ਕੈਨੇਡਾ ਸਰਕਾਰ ਕੱਲ੍ਹ ਪੇਸ਼ ਕਰੇਗੀ ਮਿੰਨੀ ਬਜਟ

ਕੈਨੇਡਾ ਸਰਕਾਰ ਮੰਗਲਵਾਰ ਨੂੰ ਹਾਊਸ ਆਫ ਕਾਮਨਜ਼ ਵਿੱਚ ਫਾਲ ਐਕਨੌਮਿਕ ਸਟੇਟਮੈਂਟ ਯਾਨੀ ਮਿੰਨੀ ਬਜਟ ਪੇਸ਼ ਕਰਨ ਜਾ ਰਹੀ ਹੈ, ਇਸ ਵਿੱਚ ਮੁੱਖ ਫ਼ੋਕਸ ਰੈਂਟਲ ਅਤੇ ਕਿਫਾਇਤੀ ਰਿਹਾਇਸ਼ 'ਤੇ ਹੋਣ ਵਾਲਾ ਹੈ।

ਸਰਕਾਰ ਵੱਲੋਂ ਇਸ ਮਿੰਨੀ ਬਜਟ ਵਿੱਚ ਫੈਡਰਲ ਵਿੱਤ ਅਤੇ ਸਰਕਾਰ ਦੀਆਂ ਪ੍ਰਮੁੱਖ ਤਰਜੀਹਾਂ ਬਾਰੇ ਅਪਡੇਟ ਦਿੱਤੀ ਜਾਵੇਗੀ। ਸੂਤਰਾਂ ਦਾ ਕਹਿਣਾ ਹੈ ਕਿ ਵਿੱਤ ਮੰਤਰੀ ਕ੍ਰਿਸਟੀਆ ਫ੍ਰੀਲੈਂਡ ਵਿੱਤੀ ਅਪਡੇਟ ਵਿੱਚ ਹਾਊਸਿੰਗ ਉਸਾਰੀ ਲਈ ਬਿਲੀਅਨ ਡਾਲਰਾਂ ਦੀ ਫੰਡਿੰਗ ਦੀ ਘੋਸ਼ਣਾ ਕਰਨ ਵਾਲੇ ਹਨ, ਇਸ ਵਿੱਚ ਕਿਫਾਇਤੀ ਰਿਹਾਇਸ਼ ਦੇ ਉਸਾਰੀ ਲਈ ਆਸਾਨ ਕਰਜ਼ੇ ਅਤੇ ਸਿੱਧੀ ਫੰਡਿੰਗਦੀ ਮਦਦ ਸ਼ਾਮਲ ਹੋਵੇਗੀ।

ਸੂਤਰਾਂ ਮੁਤਾਬਕ ਨਵੇਂ ਉਪਾਵਾਂ ਵਿੱਚ ਕਿਰਾਏ ਦੀਆਂ ਰਿਹਾਇਸ਼ਾਂ ਦੀ ਉਸਾਰੀ ਵਾਸਤੇ 10 ਸਾਲਾਂ ਲਈ 15 ਬਿਲੀਅਨ ਡਾਲਰ ਦਾ ਲੋਨ ਅਤੇ ਕਿਫਾਇਤੀ ਰਿਹਾਇਸ਼ ਲਈ $1-ਬਿਲੀਅਨ ਦਾ ਸਮਰਪਿਤ ਫੰਡ ਸ਼ਾਮਲ ਹੋਵੇਗਾ। ਬਿਲਡਰਸ ਨੂੰ ਉਧਾਰ ਦੇਣ ਦੀ ਸਹੂਲਤ ਕੈਨੇਡਾ ਮੌਰਗੇਜ ਅਤੇ ਹਾਊਸਿੰਗ ਕਾਰਪੋਰੇਸ਼ਨ ਜ਼ਰੀਏ ਮਿਲੇਗੀ। ਇਸ ਤੋਂ ਇਲਾਵਾ ਰਿਸਕ ਦਾ ਸਾਹਮਣਾ ਕਰ ਰਹੇ ਘਰ ਦੇ ਮਾਲਕਾਂ ਨੂੰ ਰਾਹਤ ਦੇਣ ਲਈ ਮੌਰਗੇਜ ਨਿਯਮ ਵਿੱਚ ਤਬਦੀਲੀ ਕੀਤੀ ਜਾ ਸਕਦੀ ਹੈ।