਾ ਵੀ ਸ਼ੁਰੂ ਹੋ ਜਾਵੇਗਾ।
ਉਨ੍ਹਾਂ ਕਿਹਾ ਕਿ ਬੇਹੱਦ ਦੁੱਖ ਦੀ ਗੱਲ ਹੈ ਕਿ ਕੈਨੇਡਾ ਕੋਲ ਸਮਰੱਥਾ ਨਹੀਂ ਹੈ ਕਿ ਖੁਦ ਵੈਕਸੀਨ ਨੂੰ ਬਣਾਇਆ ਜਾ ਸਕੇ।
ਉਨ੍ਹਾਂ ਕਿਹਾ ਕਿ ਅਮਰੀਕਾ ਅਤੇ ਆਸਟ੍ਰੇਲੀਆ ਵੀ ਇਸ ਮਾਮਲੇ 'ਚ ਕੈਨੇਡਾ ਤੋਂ ਅੱਗੇ ਚੱਲ ਰਹੇ ਹਨ।
ਜਗਮੀਤ ਸਿੰਘ ਨੇ ਇਹਨਾਂ ਹਾਲਾਤਾਂ ਲਈ ਸਮੇਂ-ਸਮੇਂ ਦੀਆਂ ਕੰਜ਼ਰਵੇਟਿਵ ਅਤੇ ਲਿਬਰਲ ਸਰਕਾਰਾਂ ਨੂੰ ਜ਼ਿੰਮੇਵਾਰ ਦੱਸਿਆ।
